ފ. ދަރަނބޫދޫގައި ކުޑަކުދިންގެ ކުޅިވަރު ތަރައްޤީކުރުމުގެ މަސައްކަތް ކުރަމުން އަންނަ ހުޅުމާލެ ޔޫތު ސްޕޯޓްސް ކުލަބް (އެޗް.ވައި.އެސް.ސީ) އެކަޑެމީއާއި ދ. ބަނޑިދޫ މައިޝާން އެކަޑެމީއާއި ދެމެދު އެކުވެރިކަމުގެ ފުޓްބޯޅަ މެޗުތަކެއް މިއަދު ކުޅެފިއެވެ.
ފ. ދަރަނބޫދޫގައި މިމަހު އަލަށް ރަޖިސްޓްރީ ކުރެވުނު “ޚައިރު ފައުންޑޭޝަން” އިން އެޗްވައިއެސްސީ އާއި ގުޅިގެން އިންތިޒާމްކުރި މި މެޗުތައް ކުޅެފައިވަނީ ފ.ދަރަނބޫދޫގެ ފުޓްބޯޅަ ދަނޑުގައެވެ. ދެ އެކަޑެމީގެ މެދުގައި މެޗުތައް ކުޅެފައިވަނީ 2 އުމުރު ފުރާއަކަށް ބަހާލައިގެންނެވެ.
އެގޮތުން ފުރަތަމަ މެޗުގައި ބައްދަލު ކޮށްފައިވަނީ 14 އަހަރުން ދަށުގެ އުމުރު ފުރާގެ ކުދިންނެވެ. މި މެޗު 5 ލަނޑު 1 ލަނޑުން ކާމިޔާބުކުރީ ދ. ބަނޑިދޫ މައިޝާން އެކަޑެމީންނެވެ. މެޗުގައި މައިޝާން އެކަޑެމީން މޮޅަށް ކުޅުނުއިރު، އެޗްވައިއެސްސީ އެކަޑެމީއަށް ކާމިޔާބުކުރެވިފައިވާ ގޯލަކީ އިނދިކޮޅު ޓީމު، އޭރިއާ ތެރެއިން ބޯޅަ ޕާސްކޮށްލަން އުޅުމުގެ ތެރޭގައި ބައިކޮޅަށް ޖެހުނު ގޯލެކެވެ.
ދެވަނަ މެޗުގައި ބައްދަލު ކޮށްފައިވަނީ ދެ އެކަޑެމީގެ 12 އަހަރުން ދަށުގެ ޓީމެވެ. މިމެޗު 7 ލަނޑު 2 ލަނޑުގެ ތަފާތުން ފަސޭހަކަމާއެކު ކާމިޔާބުކުރީ އެޗްވައިއެސްސީ އެކަޑެމީންނެވެ. މި މެޗުތައް ބަލާލުމަށް ދެރަށުގެ ސަޕޯޓަރުން މެޗު ކުޅުނު ސަރަޙައްދަށް އައިސްފައިވެއެވެ.
ހުޅުމާލެ ޔޫތު އެންޑް ސްޕޯޓްސް ކުލަބު އެކަޑެމީން ޚައިރު ފައުންޑޭޝަނާއި ގުޅިގެން ދަރަނބޫދޫގައި ކުޅިވަރުގެ ތެރެއިން ކުދިންގެ އަޚްލާޤު ރަނގަޅު ކުރުމަށާއި، ކުދިންގެ ހުނަރުތައް އިތުރުކުރުމަށް ތަމްރީނުތައް ފަށާފައިވަނީ މީގެ ދެހަފްތާއެއްހާ ދުވަސްކުރިންނެވެ. ޚައިރު ފައުންޑޭޝަނުން މަޢުލޫމާތު ދެއްވި ގޮތުގައި ކުދިން މިކަމަށް ވަރަށް ބޮޑަށް ޝައުޤުވެރިކަން އިތުރުކޮށްފައިވާ ކަމަށާއި، ބެލެނިވެރިންގެ ފަރާތުން ވަރަށް ރަނގަޅު އެއްބާރުލުމެއް އެފައުންޑޭޝަނަށް ލިބެމުން އާދެއެވެ.
އެޗްވައިއެސްސީ އާއި ޚައިރު ފައުންޑޭޝަން ގުޅިގެން މި މަހުގެ 23 ވަނަ ދުވަހުން ފެށިގެން 28 ވަނަ ދުވަހާއި ހަމައަށް ވ. ކެޔޮދޫ “އަލިކަ ސްޕޯސްޓް އެކަޑެމީ” އާއެކު ފުޓްބޯޅަ ކޭމްޕެއް ވެސް ކުރިއަށް ގެންދިއުމަށް ވަނީ ނިންމާފައެވެ.
