ފ.އަތޮޅު ކައުންސިލުން އިންތިޒާމުކޮށްގެން ފ.އަތޮޅުގެ ރަށްތަކަށް ހުޅުވާލައިގެންބާއްވާ ވޮލީބޯޅަ މުބާރާތުގައި އަންހެން ޑިވިޜަންގައި މިރޭ ކުޅެވުނު މެޗް ފަސޭހަކަމާއެކު ސީދާ 3 ސެޓުން ދަރަނބޫދޫ ކާމިޔާބުކޮށްފިއެވެ. މިއާއެކު ދަރަނބޫދޫއާއި މަގޫދޫ ބައްދަލު ކުރާ މެޗްގެ ވާދަވެރިކަން މިވަނީ ބޮޑުވެފައެވެ.
ފުރަތަމަ ސެޓު ފަށައިގެން ނިލަންދޫގެ ކުޅުންތެރިންނަށް ޑިފެންސް އަދި ރިސީވްގައި ހެނދުނު ގިނަ ގޯސްތަކެއްގެ ފައިދާ ނަގައި ދަރަނބޫދޫން ސެޓްގެ ކުރީކޮޅު ބޮޑުލީޑެއްނެގިއެވެ. ނަތީޖާއަކީ ލީޑް ދަމަހައްޓާ 25 – 11 އިން ސެޓް ކާމިޔާބުކުރުމެވެ. އެހެން ނަމަވެސް 2 ވަނަ ސެޓްގައި ނިލަންދޫން ކުޅުން ރަނގަޅުކޮށް ގިނަ ވަގުތު ލީޑްވެސް ހިފެހެއްޓިއެވެ. ނަމަވެސް ސެޓްގެ މެދުތެރެއިން މަޑުމަޑުން ލީޑް ގެއްލެމުން ގޮސް ދަރަނބޫދޫން ލީޑް ނަގާ 25 – 21 އިން ސެޓްނިންމިއެވެ. 3 ވަނަ ސެޓް ފެށުނީއްސުރެ ދަރަނބޫދޫން ލީޑު ހިފަހައްޓައިގެން ކުޅުން ނަމަވެސް ފަހުވަގުތު ކޯޗް ޞޮފްވާނު ގެނައި ގިނަ ބަދަލުތަކާއެކު މިސްޓޭކްތަކެއް ކުޅުންތެރިންނަށް ހެދި ނިލަންދޫން ޕޮއިންޓްތަކެއް ހޯދިނަމަވެސް ދަރަނބޫދޫން ސެޓް ނިންމީ 25 – 21 އިންނެވެ. މެޗްގެ މޮޅު ކުޅުންތެރިއަކަށް ހޮވުނީ މުޅިމެޗްގައިވެސް ގިނަ އެޓޭކްތަކެއްކޮށް ޕޮއިންޓްތަކެއް ހޯދަދިން ދަރަނބޫދޫގެ ޔުކުރެއިންގެ ކުޅުންތެރިޔާ ޖޫލިއާއެވެ.
މުބާރާތުގައި މާދަމާ ހަވީރު ކުޅޭ ފިރިހެން ޑިވިޜަންގެ މެޗުގައި ބައްދަލު ކުރާނީ ދަރަނބޫދޫ ކައުންސިލްގެ ޓީމާއި ނިލަންދޫ ކައުންސިލްގެ ޓީމެވެ. މިމެޗް ކާމިޔާބުކޮށް މިހާރުވެސް ފައިނަލްގެ ޖާގައެއް ހޯދުމުގެ ފަހި ފުރުޞަތެއް ލިބިފައިވާ ނިލަންދޫއަށް ފައިނަލްގެ ޖާގައެއް ކަށަވަރުކުރެވޭނެއެވެ. ހަމައެހެންމެ ރޭގަނޑު ކުޅޭ އަންހެން ޑިވިޜަންގެ މެޗްވެސް ކާމިޔާބު ކުރާ ޓީމަކަށް އަންހެން ޑިވިޜަންގެ ފައިނަލްގެ ޖާގައެއް ކަށަވަރުކުރެވޭނެއެވެ. އަންހެން ޑިވިޜަންގެ މެޗްގައި ބައްދަލު ކުރާނީ ދަރަނބޫދޫ ކައުންސިލްގެ ޓީމާއި މަގޫދޫ ކައުންސިލްގެ ޓީމެވެ.
ފ.އަތޮޅުގައި ވޮލީ ދިރުވާ އާލާކޮށް ހުނަރުވެރި ކުޅުންތެރިންތަކެއް އުފެއްދުމުގެ މަޤުޞަދުގައި ފ.އަތޮޅު ކައުންސިލުން އިސްނަގައިގެން ފެށި މިމުބާރާތުގައި ފ.އަތޮޅުގެ 5 ރަށުގެ ތެރެއިން ބިލެތްދޫ ފިޔަވައި ކޮންމެ ރަށަކުންވެސް 2 ޑިވިރަންގައިވެސް ޓީމުތައްވަނީ ބައިވެރިކޮށްފައެވެ.
މިމަހު 10 ވަނަ ދުވަހުން ފެށިގެން މިމަހު 16 ވަނަ ދުވަހުގެ ނިޔަލަށް ނިލަންދޫ ވޮލީކޯޓްގައި ކުރިއަށްދާ މިމުބާރާތުގެ ކުޅުން ކުރިއަށް ގެންދިއުމަށް ހަމަޖެހިފައިވަނީ ކޮންމެ ޑިވިޜަނެއްގައި ކޮންމެ ޓީމެއް ކޮންމެ ޓީމަކާއި ވާދަކުރުމަށްފަހު އެންމެ ގިނަ ޕޮއިންޓް ހޯދާ ދެޓީމު ފައިނަލަށް ދާގޮތަށެވެ. މުބާރާތުގެ ކޮންމެ ޑިވިޜަނެއްގެވެސް ޗެމްޕިއަން ޓީމަށް އަތޮޅު ކައުންސިލުން 20 ހާސްރުފިޔާގެ ފައިސާގެ ޢިނާމު ވަނީ ހުށަހަޅާފައެވެ. މިމުބާރާތުގެ ކޯ ސްޕޮންސަރއަކީ ރިއަލް ޖާރޒީއެވެ. މުބާރާތުގެ މީޑިއާ ޕާޓްނަރަކީ ދަނިއުސްއެވެ. މުބާރާތުގެ ހުރިހާ މެޗެއް ދަނިއުސްއިން ފޭސްބުކު ލައިވް ކުރާގޮތަށް ވަނީ ހަމަޖެހިފައެވެ. މުބާރާތުގެ ޓެކްނިކަލް ހުރިހާ އެހީތެރިކަމެއް ފ.ޕޮލިސް ކްލަބުން ފޯރުކޮށްދެމުންދާއިރު ފ.އަތޮޅު ހޮސްޕިޓަލުންވެސްދަނީ ވަރަށް ފުރިހަމަ އެހީތެރިކަމެއް މުބާރާތަށް ފޯރުކޮށްދެމުންނެވެ.
