ފ. އަތޮޅު ކައުންސިލްގެ ފާފު ވޮލީ މުބާރާތް 2024 މިއަދު ހަވީރު ފައްޓައިފިއެވެ. މަގޫދޫ ކައުންސިލުން ހޯސްޓް ކުރާ މިމުބާރާތުގެ ފުރަތަމަ ދުވަހުގެ މެޗުތަކުގައި ބައްދަލު ކޮށްފައިވަނީ ފީއަލީ އަދި ބިލެއްދޫގެ އަންހެން އަދި ފިރިހެން ޓީމެވެ.
މި މުބާރާތުގެ ފުރަތަމަ މެޗުގައި މިއަދު ހަވީރު ކުޅެފައިވަނީ އެ ދެރަށުގެ ފިރިހެން ޑިވިޒަނުގެ މެޗެވެ. ދެ ޓީމުގެ ފަރާތުންވެސް ފޯރިގަދަ އަދި ވާދަވެރި ކުޅުމެއް ފެނިގެން ދިޔަ މިމެޗު ފީއަލިން ކާމިޔާބުކުރީ 3 ސެޓް 1 ސެޓުންނެވެ. މެޗުގެ ފުރަތަމަ ދެ ސެޓް ފީއަލިން ކާމިޔާބުކުރިއިރު، ފުރަތަމަ ސެޓް ނިމުނީ 25-21 އިންނެވެ. ދެވަނަ ސެޓް 25-19 އިން ފީއަލި މޮޅުވިއިރު، ވާދަވެރި ކުޅުމަކަށްފަހު ތިންވަނަ ސެޓް 25-21 އިން ކާމިޔާބުކުރީ ބިލެއްދޫންނެވެ. ހަތަރުވަނަ ސެޓްގައި ފީއަލީގެ ކުޅުން ރަނގަޅުކޮށް ގިނަ ވަގުތު ފަރަގު ބޮޑު ލީޑެއްގައި އޮވެ ކުޅެމުންގޮސް ފީއަލިން ކާމިޔާބުކުރީ 25-14 އިންނެވެ.
މި މެޗުގެ މޮޅު ކުޅުންތެރިއާއަށް ހޮވުނީ ފީއަލީ ޓީމުގެ ޖާޒީ ނަމްބަރު 18 އާޒިމްއެވެ.
މި މުބާރާތުގެ އަންހެން ޑިވިޒަނުގެ ފުރަތަމަ މެޗުގައި މިރޭ ފިއަލީ އަދި ބިލެއްދޫ ބައްދަލު ކޮށްފައިވާއިރު ފަސޭހަކަމާއެކު މި މެޗު ކާމިޔާބުކުރީ ފީއަލީންނެވެ. އެގޮތުން މެޗުގެ ފުރަތަމަ ސެޓް 25-10 ން، ދެވަނަ ސެޓް 25-12 އަދި ތިންވަނަ ސެޓް 25-18 އިން ކާމިޔާބުކުރީ ފީއަލީންނެވެ.
މި މެޗުގެ މޮޅު ކުޅުންތެރިއަކަށް ހޮވިފައިވަނީ ފީއަލީ ޓީމުގެ ޖާޒީނަމްބަރު 7، ރިފްދާ އެވެ.
މި މުބާރާތުގައި މާދަމާވެސް 2 ޑިވިޒަންގެ 2 މެޗު ކުޅޭނެއެވެ. މާދަމާގެ މެޗުތަކުގައި ބައްދަލުކުރާނީ ދަރަނބޫދޫ އަދި މުބާރާތް ހޯސްޓްކުރާ މަގޫދޫގެ ފިރިހެން އަދި އަންހެން ޓީމުތަކެވެ.
