މިހިނގާ އޯގަސްޓް މަހުގެ 10 ވަނަ ދުވަހު ފ. މަގޫދޫގައި ފެށުމަށް ހަމަޖެހިފައިވާ ފާފު ވޮލީ މުބާރާތް 2024 ގެ މެޗުތައް ކުޅެމުންދާ ވަގުތުތަކުގައި ވޮލީ ދަނޑަށް ވަދެ މެޗުބެލުމަށް ބޭނުންވާ ފަރާތްތަކަށް ޓިކެޓް ވިއްކަން މަޝްވަރާ ކުރެވެމުންދާ ކަމަށް ފ. މަގޫދޫ ކައުންސިލްގެ ރައީސް އަބްދުﷲ ވަހީދު ވިދާޅުވެއްޖެއެވެ.
މުބާރާތް ހޯސްޓް ކުރާ މަގޫދޫ ކައުންސިލްގެ ފަރާތުން ދަނިއުސްއަށް މަޢުލޫމާތު ދެއްވަމުން އެކައުންސިލްގެ ރައީސް ވިދާޅުވި ގޮތުގައި، ވޮލީ ދަނޑު ސަރަޙައްދަށް ތަފާތު ބަދަލެއް ކައުންސިލުން ގެނެސްފައިވާކަމަށާއި މިހާރު ދަނޑުތެރޭގައި އެއްފަހަރާ 100 އެއްހާ މީހުންނަށް ދަނޑަށްވަދެ މެޗުތައް ބަލާލެވޭނެ ގޮތަށް ތަރައްޤީ ކޮށްފައިވާކަމަށެވެ. އެގޮތުން ދަނޑަށް ވަނުމަށް ބޭނުންވާ ފަރާތްތަކަށް މެޗު ކުޅެމުންދާއިރު ދަނޑުން ޓިކެޓް ދޫކުރަމުންދާނެ ކަމަށާއި، ޓިކެޓް ވިއްކާނެ ވަކި އަގެއް އަދި ފައިނަލް ނުކުރެވޭކަމަށް ވިދާޅުވިއެވެ. ވަހީދު އިތުރަށް ވިދާޅުވީ ދަނޑަށް ވަނުމަށް އެވަގުތަކު މެޗުތައް ކުޅެމުންދާ ދެޓީމުގެ ސަޕޯޓަރުންނަށް ވަކި އިންސައްތައެއް ކަނޑައަޅާފައި އޮތުން އެއީ އެންމެ ފައިދާހުރި ގޮތެއްކަމަށް ގަބޫލުކުރެވޭކަމަށާއި އަދި ވަކި އިންސައްތައެއް އެހެން ފަރާތްތަކަށް ކަނޑައެޅުމަށް މަޝްވަރާ ކުރައްވާނެއެވެ.
ވަހީދު އިތުރަށް ވިދާޅުވީ ބައެއްފަހަރު ސަޕޯޓަރުންނަށް ދަނޑަށް ވަދެވޭ ގޮތަށް އޮތުމަކީ ޓީމުތަކަށް އެންމެ ރައްކާތެރި ގޮތް ނޫންކަމަށް ވެދާނެކަންވެސް ގަބޫލު ކުރެވޭ ކަމަށެވެ. އައި އެއީވެސް އެބޭފުޅުންގެ ތެރޭގައި މަޝްވަރާ ކުރެވިފައިވާ ކަމެއްކަމަށާއި، އެއްވެސް ފަރާތަކުން ދަނޑުތެރޭގައި ކުޅިވަރުގެ ރޫޙާއި ޚިލާފު އެއްވެސް ޢަމަލެއް ހިންގުމަށް ތާއީދު ނުކުރައްވާނެކަމަށާއި އަދި އެކަމަށް އެއްވެސް ފަރާތަކަށް ފުރުސަތު ނުދެއްވާނެކަމަށެވެ. އެހެންކަމުން މަގޫދޫއިން މެހެމާނުންނަށް މިދެވޭ ފުރުސަތުގެ ބޭނުން ހުރިހާ ފަރާތަކުންވެސް ހެޔޮގޮތުގައި ހިފުމަށް އެދޭކަމަށް ވިދާޅުވިއެވެ.
މުބާރާތުގެ މެޗުތަކަށް ޓިކެޓް ވިއްކައިގެން ސަޕޯޓަރުންނަށް ދަނޑަށް ވަދެވޭނެ އިންތިޒާމް ހަމަޖެއްސުމަށް މަސައްކަތް ކުރަމުން ދިޔަނަމަވެސް، ކުރިއެކޭ އެއްފަދައިން ދަނޑު ބޭރުން މެޗުތައް ބަލަން ބޭނުންވާ ފަރާތްތަކަށް އެފުރުސަތު ލިބިގެންދާނެއެވެ. ދަނޑަށް ވަދެ މެޗުތައް ބެލުމަށް ފުރުސަތު ހުޅުވާލުމުގެ އެންމެ ބޮޑު ބޭނުމަކީ، ދަނޑުތައް ހަދާފައިވާ ގޮތުން ކުޑަކުދިންނަށް ކުޅޭތަން ނުފެނުމާއި، ޚާއްސަ އެހީތެރިކަން ބޭނުންވާ މީހުންނާއި ދުވަސްވީ މީހުން ގިނަ ވަގުތު ކޮޅަށް ތިބެގެން މެޗު ބެލުމަށް ދަތިވާތީކަމަށް މަޢުލޫމާތު ލިބެއެވެ.
މި މުބާރާތަށް ތައްޔާރުވުމަށް މުބާރާތް ހޯސްޓްކުރާ ކައުންސިލްގެ ޒިންމާގެ ދަށުން ގިނަ ކަންތައްތަކެއް ކުރަމުން އަންނަކަމަށްވަނީ މަޢުލޫމާތު ލިބިފައެވެ. ފާފު ވޮލީ މުބާރާތަކީ ފ.އަތޮޅު ކައުންސިލުން ބާއްވާ ދެވަނަ ވޮލީ މުބާރާތެވެ. މިދިޔަ އަހަރު ބޭއްވުނު މިމުބާރާތުގެ ފިރިހެން ޑިވިޒަނުގެ ޗެމްޕިއަންކަން ހޯދީ އެއަހަރުގެ މުބާރާތް ހޯސްޓްކުރި ނިލަންދޫއިންނެވެ. އަދި އެއަހަރުގެ އަންހެނުންގެ ޑިވިޒަނުގެ ޗެމްޕިއަންކަން ހޯދީ މަގޫދޫއިންނެވެ.
