ދަނިއުސް ފެންޓަސީ ލީގު 2023/24 ގެ އޯގަސްޓް މަހުގެ އެންމެ ގިނަ ޕޮއިންޓް ހޯދި މެނޭޖަރަކަށް މުޙައްމަދު އަޙްމަދު-މޯޖުބޭ (ޓީމް ބްލޫ) ހޮވިއްޖެއެވެ.
ފެންޓަސީ ޕްރިމިއަރ ލީގުގެ ދަރަނބޫދޫ ފޭނުންނަށް ބައިވެރިވެވޭ ގޮތަށް ކުރިއަށް ގެންދާ މި މުބާރާތުގެ ކޮންމެ މަހެއްގެ 1 ވަނަ ލިބޭ މެނޭޖަރަކަށް ދަނިއުސްއިން ވަނީ 500ރ ގެ ފައިސާގެ އިނާމު ދިނުމަށް ކަނޑައަޅާފައެވެ. އެހެން އަހަރުތަކާއި ތަފާތުކޮށް މިއަހަރު ދަނިއުސް ލީގުގައި ހޮވަނީ ހަމައެކަނި ކޮންމެ މަހެއްގެ އެއްވަނަ މެނޭޖަރެވެ.
ފެންޓަސީ ލީގުގެ މި ސީޒަން ފެށިފައިވަނީ ހިނގަމުން މިދާ އޯގަސްޓް މަހުގައެވެ. މި މަހުގައި ތިން ހަފްތާގެ ކުޅުން ކުރިއަށް ގެންދެވިފައިވާއިރު “ޓީމް ބުލޫ” އިން ފުރަތަމަ ހަފްތާގައިވަނީ 87 ޕޮއިންޓް ހޯދާފައެވެ. ދެވަނަ ހަފްތާގައި 61 ޕޮއިންޓް ހޯދާފައިވާއިރު ފަހު ހަފްތާގައި ލިބިފައިވަނީ 49 ޕޮއިންޓެވެ. އޯގަސްޓް މަހުގެ ނިޔަލަށް ޖުމުލަ 4 ޕޮއިންޓް މައިނަސް ކޮށްފައިވާ ޓީމް ބުލޫއަށް ލިބިފައިވަނީ 193 ޕޮއިންޓެވެ.
ލީގުގައި މޯޖުބެއާއި އެންމެ ގާތުން ދެވަނައިގައި ވާދަކުރި ޒަޔާން އަޙްމަދަށް ލިބިފައިވަނީ 187 ޕޮއިންޓެވެ. އޯގަސްޓް މަހުގެ ފަހު ހަފްތާގައި ޒަޔާންވަނީ ހާލަންޑަށް ޓްރިޕަލް ކެޕްޓަންކަން އެކްޓިވޭޓް ކޮށްފައެވެ. ނަމަވެސް މާގިނަ ޕޮއިންޓްތަކެއް ލިބިފައިނުވާއިރު، ތިންވަނަ ލިބުނު މަސީހް ހުސައިންއަށްވަނީ 186 ޕޮއިންޓް ލިބިފައެވެ.
މި ސީޒަންގައި ދަނިއުސް ފެންޓަސީ ލީގު ކުރިއަށް ގެންދެވެނީ ޚައިރު ފައުންޑޭޝަން، އުމަސް ސްޕޯޓްސް ކުލަބުގެ އިތުރުން އަ ނޮޓް އިން ޓައިމްއާއި ލައިކްއެމްވީ ގެ ސްޕޮންސަރގެ އެހީގައެވެ.
