ފ.އަތޮޅު ކައުންސިލުން އިންތިޒާމުކޮށްގެން ފ.އަތޮޅުގެ ރަށްތަކަށް ހުޅުވާލައިގެންބާއްވާ ވޮލީބޯޅަ މުބާރާތުގައި ފިރިހެން ޑިވިޜަންގައި މިއަދު ކުޅެވުނު މެޗް ދަރަނބޫދޫ އަތުން ހޯދި ފަސޭހަ މޮޅާއެކު މަގޫދޫން މުބާރާތުގައި ކުރިއަށް ދިއުމުގެ އުއްމީދު އާކޮށްފިއެވެ.
މެޗްގެ ފުރަތަމަ ޕޮއިންޓުން ފެށިގެންވެސް މަގޫދޫން ދިޔައީ ދަރަނބޫދޫގެ ކޯޓަށް ބާރު ޙަމަލާތަކެއް ފޮނުވަމުންނެވެ. ޚާއްޞަކޮށް މަގޫދޫ ޓީމަށް ކުޅޭ ސްރީލަންކާގެ ކަވިޝްކާ މަދުޝަންކާ ފޮނުވަމުން ދިޔަ ޙަމަލާތައް މައިތިރި ކުރުމުގައި ދަރަނބޫދޫއަށް އެއްވެސް ކަމެއް މުޅިމެޗްގައިވެސް ކުރެވުނުތަނެއް ނުފެނުނެވެ. ސެޓަކަށްފަހު ސެޓެއްގައި މަގޫދޫގެ ބާރުޙަމަލާތަކުގެ ނަތީޖާއަކީ ފުރަތަމަ ސެޓް 25 – 16 އިން ކާމިޔާބުކޮށް 2 ވަނަ ސެޓް 25 – 11 އިން ކާމިޔާބުކުރުމެވެ. އަދި ފަހު ސެޓް ފަސޭހަ ކަމާއެކު 25 – 08 އިން ކާމިޔާބުކުރުމެވެ. މިނަތީޖާއާއިއެކު ފިރިހެން ޑިވިޜަންގައި މަގޫދޫ އާއި ފީއަލި ވާދަކުރާމެޗަކީ މޮޅުވާ ޓީމަކަށް ފައިނަލްގެ ޖާގައެއް ޔަޤީން ވެގެންދާނެ މެޗެކެވެ.
މިއަދުގެ މެޗްގެ މޮޅު ކުޅުންތެރިއަކަށް ހޮވުނީ މަގޫދޫ ޓީމުގެ ކަވިޝްކާ މަދުޝަންކާއެވެ.
މުބާރާތުގައި މިރޭ ކުޅޭ އަންހެން ޑިވިރަންގެ މެޗްގައި ވާދަކުރާނީ ދަރަނބޫދޫ އާއި ނިލަންދޫގެ ޓީމެވެ.
ފ.އަތޮޅުގައި ވޮލީ ދިރުވާ އާލާކޮށް ހުނަރުވެރި ކުޅުންތެރިންތަކެއް އުފެއްދުމުގެ މަޤުޞަދުގައި ފ.އަތޮޅު ކައުންސިލުން އިސްނަގައިގެން ފެށި މިމުބާރާތުގައި ފ.އަތޮޅުގެ 5 ރަށުގެ ތެރެއިން ބިލެތްދޫ ފިޔަވައި ކޮންމެ ރަށަކުންވެސް 2 ޑިވިރަންގައިވެސް ޓީމުތައްވަނީ ބައިވެރިކޮށްފައެވެ.
މިމަހު 10 ވަނަ ދުވަހުން ފެށިގެން މިމަހު 16 ވަނަ ދުވަހުގެ ނިޔަލަށް ނިލަންދޫ ވޮލީކޯޓްގައި ކުރިއަށްދާ މިމުބާރާތުގެ ކުޅުން ކުރިއަށް ގެންދިއުމަށް ހަމަޖެހިފައިވަނީ ކޮންމެ ޑިވިޜަނެއްގައި ކޮންމެ ޓީމެއް ކޮންމެ ޓީމަކާއި ވާދަކުރުމަށްފަހު އެންމެ ގިނަ ޕޮއިންޓް ހޯދާ ދެޓީމު ފައިނަލަށް ދާގޮތަށެވެ. މުބާރާތުގެ ކޮންމެ ޑިވިޜަނެއްގެވެސް ޗެމްޕިއަން ޓީމަށް އަތޮޅު ކައުންސިލުން 20 ހާސްރުފިޔާގެ ފައިސާގެ ޢިނާމު ވަނީ ހުށަހަޅާފައެވެ. މިމުބާރާތުގެ ކޯ ސްޕޮންސަރއަކީ ރިއަލް ޖާރޒީއެވެ. މުބާރާތުގެ މީޑިއާ ޕާޓްނަރަކީ ދަނިއުސްއެވެ.
