ފ. ނިލަންދޫ ރަށްވެހި ގޫރޫޕުން އިސްނަގައިގެން ނިލަންދޫ ޖަމިއްޔަތުއް ޝަބާބާއި ގުޅިގެން މިއަހަރުގެ ޑިސެމްބަރު މަހު ކުރިއަށް ގެންދިއުމަށް ހަމަޖެހިފައިވާ ރަށްވެހި ޗެލެންޖު ފުޓުބޯޅަ މުބާރާތުގައި 6 ޓީމަކުން ބައިވެރިވެއްޖެއެވެ.
މުބާރާތުގައި ބައިވެރިވުމުގެ ސުންގަޑި މިމަހުގެ 20 ވަނަ ދުވަހު ހަމަވެފައިވާއިރު، ފ. ނިލަންދޫއިން ވަނީ 4 ޓީމެއް ބައިވެރިވެފައެވެ. އެއީ އެސްސީ ފަހުލަވާން، ރަވެންސް ސްޕޯޓްސް ކުލަބް، އެސްޖީސީ އަދި ނިލަންދޫ ޔަންގު ޖެނެރޭޝަން (އެންވައިޖީ) އެވެ. ފ. އަތޮޅުން މި މުބާރާތުގައި އިތުރަށް ބައިވެރިވެފައިވަނީ ފީއަލީ ޑިވެލޮޕްމަންޓް ސޮސައިޓީ (އެފްޑީއެސް) އެކަންޏެވެ. ދ. އަތޮޅުގެ 4 ރަށަކަށް މިމުބާރާތުގައި ބައިވެރިވުމުގެ ފުރުޞަތު ހުޅުވާލާފައި އޮތްނަމަވެސް ސުންގަޑި ހަމަވިއިރު ބައިވެރިވެފައިވަނީ ދ. މީދޫ ފުޓްބޯލް ކުލަބު އެކަންޏެވެ.
ޗެމްޕިއަން ޓީމަށް 20،000. ރުފިޔާގެ ފައިސާގެ އިނާމު ކަނޑައަޅާފައިވާ މި މުބާރާތް ފެށުމަށް ހަމަޖެހިފައިވަނީ ޑިސެމްބަރު 26 ވަނަ ދުވަހުގައެވެ. ފ. ނިލަންދޫ ފުޓްބޯޅަ ދަނޑުގައި މެޗުތައް ކުޅުމަށް ހަމަޖެހިފައިވާއިރު، މިއީ ރަށްރަށަށް ބައިވެރިވުމުގެ ފުރުސަތު ދެވިގެން ފ. އަތޮޅުގައި މިހާރު ކުރިއަށް ގެންދެވޭ ހަމައެކަނި ފުޓްބޯޅަ މުބާރާތްކަން ފާހަގަކުރެވެއެވެ.
