ފ.އަތޮޅު ކައުންސިލުން އިންތިޒާމުކޮށްގެން ފ.އަތޮޅުގެ ރަށްތަކަށް ހުޅުވާލައިގެންބާއްވާ ވޮލީބޯޅަ މުބާރާތުގައި މިއަދު ހަވީރު ދަރަނބޫދޫ އަތުން ހޯދި ފަސޭހަ މޮޅާއެކު ފިރިހެން ޑިވިޜަންގެ ފައިނަލުގެ ފުރަތަމަ ޖާގަ ނިލަންދޫން ޔަޤީންކުރިއިރު އަންހެން ޑިވިޜަންގެ ފައިނަލުގައި ވާދަކުރާނީ މަގޫދޫއާއި ފީއަލި ކަމުގައި ހަމަޖެހިއްޖެއެވެ.
ހަވީރު ކުޅެވުނު ނިލަންދޫއާއި ދަރަނބޫދޫ މެޗް ފަސޭހަކާމާއެކު ސީދާ 3 ސެޓުން ކާމިޔާބުކޮށް ނިލަންދޫވަނީ ގްރޫޕް ސްޓޭޖްގައި ކުޅުން 3 މެޗްވެސް ކާމިޔާބުކޮށްފައެވެ. މެޗްގެ ފުރަތަމަ ސެޓް 25 – 7 އިން ކާމިޔާބު ކުރިއިރު 2 ވަނަ ސެޓް ކާމިޔާބު ކުރީ 25 – 8 އިންނެވެ. އަދި ފަހުސެޓް ކާމިޔާބު ކުރީ 25 – 16 އިންނެވެ. މެޗްގެ ފުރަތަމަ ސެޓަށްފަހު ނިލަންދޫންވަނީ ގިނަ ބަދަލުތަކެއް ގެނެސްފައެވެ. މެޗްގެ މޮޅު ކުޅުންތެރިއަކަށް ހޮވުނީ ނިލަންދޫ ޓީމަށް ކުޅޭ ޝިރުހާނު ޢަބްދުއް ސައްތާރުއެވެ. ނިލަންދޫއާއިއެކު ފިރިހެން ޑިވިޜަންގެ ފައިނަލްގައި ވާދަކުރާނެ ޓީމެއް ކަނޑައެޅޭނީ 15 ވަނަ ދުވަހު ކުޅެވޭ ފިރިހެން ޑިވިޜަންގެ ގްރޫޕް ސްޓޭޖް ފަހުމެޗަށްފަހުއެވެ. އެމެޗްގައި ވާދަކުރާނީ ފީއައްޔާއި މަގޫދޫއެވެ. އެމެޗް ކާމިޔާބުކުރާ ޓީމަކަށް ފައިނަލްގެ ފަހު ޖާގަ ލިބިގެންދާނެއެވެ.
މިރޭ ކުޅެވުނު އަންހެން ޑިވިޜަނުގެ މެޗް ހީކުރެވުނު ގޮތާއި ޚިލާފަށް މަގޫދޫން ދަރަނބޫދޫގެ މައްޗަށް ކުރި ހޯދީ މާބޮޑު ވާދަވެރިކަމެއްނެތިއެވެ. ސީދާ 3 ސެޓުން މަގޫދޫ ކާމިޔާބުކޮށް ފައިނަލުން ފުރުޞަތު ހޯދިއިރު މެޗްގެ ފުރަތަމަ ސެޓްގެ މެދަކާއި ހަމައަށް ދިޔައިރު ދެޓީމުގެ ފަރާތުން ހަމަހަމަ ކުޅުމެއް ފެނުނު ކަމުގައިވީނަމަވެސް ސެޓްގެ މެދުތެރެއިން މަގޫދޫ ޓީމަށް ކުޅޭ ކިއުބާގެ ޔަނިލަދީސްގެ މޮޅުކުޅުމާއެކު މަގޫދޫން ނެގި ލީޑު ހިފަހައްޓާ ސެޓް ކާމިޔާބު ކުރީ 25 – 21 އިންނެވެ. ފުރަތަމަ ސެޓެކޭ އެއްފަދައިން 2 ވަނަ ސެޓްގައިވެސް ފުރަތަމަކޮޅު 2 ޓީމުގެ ފަރާތުން ހަމަހަމަކުޅުމެއް ފެނުނު ނަމަވެސް ވަކިހިސާބަކުން މަގޫދޫން ނެގި ލީޑް ހިފަހައްޓާ ސެޓް ކާމިޔާބުކުރީ 25 – 18 އިންނެވެ. ކުރިން ކުޅެވުނު މެޗްތަކާއި ޚިލާފަށް ދަރަނބޫދޫ ޓީމުގައި ހިމެނޭ ޔުކުރެއިންގެ ކުޅުންތެރިއާ ޖޫލިއާއަށް އެދެވޭ ކުޅުމެއް ނުދެއްކުމުގެ ނަތީޖާއަކީ 3 ވަނަ ސެޓް 25 – 16 އިން މަގޫދޫ ކާމިޔާބުކޮށް ފައިނަލްގެ ޖާގައެއް ކަށަވަރު ކުރުމެވެ. މިމެޗް މަގޫދޫ ކާމިޔާބު ކުރުމާއި ގުޅިގެން ފައިނަލުގެ އަނެއްޖާގަ ލިބުނީ ކުރިން ކުޅުނު 2 މެޗް ކާމިޔާބުކޮށްފައިވާ ފީއައްޔަށެވެ. މެޗްގެ މޮޅު ކުޅުންތެރިއަކަށް ހޮވުނީ މަގޫދޫގެ ޔަނިލަދިސް ސަންޗޭޒްއެވެ.
މާދަމާ ރޭ ކުޅެވޭ އަންހެން ޑިވިޜަންގެ ފަހުމެޗްގައި ވާދަކުރާނީ މުބާރާތުގައި ކުރިއަށް ދިއުމުގެ ފުރުޞަތު ގެއްލިފައިވާ ނިލަންދޫ ކައުންސިލްގެ އަންހެން ޓީމާ ފައިނަލުން ފުރުޞަތު ލިބިފައިވާ ފީއަލީ ކައުންސިލްގެ އަންހެން ޓީމެވެ.
ފ.އަތޮޅުގައި ވޮލީ ދިރުވާ އާލާކޮށް ހުނަރުވެރި ކުޅުންތެރިންތަކެއް އުފެއްދުމުގެ މަޤުޞަދުގައި ފ.އަތޮޅު ކައުންސިލުން އިސްނަގައިގެން ފެށި މިމުބާރާތުގައި ފ.އަތޮޅުގެ 5 ރަށުގެ ތެރެއިން ބިލެތްދޫ ފިޔަވައި ކޮންމެ ރަށަކުންވެސް 2 ޑިވިރަންގައިވެސް ޓީމުތައްވަނީ ބައިވެރިކޮށްފައެވެ.
މިމަހު 10 ވަނަ ދުވަހުން ފެށިގެން މިމަހު 16 ވަނަ ދުވަހުގެ ނިޔަލަށް ނިލަންދޫ ވޮލީކޯޓްގައި ކުރިއަށްދާ މިމުބާރާތުގެ ކުޅުން ކުރިއަށް ގެންދިއުމަށް ހަމަޖެހިފައިވަނީ ކޮންމެ ޑިވިޜަނެއްގައި ކޮންމެ ޓީމެއް ކޮންމެ ޓީމަކާއި ވާދަކުރުމަށްފަހު އެންމެ ގިނަ ޕޮއިންޓް ހޯދާ ދެޓީމު ފައިނަލަށް ދާގޮތަށެވެ. މުބާރާތުގެ ކޮންމެ ޑިވިޜަނެއްގެވެސް ޗެމްޕިއަން ޓީމަށް އަތޮޅު ކައުންސިލުން 20 ހާސްރުފިޔާގެ ފައިސާގެ ޢިނާމު ވަނީ ހުށަހަޅާފައެވެ. މިމުބާރާތުގެ ކޯ ސްޕޮންސަރއަކީ ރިއަލް ޖާރޒީއެވެ. މުބާރާތުގެ މީޑިއާ ޕާޓްނަރަކީ ދަނިއުސްއެވެ. މުބާރާތުގެ ހުރިހާ މެޗެއް ދަނިއުސްއިން ފޭސްބުކު ލައިވް ކުރާގޮތަށް ވަނީ ހަމަޖެހިފައެވެ. މުބާރާތުގެ ޓެކްނިކަލް ހުރިހާ އެހީތެރިކަމެއް ފ.ޕޮލިސް ކްލަބުން ފޯރުކޮށްދެމުންދާއިރު ފ.އަތޮޅު ހޮސްޕިޓަލުންވެސްދަނީ ވަރަށް ފުރިހަމަ އެހީތެރިކަމެއް މުބާރާތަށް ފޯރުކޮށްދެމުންނެވެ.
