ފ.އަތޮޅު ކައުންސިލުން އިންތިޒާމުކޮށްގެން ފ.އަތޮޅުގެ ރަށްތަކަށް ހުޅުވާލައިގެންބާއްވާ ވޮލީބޯޅަ މުބާރާތުގައި މިއަދު ހަވީރު ކުޅެވުނު ފިރިހެން ޑިވިޜަންގެ މެޗް ފޯރިގަދަ ކުޅުމަކަށްފަހު ފީއަލީގެ މައްޗަށް ނިލަންދޫން ކުރިހޯދައިފިއެވެ.

ދެރަށުގެ ގިނަ ޢަދަދެއްގެ ސަޕޯޓަރުންގެ ކުރިމަތީގައި ކުޅެވުނު މިމެޗަކީ މުބާރާތުގައި މިހާތަނަށް ފެނުނު އެންމެ ވާދަވެރި ކުޅުމެއް ފެނުނު މެޗެވެ. މެޗްފަށައިގެން ދެޓީމުގެ ފަރާތުން ހަމަހަމަ ކުޅުމެއް ކުޅެމުންގޮސް ސެޓްގެ މެދުތެރެއިން ނިލަންދޫ ޓީމަށް ގާތްގާތުގައި ހެނދުނު މިސްޓޭކުތަކުގެ ފައިދާ ނަގައި ފީއަލިން ނެގި 4 ޕޮއިންޓްގެ ލީޑާއެކު ސެޓް ނިންމާލީ 25 – 21 އިން ފީއަލީ ކުރި ހޯދައިގެންނެވެ. 2 ވަނަ ސެޓް ފަށައިގެން 2 ޓީމުގެ ފަރާތުންވެސް ބާރު ޙަމަލާތަކެއް ފެނިގެން ދިޔައިރު ދޭތެރެ ދޭތެރެއިން 2 ޓީމުވެސް ލީޑް ނަގަމުންގޮސް 23 – 21 އިން ފީއަލި ލީޑްގައި އޮއްވާ ނިލަންދޫއިން ކުޅުން ރަނގަޅުކޮށް 24 – 23 އިން ލީޑް ނެގިނަމަވެސް ނިންމަން ލިބުނު ފުރުޞަތުގައި ނުނިންމި ދިގުލައިގެން ގޮސް ނިލަންދޫއަށް ސެޓް ނިންމާލެވުނީ 27 – 25 އިންނެވެ. 3 ވަނަ ސެޓްގައިވެސް ދެޓީމުގެ ފަރާތުން ވާދަވެރި އަދި ފޯރިގަދަ ކުޅުމެއް ފެނުނުއިރު ފީއައްޔަށް ހެދުނު ގިނަ މިސްޓޭކްތަކުގެ ބޭނުންހިފާ ނިލަންދޫން ސެޓް ކާމިޔާބުކުރީ 25 – 22 އިންނެވެ. 4 ވަނަ ސެޓްގައި 2 ޓީމުގެ ސަޕޯޓަރުންގެ ތަރުޙީބުގެ އަޑާއެކު މުޅި ސަރަޙައްދު ގުގުމާލައިގެން ދިޔައިރު މުޅި ސެޓްގައިވެސް ނިލަންދޫން ދިޔައީ ފީއަލީގެ މައްޗަށް ލީޑްކުރަމުންނެވެ. ދޭތެރެދޭތެރެއިން ޕޮއިންޓަކަށް ކައިރިކޮށް އެއްވަރު ކުރިނަމަވެސް ފީއައްޔަށް ދިމާވި އެންމެ ބޮޑު މައްސަލައަކީ ކުޅުންތެރިންގެ ސާރވިސްތައް މިސްވެގެންދިއުމެވެ. ނަތީޖާއަކީ ސެޓްގެ ފަހުކޮޅު ނިލަންދޫން ނެގި ބޮޑު ލީޑާއެކު 25 އިން 21 އިން ސެޓް ނިންމާ ފައިނަލްގެ ފުރުޞަތު ނިލަންދޫއަށް ފަހިވެގެން ދިއުމެވެ.

މެޗްގެ މޮޅު ކުޅުންތެރިއަކަށް ހޮވުނީ މުޅިމެޗްގައިވެސް ހުރިހާ ޑިޕާޓްމަންޓެއްގައިވެސް ތަފާތު މޮޅު ކުޅުމެއް ދެއްކި ނިލަންދޫއަށް ކުޅޭ އިންޑިއާގެ ގަގަންގީތު ސިންގެވެ.

ފ.އަތޮޅުގައި ވޮލީ ދިރުވާ އާލާކޮށް ހުނަރުވެރި ކުޅުންތެރިންތަކެއް އުފެއްދުމުގެ މަޤުޞަދުގައި ފ.އަތޮޅު ކައުންސިލުން އިސްނަގައިގެން ފެށި މިމުބާރާތުގައި ފ.އަތޮޅުގެ 5 ރަށުގެ ތެރެއިން ބިލެތްދޫ ފިޔަވައި ކޮންމެ ރަށަކުންވެސް 2 ޑިވިރަންގައިވެސް ޓީމުތައްވަނީ ބައިވެރިކޮށްފައެވެ.