ފ. އަތޮޅުގެ ރަށްތަކަށް އަމާޒުކޮށްގެން މިހާރު ނިލަންދޫގައި ކުރިއަށް ގެންދާ ފ. އަތޮޅު ވޮލީ މުބާރާތަށް މަގޫދޫއިން ތައްޔާރުވެފައިވަނީ ވަރަށް ރަނގަޅަށް ކަމުގައި ފ. މަގޫދޫ ކައުންސިލްގެ ރައީސް ޢަބްދުﷲ ވަޙީދު ވިދާޅުވެއްޖެއެވެ.

ރަށްރަށުގެ ކައުންސިލްގެ ނަމުގައި ބައިވެރިވެވޭ މިމުބާރާތަށް ކުޅުންތެރިން ޓީމުގައި ހިމަނަނީ މުޅިރަށުން ފާހަގަ ކޮށްލެވޭ ކުޅުންތެރިން ކަމުގައިވާއިރު، ޓީމު ސްކޮޑަށް ކުޅުންތެރިން ހަމަޖެއްސުމަށް ދަތިކަމެއް ކުރިމަތި ވެފައިނުވާކަމަށް ވަހީދު ވަނީ ފާހަގަކުރައްވާފައެވެ. އެގޮތުން ކުޅިވަރުގައި ރަށް ތަމްސީލުކުރުމަށް ކުޅިވަރު ކުޅޭ ޓީމުތަކާއި ކުޅުންތެރިންގެ ފުރިހަމަ އެއްބާރުލުން އަބަދުވެސް ކައުންސިލަށް ލިބެމުން އަންނަކަން ފާހަގަކުރެއްވިއެވެ.

އެގޮތުން ޓީމަށް ގެނެސްފައިވާ ކޯޗަކީވެސް އިންޓަރ ސްކޫލް މުބާރާތްތަކުންނާއި އެހެނިހެން މުބާރާތްތަކުންވެސް ޤައުމީ ފެންވަރުގައި ފާހަގަކޮށްލެވޭ ކޯޗެއްކަމަށާއި، ރާއްޖެއިން ބޭރަށް ކުރަން ނިންމާފައިހުރި މުހިންމު ދަތުރުތަކެއް ފަސްކުރުމަށްފަހު، މަގޫދޫ ޓީމަށް އައިސްފައިވާތީ ކައުންސިލާއި ރައްޔިތުންގެ ނަމުގައި ކޯޗަށް ޝުކުރު އަދާކުރާކަމުގައެވެ. ހަމައެގޮތަށް ފިރިހެނުންގެ ޓީމަށް ގެނެވިފައިވަނީ ލަންކާގެ 21 އަހަރުން ދަށުގެ ޤައުމީ ޓީމުގައި މުހިންމު ދައުރެއް އަދާކުރާ ކުޅުންތެރިއެއްކަމަށާއި އަންހެނުންގެ ޓީމަށް ގެނެވިފައިވަނީ ބީޗް ވޮލީގައި ދުނިޔޭގެ ރޭންކިންގ ގައިވެސް ފާހަގަކޮށްލެވޭ ކިއުބާގެ ހުނަރުވެރި ކުޅުންތެރިއެއްކަމުން، މުބާރާތަށް ވެވިފައިވާ ތައްޔާރީތަކާއިމެދު ހިތްހަމަޖެހޭ ކަމަށެވެ. މި ފަރާތްތަކުގެ ތަޖުރިބާއާއި ހުނަރުގެ އަލީގައި މަގޫދޫ ކުޅުންތެރިން ވޮލީގައި ކުރިއެރުންތަކެއް ހޯދާފައިވާކަމަށް ވަހީދު ޤަބޫލުކުރައްވައެވެ.

މުބާރާތުގައި މަގޫދޫ ދެޓީމު ބައިވެރިވެފައިވާއިރު، ދެޓީމުގެ ކަންކަންވެސް ރަނގަޅަށް އިންތިޒާމްކުރެވިފައިވާކަމަށް ވަހީދު ވިދާޅުވިއެވެ. އެގޮތުން ބޮޑު ޚަރަދެއް ކައުންސިލުން ކުރަމުން އަންނައިރު އެކިއެކި ފަރާތްތަކުން ކައުންސިލަށް ވަރަށް ގިނަ ގޮތްގޮތަށް އެހީތެރިކަންވެސް ދެއްވާކަން ފާހަގަކުރެއްވިއެވެ. ޚާއްސަކޮށް ބިލެތްދޫ ދާއިރާގެ މަޖިލިސް މެމްބަރު އަޙްމަދު ޙަލީމާއި ، ރީޖަނަލް އެއާރޕޯޓްސް ކޮމްޕެނީގެ އިތުރުން މަގޫދޫ ވިޔަފާރިވެރިންގެ ފަރާތުން ޓީމަށް ވަރަށްބޮޑަށް އެއްބާރުލުން ލިބިފައިވާތީ އެފަރާތްތަކަށް ޝުކުރު އަދާކުރެއްވިއެވެ.

މިއީ އަތޮޅު ކައުންސިލުން ކުރިއަށް ގެންދާ މުބާރާތަކަށްވާއިރު، ކައުންސިލުން ހަމަޖައްސާފައިވާ އިންތިޒާމްތަކާއިމެދު ޖުމުލަ ގޮތެއްގައި ހިތްހަމަޖެހޭކަމަށާއި، ކޮންމެ ކަމެއްގައިވެސް އަބަދުވެސް ރަނގަޅު ކޮށްލަންޖެހޭ ކަންކަން ހުންނާނެކަން ފާހަގަކުރެއްވިއެވެ. އެގޮތުން އަތޮޅު ކައުންސިލުން ބާއްވާ އަތޮޅު ފެންވަރުގެ މުބާރާތްތައް ވާންޖެހޭނީ އަތޮޅުގެ ކުޅުންތެރިންގެ ފެންވަރު ދެއްކޭ މުބާރާތަކަށްކަމަށާއި ބިދޭސީ ކުޅުންތެރިން ޓީމުގައި ހިމަނަން ކުރިން ވަކާލާތުކޮށް ރުހުންވެސް ދިނިންކަމަށް ވަހީދު ވިދާޅުވިއެވެ. ނަމަވެސް، އެނިންމުން ކުރިއަށްހުރި މުބާރާތްތަކުގައި ބަދަލު ކުރަންޖެހޭކަމަށް މިހާރު ގަބޫލުކުރާކަމަށް ވިދާޅުވިއެވެ.

މުބާރާތާއި ގުޅިގެން ފަހުކަމެއްގެ ގޮތުގައި ފާހަގަކޮށްލަން ބޭނުންވަނީ މުބާރާތް ކަވަރުކުރުމަށް ދަނިއުސް ޓީމުން ކުރަމުން އަންނަ ބުރަ މަސައްކަތް ކަމަށާއި، ދަނިއުސްގެ މަސައްކަތަކުން މުބާރާތާއި ކުޅުންތެރިންގެ ފެންވަރު މުޅި ރާއްޖެއަށް ދައްކައިދީފައިވާކަން ފާހަގަކުރެއްވިއެވެ. އަދި ދާދި ފަހުން ނިމުނު މަގޫދޫ މުބާރާތުގައިވެސް ދަނިއުސް ޓީމުގެ މަސައްކަތް ގާތުން ފެނިފައިވާކަމަށާއި، ދަނިއުސްއަށް ކާމިޔާބީއާއި އިތުރު ކުރިއެރުންތައް ލިބުމަށް އެދޭކަމަށް ވަހީދު ވިދާޅުވިއެވެ.