މަގޫދޫގައި މިހާރު ކުރިއަށްދާ ފާފު ވޮލީ މުބާރާތުގެ ތިންވަނަ ދުވަހުގެ ހަވީރު ކުޅެވުނު މެޗުގައި އެންމެ ފަހުގެ ޗެމްޕިއަން ނިލަންދޫ މޮޅުވެއްޖެއެވެ. މި މުބާރާތުގައި އަލަށް ވާދަކުރަމުންދާ ފ. ބިލެއްދޫއާ ދެކޮޅަށްކުޅެ ނިލަންދޫ މޮޅުވީ ފަސް ސެޓަށް ކުޅެގެން 3 ސެޓް 2 ސެޓުންނެވެ. މި ނަތީޖާއާއެކު މުބާރާތުގެ ތާރީޚުގައި މެޗަކުން ބަލިނުވެ ނިލަންދޫން ދަމަހައްޓަމުން އަންނަ ރެކޯޑަށް މެޗެއް މިވަނީ އިތުރުވެފައެވެ. މިއަދުގެ މެޗާއެކު މިމުބާރާތުގެ ތާރީޚުގައި ނިލަންދޫން މިވަނީ ޖުމުލަ 5 މެޗު ކުޅެފައެވެ.

މިއަހަރުގެ މުބާރާތުގައި ބިލެއްދޫންވަނީ އެޓީމު ކުޅުނު ފުރަތަމަ މެޗުގައި ފީއަލިއާއި ދެކޮޅަށް ވާދަކޮށް 3 ސެޓުން ބަލިވެފައެވެ. މުބާރާތުގައި އަލަށް ވާދަކުރިނަމަވެސް، އެޓީމުގެ ކުޅުން ވަރަށް ފާހަގަކޮށްލެވެއެވެ. އެގޮތުން މިއަދުގެ މެޗުގެ ފުރަތަމަ 2 ސެޓް 25-21 ގެ ނަތީޖާއިން ނިލަންދޫ މޮޅުވެފައި ވަނިކޮށް 3 ވަނަ ސެޓް ބިލެއްދޫންވަނީ 25-21 އިން މޮޅުވެފައެވެ. 4 ވަނަ ސެޓު ބިލެއްދޫން ކާމިޔާބުކުރީ 25-18 އިންނެވެ.

މެޗުގެ ފަހު ސެޓުގެ ކުޅުން ފެށުނީ މަޣުރިބް ނަމާދަށް ފަހުގައެވެ. މެޗު ފެށިގެން ނިލަންދޫ ޓީމަށް މެޗުތެރެއަށް ރަނގަޅަށް ނުވަދެވި އުޅެނިކޮށް ފުރަތަމަ ފަސް ޕޮއިންޓްވެސް ނެގީ ބިލެއްދޫންނެވެ. ބިލެއްދޫން ރަނގަޅު ލީޑެއްގައި ވަނިކޮށް ނިލަންދޫންވަނީ މަޑުމަޑުން ކުޅުމުގެ ތެރެއަށް ވަދެ 7-7 އިން އެއްވަރުވެސް ކޮށްފައެވެ.

މި މެޗުގެ ފަހުކޮޅުގައި ބިލެއްދޫގެ ސެޓަރު ޖާރޒީ ނަމްބަރ 8، އަހުމަދު ހަމީދު (ކުޑޭ) އަށް ލިބުނު އަނިޔާއަކާ ގުޅިގެން އޭނާ ބޭލިއެވެ. ބިލެއްދޫން ގަދަ ހިތްވަރު ނެރެގެން ނެރުނު މިމެޗުގައި ކުޑޭ ވަނީ މޮޅު ކުޅުމެއް ދައްކާފައެވެ. ކުޑޭއަށް އަނިޔާވީ ބުލޮކަށް އަރާފައި ތިރިވިގަޑީ ފައި ޖެހުނު ގޮތަކުންކަމަށް ލަފާކުރެވުނެވެ. އޭރު ބިލެއްދޫ ޓީމުންވަނީ 9-7 އިން ކުރި ހޯދާފައެވެ. އެހެން ނަމަވެސް އަނިޔާގައި ވަނިކޮށް ކޯޗުވަނީ ކުޑޭ އަލުން ކުޅެން އަރުވާފައެވެ. އޭރު މެޗުން މޮޅުވާން ނިލަންދޫއަށް ބޭނުންވަނީ 1 ޕޮއިންޓެވެ.

ދެޓީމުގެ ފަރާތުންވެސް ފޯރިގަދަ ކުޅުމެއް ފެނިގެން ދިޔަ މި މެޗުގެ ފަހު ސެޓު ނިލަންދޫން ކާމިޔާބުކުރީ 15-12 އިންނެވެ. މި މެޗު ވެގެން ގޮސްފައިވަނީ މިއަހަރުގެ މިހާތަނަށް ކުޅެވުނު މެޗުތަކުގެ ތެރެއިން ސަޕޯޓަރުންގެ ފޯރިވެސް އެންމެ ގަދަކޮށް ފެނުނު މެޗަށެވެ.

މި މެޗުގައި ބިލެއްދޫ ޓީމުގެ ކެޕްޓަން އަޒްހީނަށް ރެފްރީ ވަނީ ރަތް ކާޑެއްވެސް ދައްކާފައެވެ. މެޗުގެ ތެރެއިން ބިލެއްދޫ ޓީމުގެ ކުޅުންތެރިންނާ އޮފިޝަލުންގެ ފަރާތުންވެސް މެޗު ރެފްރީންނަށް ޝަކުވާތަކެއް ކުރިތަން ފެނިގެން ދިޔައެވެ. ރެފްރީންގެ ބައެއް ނިންމުންތަކާމެދު ހިތްހަމަ ނުޖެހުން އޮތްތަންވެސް ފެނިގެން ދިޔައެވެ.

މި މުބާރާތުގެ ފިރިހެން ޑިވިޒަނުގައި ބިލެއްދޫން 2 މެޗު މިހާތަނަށް ކުޅެފައިވާއިރު އެޓީމުވަނީ އެ ދެމެޗުންވެސް ބަލިވެފައެވެ. މިއަހަރުގެ މުބާރާތުގެ ފުރަތަމަ ދުވަހު ބިލެއްދޫން ބަލިވެފައިވަނީ ފީއައްޔާ ބައްދަލުކޮށް 3 ސެޓުންނެވެ.

މި މެޗުގެ މޮޅު ކުޅުންތެރިއަކަށް ހޮވުނީ ނިލަންދޫ ޓީމުގެ ޖާޒީނަމްބަރު 7 ލަހުފާން ޢަބްދުﷲއެވެ.