ފ.އަތޮޅު ކައުންސިލުން އިންތިޒާމުކޮށްގެން ފ.އަތޮޅުގެ ރަށްތަކަށް ހުޅުވާލައިގެންބާއްވާ ވޮލީބޯޅަ މުބާރާތުގެ ފިރިހެން ޑިވިޜަންގެ ފައިނަލްގައި ފީއަލީ ކައުންސިލާއި ނިލަންދޫ ކައުންސިލް ވާދަކޮށް ފ.އަތޮޅުގައި ފީއަލީން ކުރަމުން އައި ރަސްކަން ނިންމާ ނިލަންދޫން ތާރީޚީ ކާމިޔާބެއް ހޯދައިފިއެވެ. މިއަދު ހަވީރު ކުޅެވުނު ފައިނަލް މެޗް ސީދާ 3 ސެޓުން ކާމިޔާބުކޮށް ނިލަންދޫންވަނީ މުބާރާތުގެ ފިރިހެން ޑިވިޜަންގެ ޗެމްޕިއަންކަން ހޯދާފައެވެ.

ނިލަންދޫ އިޖުތިމާޢީ މަރުކަޒުގައި ތަރައްޤީކޮށްފައިވާ އައުޓްޑޯރ ވޮލީކޯޓުގައި ކުރިއަށްދިޔަ މެޗްގައި ފައިނަލުގައި ވާދަކުރި 2 ޓީމުގެ ސަޕޯޓަރުންގެ އިތުރުން އަތޮޅުގެ އެހެން ރަށްރަށުން މެޗްބަލާލުމަށް އައިސްތިބި އެތައްބައެއްގެ ކުރިމަތީގައި ކުޅެވުނު ފައިނަލް މެޗްގެ ފުރަތަމަ ސެޓްގައި ނިލަންދޫން އަބަދުވެސް ދިޔައީ 2 ޕޮއިންޓްގެ ލީޑެއްގައި ކުޅެމުންނެވެ. ސެޓުގެ ފަހުކޮޅު ފީއައްޔަށް ހެދުނު ގޯސްތަކުގެ ފައިދާ ނަގާ ނިލަންދޫން މިސެޓް ކާމިޔާބުކުރީ 25 – 20 އިންނެވެ. ފުރަތަމަ ސެޓާއި ޚިލާފަށް 2 ވަނަ ސެޓް ފެށުމާއެކު ފީއަލިން ރަނގަޅު ލީޑެއް ހޯދިއެވެ. މިސެޓްގެ 20 ޕޮއިންޓާއި ހަމައަށް ދަންދެންވެސް ފީއަލިން ދިޔައީ ލީޑު ކުރަމުންނެވެ. އެހެން ނަމަވެސް ކުރީސެޓެކޭ އެއްގޮތަށް ސެޓުގެ ފަހުކޮޅު މުޅިޓީމުގެ ފަރާތުން ގިނަ މިސްޓޭކްތަކެއް ހެދުމުގެ ނަތީޖާއަކީ ނިލަންދޫއަށް ކުޅޭ ގަގަންގީތުއާއި ޔާނިޢުގެ ބާރު ޙަމަލާތަކާއެކު ކުރިއަށް ދެމިގަނެ 25 – 22 އިން ސެޓް ކާމިޔާބުކޮށް ބޮޑު އުއްމީދެއް ހޯދުމެވެ. ނަތީޖާއެއްގެ ގޮތުން 3 ވަނަ ސެޓުގައި ނިލަންދޫން އިތުބާރާއެކު ކުޅެ ފީއަލީ މުޅިޓީމު ހާސްކަމެއްގެ ތެރޭގައި ބޭއްވުމަށްފަހު 25 – 21 އިން ސެޓް ކާމިޔާބުކޮށް މުބާރާތުގެ ޗެމްޕިއަންކަން ނިލަންދޫން ކަށަވަރުކުރިއެވެ. ފ.އަތޮޅުގައި ވޮލީގެ މިފަދަ މުބާރާތެއް ނުބާއްވާތާ ދުވަސްތަކެއްވުމަށްފަހު މުބާރާތެއް ބޭއްވިއިރު މީގެކުރިން އަބަދުވެސް ފީއައްޔަކީ ފ.އަތޮޅުގެ ޗެމްޕިއަނުންކަމުގައިވީނަމަވެސް މިމުބާރާތް ކާމިޔާބުކޮށް ނިލަންދޫމިވަނީ ތާރީޚު ބަދަލުކޮށްފައެވެ.

ފައިނަލްމެޗް ނިމުމުން މުބާރާތުގެ އެކިވަނަވަނަ ހޯދިކުޅުންތެރިންނަށާއި ޓީމުތަކަށް ޓްރޮފީއާއި ހަނދާނީ ލިއުން އަދި ފައިސާގެ ޢިނާމުވަނީ ޙަވާލުކޮށްފައެވެ. ފައިނަލްމެޗްގެ މޮޅު ކުޅުންތެރިއަކަށް ހޮވުނީ ނިލަންދޫޓީމުގައި ހިމެނޭ އިންޑިއާގެ ގަގަންގީތު ސިންގއެވެ. މުބާރާތުގެ މޮޅު 6 ކުޅުންތެރިންނަށް ހޮވުނީ ނިލަންދޫ ޓީމުގެ ޝިރުހާން ޢަބްދުއް ސައްތާރުއާއި ފީއަލީ ޓީމުގެ ޢާލިމް އިބްރާހިމްއާއި ނިލަންދޫ ޓީމުގެ ފަރުޙާދު އިސްމާޢީލްއާއި  މަގޫދޫ ޓީމުގެ މުޙައްމަދު ޢަރީފްއާއި ނިލަންދޫ ޓީމުގެ އިބްރާހިމް ނަދީމްއާއި ނިލަންދޫ ޓީމުގެ ޔާނިޢު ޢަބްދުﷲއެވެ. އެންމެ މޮޅު ލިބެރޯ ކުޅުންތެރިއަކަށް ހޮވުނީ ފީއަލީ ޓީމުގެ މުޙައްމަދު އާދަމްއެވެ. 21 އަހަރުން ދަށުގެ އެންމެ އުއްމީދީ ކުޅުންތެރިޔާއަށާއި މުޅި މުބާރާތުގެ އެންމެ މޮޅު ދިވެހި ކުޅުންތެރިއަކަށް ހޮވުނީ ނިލަންދޫ ޓީމުގެ ޔާނިޢު ޢަބްދުﷲއެވެ. އެންމެ މޮޅު ބޭރު ކުޅުންތެރިއަކަށް ހޮވުނީ ނިލަންދޫ ޓީމުގެ ގަގަންގީތު ސިންގއެވެ. ޓީމަށް އެންމެ ފައިދާ ހޯދަދިން ކޯޗަކަށް ހޮވުނީ ނިލަންދޫ ޓީމުގެ ކޯޗް މުޙައްމަދު ރިޝްވާނު (ރިއްޗަޅޭ)އެވެ. ފެއާރޕްލޭ ޓީމަކަށް ހޮވުނީ މަގޫދޫ ކައުންސިލްގެ ޓީމެވެ.

މި މުބާރާތުގެ ރަނަރަޕް ޓީމަށް ހޮވުނު ފީއަލީ ކައުންސިލަށް ހަނދާނީ ލިއުމާއި ފައިސާގެ ޢިނާމާއި މެޑަލް ޙަވާލު ކޮށްދެއްވީ ފ.އަތޮޅު ކައުންސިލްގެ ރައީސް ޢަލީ މުޙައްމަދެވެ. ޗެމްޕިއަންކަން ހޯދި ނިލަންދޫ ކައުންސިލްގެ ޓީމަށް ޓްރޮފީއާއި ހަނދާނީ ލިއުމާއި މެޑަލް އަދި ފައިސާގެ ޢިނާމު ޙަވާލުކޮށްދެއްވީ ފައިނަލްމެޗްގެ ޝަރަފްވެރި މެހެމާނު ނިލަންދޫ ދާއިރާގެ ޢިއްޒަތްތެރި މެމްބަރު ޢަބްދުލް މުޙުސިން ހަމީދެވެ.

މިރޭ ކުޅެވޭ އަންހެން ޑިވިޜަންގެ ފައިނަލްގައި ވާދަކުރާނީ މަގޫދޫ ކައުންސިލްގެ ޓީމާއި ފީއަލީ ކައުންސިލްގެ ޓީމެވެ.