އޭކްސް ސްޕޯޓްސް ކުލަބުން އިންތިޒާމްކޮށްގެން ކުރިއަށް ގެންދިޔަ “ދިޔޯކަޕް 2024” ގެ ޗެމްޕިއަންކަން އޭކްސް ސްޕޯޓްސް ކުލަބުން ހޯދައިފިއެވެ. އޭކްސް އިން މިމުބާރާތުގެ ޗެމްޕިއަންކަން ހޯދާފައިވަނީ މިއަދު ހަވީރު ކުޅެވުނު ފައިނަލްގައި 3 ސެޓް 1 ސެޓުން އެޑް ޖަމިއްޔާ ބަލިކުރުމަށްފަހު ގައެވެ.

މި މުބާރާތުގެ ފައިނަލަށް އޭކްސް ދަތުރުކޮށް ޗެމްޕިއަންކަން ހޯދާފައިވަނީ އެއްވެސް މެޗަކުން ބަލި ނުވެއެވެ. މުބާރާތުގެ ރަނަރއަޕް ޓީމު، އެޑް ޖަމިއްޔާ މި ފައިނަލާއެކު 5 މެޗު ކުޅުނު އިރު ދެ މެޗުން ބަލިވެފައިވާއިރު، ފާހަގަކޮށްލަންޖެހެނީ އެޓީމު ދެ ފަހަރުވެސް ބަލިވީ އޭކްސް ޓީމާއި ވާދަކޮށެވެ.

ފައިނަލް މެޗުގެ ސެޓްތަކުގެ ނަތީޖާތަކަށް ބަލާލާއިރު ފުރަތަމަ ދެ ސެޓް ފެނިގެން ދިޔައީ ވަރަށް ވާދަވެރިކޮށެވެ. ފުރަތަމަ ސެޓް ފަށައިގެންވެސް ދެޓީމުން ވާދަވެރިކޮށް ފޯރީގައި ކުޅުނުއިރު އެސެޓް އެޑުން ކާމިޔާބުކުރީ 27-25 އިންނެވެ. މެޗުގެ ދެވަނަ ސެޓުވެސް ދެޓީމުގެ ފަރާތުން ވާދަވެރިކޮށް ކުޅުންއިރު މި ސެޓް 25-23 އިން ކާމިޔާބުކުރީ އޭކްސް އިންނެވެ.

މެޗުގެ ތިންވަނަ ސެޓް މޮޅަށްކުޅެ ބޮޑު ތަފާތަކުން ލީޑުކޮށް ނިންމާލީ އޭކްސް އިންނެވެ. ފުރަތަމަ ދެ ސެޓްގެ ވާދަވެރިކަމާއެކު މި ސެޓްވެސް އެހާ ފޯރިގަދަވާނެކަމަށް ބެލެވުނު ނަމަވެސް އޭކްސްއިން މި ސެޓް ކާމިޔާބުކުރީ 25-11 ގެ ބޮޑު ތަފާތަކުންނެވެ.

ހަތަރުވަނަ ސެޓް ފަށައިގެންވެސް ފެނުނީ ވަރަށް ވާދަވެރި ކުޅުމެކެވެ. ދެޓީމުންވެސް ކައިރި ކައިރީ ޕޮއިންޓްތައް ނަގަމުންގޮސް 7 ޕޮއިންޓްގެ ލީޑަކަށް އެޑުން ކުރި ހޯދިއެވެ. އެއާއެކު ބޮޑަށް ބެލެވިގެން ދިޔައީ މޮޅުވާނެ ޓީމެއް ކަނޑައެޅުމަށް އިތުރު ސެޓެއް ކުޅެން ޖެހިދާނެކަމަށެވެ. އެހެންނަމަވެސް، ބަލިވަމުން ދިޔަ އޭކްސްގެ ސަޕޯޓަރުންގެވެސް ފޯރިއާއެކު ހިތްވަރުކޮށްގެން މި ސެޓުގެ ނަތީޖާ އެޓީމުން އަނބުރާލާ ޗެމްޕިއަންކަން ހޯދީއެވެ. މި ސެޓް އޭކްސް އިން ކާމިޔާބުކުރީ 25-18 އިންނެވެ. ސެޓްގެ ބޮޑުބައި މޮޅަށްކުޅެ ލީޑުކުރަމުން ދިޔަ އެޑް ޓީމުން 18 ޕޮއިންޓް ހޯދިއިރު އޭކްސް އޮތީ 13 ޕޮއިންޓްގައެވެ. އޭގެ ފަހުން އެޑަށް އިތުރު އެއްވެސް ޕޮއިންޓެއްނުދީ އޭކްސް މެޗު ކާމިޔާބުކުރުން ވެގެން ދިޔައީ ގިނަބަޔަކަށް ހައިރާންކަން ގެނުވި ކަމަކަށެވެ.

ދިޔޯކަޕްގެ ފައިނަލް މެޗު ބަލާލުމަށް ދަރަނބޫދޫގެ ގިނަ އަދަދެއްގެ މީހުންވަނީ ދަނޑު ސަރަޙައްދަށް އައިސްފައެވެ. ދަނިއުސް މީޑިއާއިން ވަގުތުން ލައިވްކުރަމުން ދިޔަ މި މެޗު ޖުމުލަ 1،100 މީހުން ވަނީ އޮންލައިންކޮށް ބަލާފައެވެ.

މެޗަށްފަހު، މުބާރާތުގެ އެކިއެކި ވަނަތަކަށް ހޮވުނު ފަރާތްތަކަށް އިނާމު ދިނުމަށް ކުޑަ ހަރަކާތެއްވަނީ ކުރިއަށް ގެންގޮސްފައެވެ. އޭކްސް ސްޕޯޓްސް ދިޔޯކަޕަކީ އެކުލަބުން އިންތިޒާމްކޮށް ވަރަށް ގިނަ ބައެއްގެ އެހީތެރިކަމާއެކު ކުރިއަށް ގެންގޮސްފައިވާ މުބާރާތެކެވެ. މިއީ ދިޔޯކަޕްގެ ފުރަތަމަ މުބާރާތެވެ. މުބާރާތް ފެށުމުގެ ކުރިން ދަނިއުސްއަށް ދެއްވި އިންޓަވިއުއެއްގައި އޭކްސްގެ ރައީސް މުއައްދު ވިދާޅުވީ، އެކުލަބުގެ ވިސްނުމަކީ މި މުބާރާތް މެދުނުކެނޑި ކާމިޔާބުކަމާއެކު ކުރިއަށް ގެންދިއުމެވެ.