ފާފު އަތޮޅު ތަޢުލީމީ މަރުކަޒުގެ 2024-2025 ވަނަ އަހަރުގެ އިންޓަރ ހައުސް ވޮލީ ބޯޅަ މުބާރާތް އިއްޔެ ފެށިއްޖެއެވެ.
މި މުބާރާތަކީ އެ ސުކޫލުގެ ކުޅިވަރު ކުލަބުން އިންތިޒާމު ކޮށްގެން ކޮންމެ ދިރާސީ އަހަރަކު ވެސް ކުރިއަށްގެންދާ މުބާރާތެކެވެ. މި މުބާރާތް ކުރިއަށް ދާނީ ޖުލައި މަހުގެ 21 ވަނަ ދުވަހުން ފެށިގެން އޮގަސްޓް މަހުގެ 3 ވަނަ ދުވަހުގެ ނިޔަލަށެވެ.
މި މުބާރާތުގެ މެޗްތައް ކުޅެން ހަމަޖެހިފައިވަނީ އެއް ދުވަހު ފިރިހެން ކުދިންގެ މެޗެއް، އަނެއް ދުވަހު އަންހެން ކުދިންގެ މެޗެއް ކުޅޭ އުސޫލުންނެވެ.
ފައިނަލް މެޗް އަދި 27 ޖުލައި ވާ ހޮނިހިރު ދުވަސް ނޫން އެހެން ދުވަސްތަކުގައި މެޗު އޮންނާނީ ކޮންމެ ދުވަހަކުވެސް ހަވީރުގަ އެވެ.
މި މުބާރާތް ފެށުމުގެ ގޮތުން އިއްޔަ ހަވީރު ކުޅެވުނު ފިރިހެން ކުދިންގެ މެޗުގައި ބައްދަލު ކުރީ އިތާ ހައުސް އާއި މުތްތޮށި ހައުސްއެވެ. މި މެޗު ކާމިޔާބު ކުރީ 3 ސެޓު 1 ސެޓުން އިތާ ހައުސްއެވެ.
މި މެޗުގެ ސެޓްތައް ދިޔައީ 19’25 ، 14’25 އަދި 26’24 ، 16’25 އިންނެވެ.
މި މެޗުގެ އެންމެ މޮޅު ކުޅުންތެރިޔަކަށް ހޮވުނީ އިތާ ހައުސްގެ ޖާރޒީ ނަންބަރު 20 ބައްޝާރު ޢަބްދުއް ޞަމަދު އެވެ.
މި މުބާރާތުގައި މިއަދު ހަވީރު ކުޅުމަށް ހަމަޖެހިފައިވަނީ އަންހެން ކުދިންގެ މެޗެކެވެ. މި މެޗުގައި ބައްދަލު ކުރާނީ އެންދެރި ހައުސް އާއި މުރަކަ ހައުސް އެވެ.