ފ.އަތޮޅު ކައުންސިލުން އިންތިޒާމުކޮށްގެން ފ.އަތޮޅުގެ ރަށްތަކަށް ހުޅުވާލައިގެން ކުރިއަށްގެންދިޔަ ވޮލީބޯޅަ މުބާރާތުގެ އަންހެން ޑިވިޜަންގެ ފައިނަލްގައި ފީއަލީ ކައުންސިލާއި މަގޫދޫ ކައުންސިލް ވާދަކޮށް ފ.އަތޮޅުގައި ފީއަލީން ކުރަމުން އައި ރަނިކަންވެސް ނިންމާ ފަހަތުން އަރާ މަގޫންދޫންވެސް ތާރީޚީ ކާމިޔާބެއް ހޯދައިފިއެވެ. ރޭ ކުޅެވުނު ފައިނަލް މެޗް ބަލާ ހިތްވާފަދަ ފޯރިގަދަ ކުޅުމަކަށްފަހު މަގޫދޫން ވަނީ ފަހަތުން އަރާ 3 ސެޓު 2 ސެޓުން ކާމިޔާބުކޮށް އަންހެން ޑިވިޜަންގެ ޗެމްޕިއަންކަން ހޯދާފައެވެ.

ނިލަންދޫ އިޖުތިމާޢީ މަރުކަޒުގައި ތަރައްޤީކޮށްފައިވާ އައުޓްޑޯރ ވޮލީކޯޓުގައި ކުރިއަށްދިޔަ މެޗްގައި ވާދަކުރި 2 ޓީމުގެ ސަޕޯޓަރުންގެ އިތުރުން އަތޮޅުގެ އެހެން ރަށްރަށުން މެޗްބަލާލުމަށް އައިސްތިބި އެތައްބައެއްގެ ކުރިމަތީގައި ކުޅެވުނު މެޗްގެ ފުރަތަމަ ސެޓަކީ މިމުބާރާތުގައިވެސް މިހާތަނަށް ކުޅެވުނު އެންމެ ވަރުގަދަ ކުޅުމެއް ފެނިގެންދިޔަ ސެޓެވެ. ދެޓީމުގެ ބޭރުކުޅުންތެރިންގެ މޮޅު ކުޅުމާއެކު ކޮންމެ ޓީމަކަށްވެސް ނިންމާނެ އެތައް ފުރުޞަތެއް ލިބުނު ނަމަވެސް ސެޓް ދިގުލައިގެން ގޮސް މަގޫދޫން ސެޓް ކާމިޔާބު ކުރީ 35 – 33 އިންނެވެ. މިސެޓްގެ ފަހުކޮޅު ފީއަލީގެ ތައިލެންޑް ކުޅުންތެރިޔާއަށް ކުރިމަތިވި އިންޖަރީއާއިއެކު ޓީމަށް ހާސްކަމެއް ކުރިމަތިވި ނަމަވެސް އެކުޅުންތެރިޔާގެ ފަރާތުން ފެނުނު ހިތްވަރާއެކީ ދެވަނަ ސެޓާއި ކުރިމަތިލާ މަގޫދޫއަށްވުރެ ކުޅުން ރަނގަޅުކޮށް ފީއަލިން ސެޓް ކާމިޔާބު ކުރީ 25 – 18 އިންނެވެ. ހަމަ އެހެންމެ 3 ވަނަ ސެޓަށް ނުކުމެވެސް މަގޫދޫ ޓީމަށް ކުރިއަށް ދެމިގަންނާނެ އެއްވެސް ފުރުޞަތެއް ނުދީ މުޅި ސެޓްގައި ލީޑުކޮށް ފީއަލިން ސެޓް ކާމިޔާބުކުރީ ފަސޭހަކަމާއެކު 25 – 15 އިންނެވެ. 4 ވަނަ ސެޓްގައި ފެނުނީ މުޅި މެޗްގެ އޮއިވަރު ބަދަލުވެގެން ދިޔަ މަންޒަރެވެ. ހަވީރު ކުޅެވުނު ފިރހެން ޑިވިޜަންގައި ކާމިޔާބު ނުލިބުނު ނަމަވެސް އަންހެން ޑިވިޜަން ކާމިޔާބު ކުރުމުގެ ބޮޑު އުއްމީދަކާއެކު ސެޓް ފެށިގެން ގިނަ ވަގުތު ލީޑްގައި ކުޅެމުން ދިއުމުން އެންމެވެސް ޤަބޫލުކުރީ ފީއަލިން ފ.އަތޮޅުގައި އެމީހުން ކުރަމުންއައި ރަނިކަން އަނެއްކާވެސް ދިފާޢު ކުރާނެ ކަމަށެވެ. އެހެން ނަމަވެސް ފީއަލިން ސެޓްގެ ފަހުކޮޅާއި ހަމައަށް ދަންދެން ލީޑް ކުރަމުން ދިޔަނަމަވެސް މަގޫދޫ ސެޓަރު މަޒިއްޔާގެ ރީތި ސެޓިންތަކާއެކު ކިއުބާގެ ޔަނިލަދިސްގެ ބާރު ޙަމަލާތައް ފީއަލީ ކޯޓުގައި ފެނުޖައްސާ ފުރަތަމަ ސެޓެކޭ އެއްގޮތަށް ސެޓްގެފޯރި ގަދަކޮށްލިއެވެ. ނަތީޖާއަކީ ފީއަލީ ޓީމު ހާސްކޮށްލުމަށްފަހު 27 – 25 އިން މަގޫދޫ ސެޓް ކާމިޔާބުކޮށް ނަތީޖާ ނެރުމަށް ޓައިބްރޭކަށް މެޗް ގެންދިއުމެވެ. ޓައިބްރޭކް ސެޓްގެ ކުޅުމުގައި ފުރަމަކޮޅު ފީއަލިން އިތުބާރާއެކު ކުޅެ ސެޓްގެ މެދުތެރެއަށް ދިޔައިރު 4 ޕޮއިންޓްގެ ލީޑެއްވަނީ ނަގާފައެވެ. ނަމަވެސް ކޯޓް ޗޭންޖްވުމަށްފަހު އަނެއްކާވެސް ފެނުނީ މަގޫދޫން ތަފާތު ރޫޙެއްގައި ކުޅެ ފީއަލީގެ މައްޗަށް ގަދަވެގެން ދިޔަ މަންޒަރެވެ. މުޅިމެޗްގައިވެސް އިތުބާރާއެކު ކުޅެމުންދިޔަ ޔަނިލަދީސްގެ މޮޅު ކުޅުމާއެކު 15 – 12 އިން ސެޓް ކާމިޔާބުކޮށް މުބާރާތުގެ ފިރިހެން ޑިވިޜަނެކޭ އެއްފަދައިން އަންހެން ޑިވޜަންގައިވެސް އަތޮޅުގައި ފީއަލި ކުރަމުންއައި ރަނިކަން ނިމުމަކަށްގެނެސް މަގޫދޫން ތާރީޚީ ކާމިޔާބެއް ހޯދުމެވެ.

ފައިނަލްމެޗް ނިމުމުން މުބާރާތުގެ އެކިވަނަވަނަ ހޯދިކުޅުންތެރިންނަށާއި ޓީމުތަކަށް ޓްރޮފީއާއި ހަނދާނީ ލިއުން އަދި ފައިސާގެ ޢިނާމުވަނީ ޙަވާލުކޮށްފައެވެ. ފައިނަލްމެޗްގެ މޮޅު ކުޅުންތެރިއަކަށް ހޮވުނީ މަގޫދޫގެ ޔަނިލަދީސް ސަންޗޭޒްއެވެ. މުބާރާތުގެ މޮޅު 6 ކުޅުންތެރިންނަށް ހޮވުނީ ފީއަލީގެ ޢައިޝަތު ރީމާއާއި މަގޫދޫގެ ޒުނީތާއާއި ދަރަނބޫދޫގެ ޠޮހޫރާއާއި ފީއަލީގެ އިބާ ޢަބްދުﷲއާއި މަގޫދޫގެ މަޒިއްޔާގެ އިތުރުން ފީއަލީގެ ރިފްދާއެވެ. އެންމެ މޮޅު ލިބެރޯ ކުޅުންތެރިއަކަށް ހޮވުނީ ދަރަނބޫދޫގެ ޝަހީބާއެވެ. 21 އަހަރުން ދަށުގެ އެންމެ އުއްމީދީ ކުޅުންތެރިޔާއަކަށް ފީއަލީގެ އިބާ ޢަބްދުﷲ ހޮވުނު އިރު މުޅި މުބާރާތުގެ އެންމެ މޮޅު ދިވެހި ކުޅުންތެރިއަކަށް ހޮވުނީ މަގޫދޫގެ މަޒިއްޔާއެވެ. އެންމެ މޮޅު ބޭރު ކުޅުންތެރިއަކަށް ހޮވުނީ މަގޫދޫގެ ޔަނިލަދީސް ސަންޗޭޒްއެވެ. ޓީމަށް އެންމެ ފައިދާ ހޯދަދިން ކޯޗަކަށް މަގޫދޫގެ ކޯޗް ޝުޢައިބު އަޙުމަދު ހޮވުނުއިރު ފެއާރޕްލޭ ޓީމަކަށް ހޮވުނީ ދަރަނބޫދޫ ކައުންސިލްގެ ޓީމެވެ. ރަނަރަޕް ޓީމަށް ހޮވުނު ފީއަލީ ކައުންސިލަށް ހަނދާނީ ލިއުމާއި ފައިސާގެ ޢިނާމާއި މެޑަލް ޙަވާލު ކޮށްދެއްވީ ފ.އަތޮޅު ކައުންސިލްގެ ރައީސް ޢަލީ މުޙައްމަދެވެ. ޗެމްޕިއަންކަން ހޯދި މަގޫދޫ ކައުންސިލްގެ ޓީމަށް ޓްރޮފީއާއި ހަނދާނީ ލިއުމާއި މެޑަލް އަދި ފައިސާގެ ޢިނާމު ޙަވާލުކޮށްދެއްވީ ފައިނަލްމެޗްގެ ޝަރަފްވެރި މެހެމާނު ނިލަންދޫޫ ދާއިރާގެ ޢިއްޒަތްތެރި މެމްބަރު ޢަބްދުލް މުޙުސިން ހަމީދެވެ.

ގިނަފަރާތްތަކެއް އެހީތެރިކަމާއެކު އަތޮޅު ކައުންސިލުން އިންތިޒާމުކޮށްގެން ކުރިއަށް ގެންދިޔަ މިމުބާރާތަކީ އިންތިޒާމުތައް ވަރަށް ރަނގަޅު މުބާރާތެއް ގޮތުގައި ފާހަގަވެގެންދިޔަ މުބާރާތެކެވެ. މުބާރާތުގެ ކޯސްޕޮންސަރގެ ގޮތުގައި ރިއަލްޖާރޒީ ޙަރަކާތްތެރިވިއިރު މީޑިއާ ޕާޓްނަރަކީ ދަނިއުސްއެވެ. ޓެކްނިކަލީ ހުރިހާ އެހީތެރިކަމެއް ފ.ޕޮލިސް ކްލަބުން ހަމަޖައްސައި ދީފައިވާއިރު ފ.އަތޮޅު ހޮސްޕިޓަލުންވެސްވަނީ މުބާރާތް ހިންގުމުގައި ވަރަށް ބޮޑު އެހީތެރިކަމެއް ފޯރުކޮށްދީފައެވެ. ހަމަ އެހެންމެ ނިލަންދޫ ކައުންސިލުންވެސްވަނީ މުބާރާތް އިންތިޒާމު ކުރުމުގައި އަތޮޅު ކައުންސިލަށް ފުރިހަމަ އެހީތެރިކަމެއް ވެދީފައެވެ.

މުބާރާތުގެ ނިމުން ފާހަގަކުރުމަށް ބޭއްވި ރަސްމިއްޔާތުގައި އަތޮޅު ކައުންސިލުންވަނީ އަންނަ އަހަރުވެސް ފުރިހަމަ އިންތިޒާމުތަކާއެކު މިފަދަ މުބާރާތެއް އަތޮޅުގައި ކުރިއަށް ގެންދާނެކަމަށް އިޢުލާނުކޮށްފައެވެ.