ފ.އަތޮޅު ކައުންސިލުން އިންތިޒާމުކޮށްގެން ފ.އަތޮޅުގެ ރަށްތަކަށް ހުޅުވާލައިގެންބާއްވާ ވޮލީބޯޅަ މުބާރާތުގައި މިއަދު ހަވީރު މަގޫދޫއާއިއެކު ކުޅުނު މެޗް ވާދަވެރި ކުޅުމަކަށްފަހު ފަހަތުން އަރާ 3 ސެޓް 1 ސެޓުން ކާމިޔާބުކޮށް ފައިނަލްގެ ފަހު ޖާގަ ފީއަލިން ކަށަވަރުކޮށްފިއެވެ.
2 ރަށުގެ ކުދިބޮޑު ގިނަޢަދަދެއްގެ ސަޕޯޓަރުންގެ ތަރުޙީބާއެކު ހަވީރު ކުޅެވުނު މެޗްގެ ފުރަތަ ސެޓް ހަމަހަމަ ކުޅުމަކަށްފަހު 25 – 23 އިން ކާމިޔާބުކުރީ މަގޫދޫއެވެ. 2 ވަނަ ސެޓްގައިވެސް ދެޓީމުގެ ފަރާތުން ބާރުޙަމަލާތަކާއި އެޙަމަލާތައް ބްލޮކްކުރުމުގައި ހުނަރުވެރިކަން ދައްކަމުންގޮސް ވާދަވެރި ބަލާހިތްވާ ރީތި ކުޅުމަކަށްފަހު 26 – 24 އިން ސެޓް ކާމިޔާބު ކުރީ ފީއައްޔެވެ. މިސެޓް ކާމިޔާބު ކުރުމުގައި ފީއައްޔަށް ކުޅޭ އިންޑިއާގެ މަނާރާގެ ކުޅުން ވަރަށް ބޮޑަށް ފާހަގަވެގެން ދިޔައިރު ފުރަތަމަ މެޗަށްފަހު ޓީމާއި ގުޅުނު ހަސަން އަކްރަމާއި މިއަދުގެ މެޗަށް ޓީމާއި ގުޅުނު ޝާހުގެ ކުޅުންވެސް ވަރަށްބޮޑަށް ފާހަގަވިއެވެ. ހަމައެހެންމެ ފީއަލީގެ ލިބެރޯ ކުޅުންތެރިޔާ މުޙައްމަދު އާދަމް (ރިޔާ) ގެ ހުނަރިވެރިކަންވެސް ވަރަށް ބޮޑަށް ފެނިގެން ދިޔައެވެ. 3 ވަނަ ސެޓް ފަށައިގެން މަގޫދޫ އަށް ކުޅޭ ލަންކާގެ ކަވިޝްކާ މަދުޝަންކާގެ ބާރުޙަމަލާތަކާއެކު ސެޓްގެ މެދާއިހަމައަށް މަގޫދޫން ދިޔައީ ލީޑް ކުރަމުންނެވެ. އެހެން ނަމަވެސް ފަހުކޮޅު ގާތްގާތުގައި ކުޅުންތެރިންނަށް ހެނދުނު ގޯސްތަކުގެ ފައިދާ ނަގާ 25 -23 އިން ސެޓް ކާމިޔާބުކޮށް ފައިނަލްގެ އުއްމީދު ފީއަލިން އާކުރިއެވެ. 4 ވަނަ ސެޓްގައިވެސް ކުރީސެޓެކޭ އެއްގޮތަށް ސެޓްގެ ކުރީކޮޅު މަގޫދޫން ލީޑުގައި ކުޅެމުން ދިޔަނަމަވެސް މެދުތެރެއިން ލީޑްގެއްލި ޓީމަށް ހެދުނު ގިނަ ގޯސްތަކާއެކު 25 – 22 އިން ސެޓް ކާމިޔާބުކޮށް އަންހެން ޓީމެކޭ އެއްފަދައިން ފީއަލީ ފިރިހެން ޓީމުވެސް މުބާރާތުގެ ފައިނަލުން ޖާގަހޯދިއެވެ. މެޗްގެ މޮޅު ކުޅުންތެރިއަކަށް ހޮވުނީ ފީއަލީގެ އިންޑިއާ ކުޅުންތެރިޔާ ޢާޞިފްއެވެ.
މިރޭ ކުޅެވުނު އަންހެން ޑިވިޜަނުގެ މެޗަށް ނުކުތްއިރުވެސް މުބާރާތުގެ ފައިނަލްގައި ވާދަކުރާނެ ޓީމުތައް ކަށަވަރުވެފައިވުމާއެކު މާބޮޑު ފޯރިއެއްނެތި ކުޅެވުނު މެޗް ފަސޭހަކަމާއެކު ކާމިޔާބުކުރީ ކުރިން ފައިނަލްގެ ޖާގައެއް ހޯދާފައިވާ ފީއަލީ ކައުންސިލްގެ ޓީމެވެ. ފުރަތަމަ ސެޓް 25 – 18 އިން އަދި ދެވަނަ ސެޓް 25 – 14 އިން ކާމިޔާބުކޮށް ކޯޗް ސުނާނު ޓީމަށް ގެނައި ގިނަ ބަދަލުތަކާއެކު ފަހުސެޓް ފީއަލީން ކާމިޔާބުކުރީ 25 – 17 އިންނެވެ. މެޗްގެ މޮޅު ކުޅުންތެރިއަކަށް ހޮވުނީ ފީއަލީގެ ކުތިކާއެވެ.
މުބާރާތުގެ 2 ޑިވިޜަންގެ ފައިނަލް މެޗް ބުދަ ދުވަހު ކުޅުމަށް ހަމަޖެހިފައިވާއިރު ހަވީރު ކުޅެވޭ ފިރިހެން ޑިވިޜަންގެ ފައިނަލްގައި ވާދަކުރާނީ ނިލަންދޫ ކައުންސިލްގެ ޓީމާއި ފީއަލީ ކައުންސިލްގެ ޓީމެވެ. އަދި ރޭގަނޑު ކުޅެވޭ އަންހެން ޑިވިޜަންގެ ފައިނަލްގައި ވާދަކުރާނީ މަގޫދޫ ކައުންސިލްގެ ޓީމާއި ފީއަލީ ކައުންސިލްގެ ޓީމެވެ.
ފ.އަތޮޅުގައި ވޮލީ ދިރުވާ އާލާކޮށް ހުނަރުވެރި ކުޅުންތެރިންތަކެއް އުފެއްދުމުގެ މަޤުޞަދުގައި ފ.އަތޮޅު ކައުންސިލުން އިސްނަގައިގެން ފެށި މިމުބާރާތުގައި ފ.އަތޮޅުގެ 5 ރަށުގެ ތެރެއިން ބިލެތްދޫ ފިޔަވައި ކޮންމެ ރަށަކުންވެސް 2 ޑިވިރަންގައިވެސް ޓީމުތައްވަނީ ބައިވެރިކޮށްފައެވެ.
