ފ.އަތޮޅު ކައުންސިލުން އަތޮޅުގެ ރަށްތަކަށް ހުޅުވާލައިގެން މިހާރު ކުރިއަށް ގެންދާ “ފ.އަތޮޅު ވޮލީ މުބާރާތް 2023” ގެ ދެވަނަ ދުވަހުގެ މެޗުތައް މިއަދު ކުޅެފިއެވެ. މުބާރާތުގެ ފިރިހެން އަދި އަންހެން ޑިވިޜަނުގައި މިއަދު ބައްދަލުކުރީ ނިލަންދޫ އަދި މަގޫދޫ ކައުންސިލްގެ ޓީމެވެ.. ފިރިހެން ޑިވިޜަނުގެ މެޗު ނިލަންދޫ އިން ކާމިޔާބުކުރިއިރު އަންހެން ޑިވިޜަނުގައި މޮޅުވީ މަގޫދޫ ޓީމެވެ.
މިއަދު ހަވީރު ކުޅެވުނު ފިރިހެން ޑިވިޜަންގެ މެޗްގެ ކުޅުންފެށިގެން ނިލަންދޫއަށް ހަމަޖެހި ނުލެވި އުޅެނިކޮށް މަގޫދޫ ޓީމުގައި ހިމެނޭ ސްރީލަންކާގެ ކަވިޝްކާއާއި މާއިދުގެ ބާރު ޙަމަލާތަކާއެކު ފުރަތަމަ ސެޓް މަގޫދޫން ކާމިޔާބު ކުރީ 25 – 19 އިންނެވެ. ފުރަތަމަ ސެޓްގެ ފަހުކޮޅަށް ދިޔައިރު ނިލަންދޫ ޓީމު ހަމައަކަށް އެޅުމުގެ ނަތީޖާ ފެނިގެންދިޔައީ 2 ވަނަ ސެޓުން ފެށިގެންނެވެ. އެގޮތުން 2 ވަނަ ސެޓްގައި ސެޓްގެ ކުރީކޮޅު ނެގި ބޮޑު ލީޑާއެކު ސެޓް ހޯދީ މަގޫއަށް 14 ޕޮއިންޓް ދީފައެވެ. ނިލަންދޫ ޓީމުގައި ހިމެނޭ އިންޑިއާގެ ގަގަންދީޕްގެ ބާރު ހަމަލާތަކާއި ކާމިޔާބު ބްލޮކްތަކަށް އިތުރު ފުރިހަމަ ކަމެއް ލިބިގެން ދިޔައީ ނިލަންދޫއަށް ކުޅޭ ދިވެހި ސިފައިންގެ ކްލަބްގައި ހިމެނޭ ޝިރުހާން ޢަބްދުއް ސައްތާރާއި ޒުވާން ހުނަރުވެރި ކުޅުންތެރިޔާ މުޙައްމަދު ޔާނިޢުގެ މޮޅުކުޅުމާއެކުއެވެ. އެގޮތުން 3 ވަނަ ސެޓްވެސް ފަސޭހަ ކަމާއެކު ނިލަންދޫން ކާމިޔާބުކުރީ 25 – 16 އިންނެވެ. އަދި ފަހު ސެޓްގައި 2 ޓީމުގެ ފަރާތުން ވާދަވެރި ކުޅުމެއް ފެނިގެން ދިޔަ އިރު ނިލަންދޫން ސެޓް ކާމިޔާބުކޮށް މެޗް ކާމިޔާބުކުރީ 25 – 22 އިންނެވެ. މެޗްގެ މޮޅު ކުޅުންތެރިއަކަށް ހޮވުނީ ނިލަންދޫ ޓީމުގައި ހިމެނޭ އިންޑިއާގެ ގަގަންދީޕް ސިންގްއެވެ.
މިރޭ ކުޅެވުނު އަންހެން ޑިވިޜަންގެ މެޗް ފަސޭހަކަމާއެކު ނިލަންދޫ މައްޗަށް ކުރިހޯދާ ކާމިޔާބުކުރީ މަގޫދޫ ޓީމެވެ. މުޅިމެޗްގައިވެސް މަގޫދޫ ފެނުނީ ތަފާތު ރޫޙެއްގައެވެ. ޚާއްޞަކޮށް މަގޫދޫ ޓީމުގައި ހިމެނޭ ކިއުބާގެ ކުޅުންތެރިޔާ ޔަނިލަދިސް ސަންޗޭޒްގެ ފަރާތުން މޮޅު ކުޅުމެއް ފެނިގެން ގޮސްފައިވެއެވެ. ފުރަތަމަ ސެޓް 25 – 15 އަދި 2 ވަނަ ސެޓް 25 – 17 އިން ކާމިޔާބުކުރުމުން 3 ވަނަ ސެޓްގައި ނިލަންދޫ ޓީމުގެ ފަރާތުން ކޮންމެވެސް ވަރެއްގެ ރަނގަޅު ކުޅުމެއް ފެނިގެން ގޮސްފައިވެއެވެ. އެގޮތުން ސެޓްގެ މެދުތެރެއިން 3 ޕޮއިންޓްގެ ލީޑެއް ނިލަންދޫން ނެގި ނަމަވެސް މަގޫދޫ ޓީމުގެ ސެޓަރު މަޒިއްޔާގެ ފުރިހަމަ ސެޓިންތަކާ ޔަނިލަދިސް ސަންޗޭޒްގެ ބާރު ޙަމަލާތަކާއެކު 25 19 އިން ސެޓް ހޯދާ މެޗް ކާމިޔާބުކުރިއެވެ. މިމެޗްގެ މޮޅު ކުޅުންތެރިއަކަށް ހޮވުނީ މަގޫދޫގެ ޔަނިލަދިސް ސަންޗޭޒްއެވެ. މަގޫދޫ ޓީމުގެ ބެންޗްގައި ޓީމަށް އިރުޝާދު ދިނުމުގައި ޙަރަކާތްތެރިވަނީ ޒުވާން ހުނަރުވެރި ކުޅުންތެރިން އުފެއްދުމުގައި ތަފާތު ދައްކަމުން އަންނަ ޝުޢައިބު ކޯޗެވެ. އަދި ނިލަންދޫ ޓީމުގައި ހުރީ ރިޝްވާނު (ރިއްޗަޅޭ)އެވެ.

މުބާރާތުގެ 3 ވަނަ ދުވަހުގެ ހަވީރު ފިރިހެން ޑިވިރަންގައި ނިލަންދޫއާއި ފީއަލި ވާދަކުރާއިރު ރޭގަނޑު ކުޅެވޭ އަންހެން ޑިވިޜަންގެ މެޗްގައި ވާދަކުރާނީ މަގޫދޫއާއި ފީއައްޔެވެ.
ފ.އަތޮޅުގައި ވޮލީ ދިރުވާ އާލާކޮށް ހުނަރުވެރި ކުޅުންތެރިންތަކެއް އުފެއްދުމުގެ މަޤުޞަދުގައި ފ.އަތޮޅު ކައުންސިލުން އިސްނަގައިގެން ފެށި މިމުބާރާތުގައި ފ.އަތޮޅުގެ 5 ރަށުގެ ތެރެއިން ބިލެތްދޫ ފިޔަވައި ކޮންމެ ރަށަކުންވެސް 2 ޑިވިރަންގައިވެސް ޓީމުތައްވަނީ ބައިވެރިކޮށްފައެވެ.
10 ވަނަ ދުވަހުން ފެށިގެން މިމަހު 16 ވަނަ ދުވަހުގެ ނިޔަލަށް ނިލަންދޫ ވޮލީކޯޓްގައި ކުރިއަށްދާ މިމުބާރާތުގެ ކުޅުން ކުރިއަށް ގެންދިއުމަށް ހަމަޖެހިފައިވަނީ ކޮންމެ ޑިވިޜަނެއްގައި ކޮންމެ ޓީމެއް ކޮންމެ ޓީމަކާއި ވާދަކުރުމަށްފަހު އެންމެ ގިނަ ޕޮއިންޓް ހޯދާ ދެޓީމު ފައިނަލަށް ދާގޮތަށެވެ. މުބާރާތުގެ ކޮންމެ ޑިވިޜަނެއްގެވެސް ޗެމްޕިއަން ޓީމަށް އަތޮޅު ކައުންސިލުން 20 ހާސްރުފިޔާގެ ފައިސާގެ އިނާމު ވަނީ ހުށަހަޅާފައެވެ. މިމުބާރާތުގެ ކޯ ސްޕޮންސަރއަކީ ރިއަލް ޖާރޒީއެވެ. މުބާރާތުގެ މީޑިއާ ޕާޓްނަރަކީ ދަނިއުސްއެވެ. މުބާރާތުގެ ހުރިހާ މެޗެއް ދަނިއުސްއިން ފޭސްބުކު ލައިވް ކުރާގޮތަށް ވަނީ ހަމަޖެހިފައެވެ. މުބާރާތުގެ ޓެކްނިކަލް ހުރިހާ އެހީތެރިކަމެއް ފ.ޕޮލިސް ކްލަބުން ފޯރުކޮށްދެމުންދާއިރު، ފ.އަތޮޅު ހޮސްޕިޓަލުންވެސްދަނީ ވަރަށް ފުރިހަމަ އެހީތެރިކަމެއް މުބާރާތަށް ފޯރުކޮށްދެމުންނެވެ. މުބާރާތުގެ ހޯސްޓިންގ ގޮތުގައި ފ. ނިލަންދޫ ކައުންސިލުން އިންތިޒާމްގެ މަސައްކަތްތައް ކޮށްފައިވަނީ ރޭވުންތެރިކަމާއެކު ވަރަށް ފުރިހަމައަށެވެ.