ފ.އަތޮޅު ވޮލީ މުބާރާތް 2023 އަށް ފީއަލީ ކައުންސިލް ޓީމުން ވަރަށް ބޮޑަށް ތައްޔާރުވެފައިވާކަމަށް އެރަށު ކައުންސިލްގެ ރައީސް މޫސާ އަޙުމަދު ވިދާޅުވެއްޖެއެވެ.

މުބާރާތުގެ ތައްޔާރީތައް ކުރިއަށް ދާގޮތާއި ބެހޭގޮތުން މަޢުލޫމާތު ސާފުކުރުމަށް ދަނިއުސް މީޑިއާއިން ގުޅާލުމުން މޫސަ ވިދާޅުވީ ކޯޗަކާއި ދެކުޅުންތެރިން ގެނެސްގެން މުބާރާތަށް ވަރުގަދައަށް ތައްޔާރުވެފައިވާ ކަމަށާއި، ޓީމާއިމެދު އިތުބާރު އެބައޮތްކަމަށެވެ. ފީއަލީ ކައުންސިލްގެ ފިރިހެން ޓީމަށް އެންމެ ފުރަތަމަ ގެނައި ޕާކިސްތާނު ކުޅުންތެރިޔާގެ ފައިގެ ހުޅަށް ލިބުނު އަނިޔާއަކާއި ގުޅިގެން އެކުޅުންތެރިޔާ ފޮނުވާލުމަށްފަހު މިހާރުވަނީ އިންޑިއާއިން ކުޅުންތެރިއަކު ގެނެސްފައެވެ. ކައުންސިލްގެ އަންހެން ޓީމުގައި ހިމެނޭ ބިދޭސީ ކުޅުންތެރިއަކީ މިދިޔަ މަހު މަގޫދޫގައި ކުރިއަށްދިޔަ އެމްޕީ ދޮންބިލެތް އެމްޒެޑްސީގައި ފީއަލީ ކައުންސިލަށް ކުޅެދިން، އަދި އެ މުބާރާތުގެ އެންމެ މޮޅު ބިދޭސީ ކުޅުންތެރިޔާ ކުޓިކާއެވެ. މިއީ ތައިލޭންޑްގެ ކުޅުންތެރިއެކެވެ. ޓީމަށް ގެނެސްފައިވާ ކޯޗަކީ މަޝްހޫރު ކޯޗު ސުނާއެވެ.

މޫސަ އިތުރަށް ވިދާޅުވީ މުބާރާތަށް ތައްޔާރުވުމަށް އެކަށީގެންވާ މުއްދަތެއް ލިބުނުކަމަށާއި އެހެންނަމަވެސް، މުޅި ޓީމު ކުޅުންތެރިން ހަމަކޮށް ޕްރެކްޓިސްތައް ކުރުމުގައި މާގިނަ ވަގުތުތަކެއް ނުލިބުނުކަމަށެވެ.

ފީއަލިން ދެ ޓީމު ތައްޔާރުކޮށް މިހާތަނަށް ދެލައްކަ ރުފިޔާއާއި ގާތްކުރާ އަދަދަކަށް ޚަރަދު ކުރެވިފައިވާނެކަމަށް ލަފާކުރެވޭކަމަށް ރައީސް ވިދާޅުވިއެވެ. އަދި މުބާރާތް ފެށުމުން އިތުރު ޚަރަދުތަކެއް ހިނގާނެކަމަށާއި މިއީ މުބާރާތް ރާވާ އަތޮޅު ކައުންސިލުން ވަރަށްބޮޑަށް ވިސްނަންޖެހޭ ކަމެއްކަމަށް ވިދާޅުވިއެވެ. އަދި އަތޮޅު ކައުންސިލް ތަމްސީލްކުރައްވާ މެމްބަރެއްގެ ހައިސިއްޔަތުން މިމުބާރާތާއިގުޅޭ ބައްދަލުވުން ތަކުގައި، ކައުންސިލުން މުބާރާތުގެ ޗެމްޕިއަން ޓީމަށް ކަނޑައަޅާފައިވާ ފައިސާގެ އަދަދާއި މެދު ދެބަސްވެ ވާހަކަދެއްކެވީ ހަމައެކަނި އެބޭފުޅާކަމަށްވެސް ވިދާޅުވިއެވެ.

“އަޅުގަނޑު މިބުނާ ވާހަކައަކީ ރާއްޖޭން ބޭރުން ކުޅުންތެރިން ޖެއްސޭގޮތަށް އަދި އަތޮޅުން ބޭރުން ޤައުމީ ލެވެލްގެ ކުޅުންތެރިންވެސް ހިމެނޭގޮތަށް ޤަވާއިދު އެކުލަވާލާފައި، އަތޮޅު ކައުންސިލުން ރަށު ކައުންސިލްތަކަށް ފައިސާގެ އެއްވެސް އެހީއެއްވެސް ނުދީ، ޗެމްޕިއަނުންނަށް ވިހިހާސް ކަނޑައެޅީމާ މީތި ވޯތެއް ނޫނޭ” މުބާރާތަށް ކަނޑައަޅާފައިވާ ފައިސާގެ އިނާމާއި ދޭތެރޭ ހިތްހަމަ ނުޖެހޭކަން ހާމަކުރައްވަމުން މޫސަ ވިދާޅުވިއެވެ.

މޫސަ ފާހަގަކުރެއްވި ގޮތުގައި އެފެންވަރުގެ ކުޅުންތެރިން ގެންނަން ބޮޑެތި ޚަރަދުތަކެއް ކޮންމެ ޓީމަކުންވެސް ކުރަންޖެހޭއިރު، އެކަން އެކުރެވެނީ ޤަވާއިދުގައި އެގޮތަށް ބާރުއަޅައި ތަންދޭތީ ކަމަށެވެ. އެކަމަށް ދެކެވަޑައިގަންނަވާ ޙައްލަކީ ޗެމްޕިއަން ޓީމަށް ލައްކައެއްހާ ރުފިޔާ ކަނޑައެޅުން ނުވަތަ ހަމައެކަނި އަތޮޅު ކުޅުންތެރިންނަށް ބައިވެރިވެވޭގޮތަށް ޤަވާއިދު ބަދަލުކޮށްފައި މިހާރު ދޭން ކަނޑއަޅާފައިވާ އަދަދު ދިނުން ނޫންނަމަ، އަތޮޅު ކައުންސިލުން ކައުންސިލްތަކަށް ފައިސާގެ އެހީއެއް ދިނުން ކަމުގައި އެބޭފުޅާ ދެކެވަޑައިގަންނަވައެވެ. އަދި އެކަން ކައުންސިލް ބައްދަލުވުންތަކަށް ހުށަހެޅިން ކަމަށާއި، އަތޮޅުގެ އެހެން އެއްވެސް ރަށެއްގެ ކައުންސިލަކުން އެކަމަށް އެއްބަސް ނުވިކަމަށެވެ.

ފީއަލީ ކައުންސިލުން މިމުބާރާތަށް ބޮޑު ހޭދަތަކެއް ކޮށްފައިވާއިރު ކައުންސިލްގެ ރައީސްގެ ހައިސިއްޔަތުން ކަންބޮޑުވެލައްވާ އެހެންކަމެއްވެސް އެބޭފުޅާވަނީ ފާހަގަކުރައްވާފައެވެ. އެގޮތުން މި މުބާރާތުގައި ކުރަމުން އަންނަ މަސައްކަތްތަކަށް ކައުންސިލްގައި ހިމެނޭ އަންހެން މެމްބަރަކު ފާޅުގައި ދެކޮޅުވެރިކަން ދައްކަމުން އަންނަކަމަށާއި، މުބާރާތުގެ ކަންކަމުގައި އެއްވެސް އެއްބާރުލުމެއް ކައުންސިލަށް ނުދޭކަން ފާހަގަކުރެއްވިއެވެ. ޚާއްސަކޮށް މުބާރާތަށް ފަންޑު ހޯދުމަށް ކައުންސިލުން ކުރަމުން އައި މަސައްކަތްތަކުގައި އެއްބާރުލުން ނުދީ، އެކަމާ ދެކޮޅަށް މަސައްކަތް ކުރާތީ އެކަން ހިތާމައާއެކު ފާހަގަކުރާކަމަށް ރައީސް ވިދާޅުވިއެވެ.

ފ. ފީއައްޔަކީ ވޮލީގައި މޮޅު ކުޅުންތެރިންތަކެއް އުފައްދާފައިވާ ވޮލީގައި ނަންވިދާ ރަށެކެވެ. އަދި ވޮލީއަކީ އެރަށުގެ އެއްވަނަ ކުޅިވަރެވެ.