ފީއަލީ ކައުންސިލް ޓީމުތަކުގެ ފެށުން ރަނގަޅު ކޮށްފި!

ފީއަލީ ކައުންސިލް ޓީމުތަކުގެ ފެށުން ރަނގަޅު ކޮށްފި!

316302975 446261384349309 4235375197368818461 N

ފީއަލީ ކައުންސިލް ޓީމުތަކުގެ ފެށުން ރަނގަޅު ކޮށްފި!

ލިޔުން ކިޔާލެވޭނީ ގާތްގަޑަކަށް 2 މިނިޓުން

ފ.އަތޮޅު ކައުންސިލުން އިންތިޒާމުކޮށްގެން ފ.އަތޮޅުގެ ރަށްތަކަށް ހުޅުވާލައިގެންބާއްވާ ވޮލީބޯޅަ މުބާރާތުގެ ފުރަތަމަ ދުވަހުގެ ފިރިހެން އަދި އަންހެން މެޗްވެސް ކާމިޔާބުކޮށް ފީއަލިން ފުރިހަމަ ފެށުމަކާއެކު މުބާރާތް ފަށައިފިއެވެ.

މުބާރާތުގެ ފުރަތަމަ މެޗްގައި 10 ވަނަ ދުވަހު ހަވީރު ފިރިހެން ޑިވިޜަނުގައި ފީއަލީ ކައުންސިލްގެ ޓީމާއި ދަރަނބޫދޫ ކައުންސިލްގެ ޓީމު ބައްދަލު ކުރި މެޗް ފަސޭހަ ކަމާއެކު ސީދާ 3 ސެޓުން ކާމިޔާބުކުރީ ފީއަލީ ކައުންސިލްގެ ޓީމެވެ. ފ.އަތޮޅުގައި ތިބި އެންމެ ހުނަރުވެރި ޒުވާން ކުޅުންތެރިން ހިމެނޭ ފީއަލީ ކައުންސިލްޓީމު އިތުރަށް ވަރުގަދަ ކުރުމުގެ ގޮތުން ހިމަނާފައިވާ އަވަށްޓެރި އިންޑިއާގެ މަނާރާ ތޮއްތަތިލްގެ ބާރުޙަމަލާތައް ފެނިގެންދިޔަ މިމެޗްގެ މޮޅު ކުޅުންތެރިއަކަށް ހޮވުނީވެސް މަނާރާއެވެ. މެޗްގެ ސެޓްތައް ފީއަލިން ކާމިޔާބުކުރީ 25 – 15 ، 25 – 18 އަދި 25 – 12 އިންނެވެ.

މުބާރާތް ފެށުމުގެ ފުރިހަމަ ރަސްމިއްޔާތު ބާއްވާފައިވަނީ މިރޭ ކުޅެވުނު އަންހެން ޑިވިރަންގެ މެޗް ފެށުމުގެ ކުރިންނެވެ. މުބާރާތް ޝަރަފްވެރި ކޮށްދެއްވީ ދ.ވިލުރީފް ރިޒޯޓްގެ އޮޕަރޭޝަން މެނޭޖަރ ނިމާލްއެވެ. މިރަސްމިއްޔާތުގައި ފ.އަތޮޅު ކައުންސިލްގެ ރައީސް ޢަލީ  މުޙައްމަދުގެ އިތުރުން އަތޮޅު ކައުންސިލްގެ މެމްބަރުންނާއި ނިލަންދޫ މުއައްސަސާތަކުގެ އިސްވެރިން ބައިވެރިވަޑައިގެންނެވިއެވެ. މުނިފޫހި ފިލުވުމުގެ އައިޓަމްއަކަށްފަހު ކުޅެވުނު އަންހެން ޑިވިރަނުގެ ފުރަތަމަ މެޗްގައި ވާދަކުރީ ފީއަލީ ކައުންސިލްގެ އަންހެންޓީމާއި ދަރނބޫދޫ ކައުންސިލްގެ އަންހެން ޓީމެވެ. ދެޓީމުގައިވެސް ރާއްޖޭން ބޭރު ކުޅުންތެރިން ހިމެނިފައިވާއިރު ފީއަލީ ޓީމުގައި ހުރީ ތައިލެންޑްގެ ކުތިކާއެވެ. ދަރަނބޫދޫގައި ހުރީ ޔުކުރޭނުގެ ކުޅުންތެރިއެއްކަމަށްވާ ޔޫލިއާލިޓްއެވެ. ވާދަވެރި ކުޅުމެއް ފެނިގެން ދިޔަ މިމެޗްގެ ފުރަތަމަ ސެޓް ދަރަނބޫދޫން 25 – 20 އިން ހޯދާފައިވަނިކޮށް ތައިލެންޑްގެ ކުޅުންތެރިޔާގެ މޮޅުކުޅުމާއެކު ފީއަލީ ޓީމުން ޖެހިގެން އައި 3 ސެޓް ހޯދާ 3 ސެޓް 1 ސެޓުން މެޗްކާމިޔާބުކުރިއެވެ. ފީއަލީ ސެޓްތައް ހޯދީ 25 – 18 ، 25 – 16 އަދި  25 – 15 އިންނެވެ. މެޗްގެ މޮޅު ކުޅުންތެރިއަކަށް ހޮވުނީ ފީއަލީ ޓީމުގެ ކުތިކާއެވެ. ދެޓީމުގެ ބެންޗްގައިވެސް ޓީމުތަކަށް އިރުޝާދު ދޭން ތިބީ ވޮލީގައި ފާހަގަ ކުރެވޭ ކޯޗުންނެވެ. އެގޮތުން ދަރަނބޫދޫގައި ކޯޗް ޞަފްވާނު ހުރިއިރު ފީއަލީގައި ހުރީ ކޯޗް ސުނާންއެވެ.

ފ.އަތޮޅުގައި ވޮލީ ދިރުވާ އާލާކޮށް ހުނަރުވެރި ކުޅުންތެރިންތަކެއް އުފެއްދުމުގެ މަޤުޞަދުގައި ފ.އަތޮޅު ކައުންސިލުން އިސްނަގައިގެން ފެށި މިމުބާރާތުގައި ފ.އަތޮޅުގެ 5 ރަށުގެ ތެރެއިން ބިލެތްދޫ ފިޔަވައި ކޮންމެ ރަށަކުންވެސް 2 ޑިވިރަންގައިވެސް ޓީމުތައްވަނީ ބައިވެރިކޮށްފައެވެ. ބިލެތްދޫން މުބާރާތުގައި ބައިވެރިވެފައި ނުވާއިރު ދަރަނބޫދޫ ފިރހެން ޓީމު ފިޔަވައި އެހެން ކޮންމެ ޓީމެއްގައިވެސް ރާއްޖެއިން ބޭރު ކުޅުންތެރިންވަނީ ހިމަނާފައެވެ.

10 ވަނަ ދުވަހުން ފެށިގެން މިމަހު 16 ވަނަ ދުވަހުގެ ނިޔަލަށް ނިލަންދޫ ވޮލީކޯޓްގައި ކުރިއަށްދާ މިމުބާރާތުގެ ކުޅުން ކުރިއަަށް ގެންދިއުމަށް ހަމަޖެހިފައިވަނީ ކޮންމެ ޑިވިޜަނެއްގައި ކޮންމެ ޓީމެއް ކޮންމެ ޓީމަކާއި ވާދަކުރުމަށްފަހު އެންމެ ގިނަ ޕޮއިންޓް ހޯދާ ދެޓީމު ފައިނަލަށް ދާގޮތަށެވެ. މުބާރާތުގެ ކޮންމެ ޑިވިޜަނެއްގެވެސް ޗެމްޕިއަން ޓީމަށް އަތޮޅު ކައުންސިލުން 20 ހާސްރުފިޔާގެ ފައިސާގެ ޢިނާމު ވަނީ ހުށަހަޅާފައެވެ. މިމުބާރާތުގެ ކޯ ސްޕޮންސަރއަކީ ރިއަލް ޖާރޒީއެވެ. މުބާރާތުގެ މީޑިއާ ޕާޓްނަރަކީ ދަނިއުސްއެވެ. މުބާރާތުގެ ހުރިހާ މެޗެއް ދަނިއުސްއިން ފޭސްބުކު ލައިވް ކުރާގޮތަށް ވަނީ ހަމަޖެހިފައެވެ. މުބާރާތުގެ ޓެކްނިކަލް ހުރިހާ އެހީތެރިކަމެއް ފ.ޕޮލިސް ކްލަބުން ފޯރުކޮށްދެމުންދާއިރު ފ.އަތޮޅު ހޮސްޕިޓަލުންވެސްދަނީ ވަރަށް ފުރިހަމަ އެހީތެރިކަމެއް މުބާރާތަށް ފޯރުކޮށްދެމުންނެވެ.

ޙިއްސާ ކުރައްވާ:

ގުޅުންހުރި