ފ. ޕޮލިސްކުލަބުން އިންތިޒާމްކޮށްގެން މިހާރު ނިލަންދޫގައި ކުރިއަށްގެންދާ ފ.ޕޮލިސް އަވަށްޓެރި ފުލުހުންގެ ހޭންޑްބޯޅަ މުބާރާތް 2023ގެ ޗެންޕިއަންކަން ނިލަންދޫ ހޭންޑްބޯޅަޓީމް ހޯދައިފިއެވެ. ނިލަންދޫ މުބާރާތުގެ ޗެންޕިއަންކަން ހޯދީ މިއަދު ހަވީރު ނިލަންދޫ ފުޓްސަލްދަނޑުގައި ކުޅެވުނު ފައިނަލްމެޗްގައި 11، 10 އިން ދަރަނބޫދޫ ޓީމް މައްޗަށް ކުރި ހޯދައިގެންނެވެ.

ފައިނަލްމެޗްގެ މޮޅުކުޅުންތެރިއަކަށް ހޮވިފައިވަނީ ދަރަނބޫދޫ ޓީމްގެ ފިރާޝާ އާދަމް އެވެ. މުބާރާތުގެ ޑްރީމް ޓީމްގައި ހިމެނިފައިވަނީ ނިލަންދޫ ޓީމުން ރަޝްފާ، ސަނިއްޔާ، ޒަޢީމާ އަދި ޒީނަތު، ދަރަނބޫދޫ ޓީމުން ފިރާޝާ އާއި އާމިނަތް އަބްދުއްލަތީފް އަދި ބިލެއްދޫ ޓީމުގެ ދީނާ އެވެ. މުބާރާތުގެ ފެއަރޕްލޭ ޓީމަކަށް ހޮވިފައިވަނީ ބިލެއްދޫ ޓީމެވެ.

މުބާރާތުގެ ޗެންޕިއަން ޓީމަށް 10،000 ރުފިޔާގެ ފައިސާގެ އިނާމް އަދި ރަނަރއަޕް ޓީމަށް 7،000 ރުފިޔާގެ ފައިސާގެ އިނާމް ދީފައިވެއެވެ.

މިމުބާރާތަކީ އަތޮޅުފެންވަރުގައި އާންމުންނަށް ހުޅުވާލައިގެން ފ އަތޮޅުގައިބާއްވާ ފުރަތަމަ ހޭންޑްބޯޅަ މުބާރާތެވެ. މުބާރާތުގެ މެއިން ސްޕުންސަރަކީ ފ. ބިލެއްދޫ ކައުންސިލެވެ. މުބާރާތް ކުރިއަށް ގެންދިއުމުގައި އެހީތެރިވެދޭ އިތުރުފަރާތްތަކުގެ ތެރޭގައި ފ ނިލަންދޫ ކައުންސިލް، ބޭންކް އޮފް މޯލްޑިވްސް، ނިލަންދޫ އަންހެނުންގެ ތަރައްޤީއަށް މަސައްކަތްކުރާ ކޮނެޓީ، ފ އަތޮޅު ކައުންސިލް، އެސްޖެހި ސްޓޯރ، ޑެން ވޯރކްސް، ރިއަލް ޖަރޒީ، ރައްވެހި ޗެލެންޖް އަދި ޖޭ ފޯ، ފ ޕޮލިސްކުލަބުން ފާހަގަކުރެއެވެ.

ފ އަތޮޅުގައި ހޭންޑްބޯޅަ ތަޢާރަފްކޮށް ކުރިއެރުވުމަށް ފ ޕޮލިސްކްލަބުން ގިނަމަސައްކަތްތަކެއް ކުރަމުން އަންނަކަން ފާހަގަކުރެވެއެވެ.