ފ.އަތޮޅުގެ ރަށްތަކަށް އަމާޒުކޮށްގެން ކުރިއަށް ގެންދިއުމަށް ހަމަޖެހިފައިވާ “ފ.އަތޮޅު ވޮލީ މުބާރާތް 2023” ގައި ފ. ބިލެތްދޫއިން ބައިވެރި ނުވެވުނީ ފަހު ވަގުތުގައި ޓީމަށް “ދިމާވިކަމަކުން” ކަމަށް ފ. ބިލެތްދޫ ކައުންސިލްގެ ރައީސް އަޙްމަދު އަސްލަމް ވިދާޅުވެއްޖެއެވެ. އަސްލަމް މިފަދައިން ވިދާޅުވީ ދަނިއުސް މީޑިއާއަށް މިއަދު ފޯނުން ދެއްވި ޖަވާބުގައެވެ.

އަސްލަމް ވިދާޅުވީ ބިލެތްދޫއިން މުބާރާތަށް ތައްޔާރުވުމަށް މަސައްކަތްތަކެއް ކުރެވެމުން ދިޔަކަމަށާއި، ބޭރުން ގެންނަން ނިންމި ބައެއް ކުޅުންތެރިންނަށް “ހާފް ޕޭމަންޓް” ވެސް ދީފައިވާނެކަމަށެވެ. އަދި ބިލެތްދޫއިންވެސް އަންހެން އަދި ފިރިހެން ކުޅުންތެރިންގެ ޓީމެއް އެކުލަވާލެވުނު ކަމަށާއި، މިއަހަރުގެ މުބާރާތުގައި ބައިވެރި ނުވެވުނީ ޓީމަށް ދިމާވިކަމަކުން ކުޅުންތެރިންވެސް އެގޮތް (ބައިވެރި ނުވުން) ބޭނުން ވެގެންކަމަށެވެ. އަސްލަމް އިތުރަށް ވިދާޅުވީ މިކަމުގައި ކައުންސިލަށް އެންމެ އެކަށީގެންވާ މިންވަރަށް އަޅާލުން ނުދެވުނު ކަމަށެވެ.

ބިލެތްދޫ ކައުންސިލްގެ ރައީސްގެ ހައިސިއްޔަތުން ފ.އަތޮޅު ކައުންސިލްވެސް ތަމްސީލް ކުރައްވަމުން ގެންދަވާ އަސްލަމް މި މުބާރާތުގެ އިންތިޒާމްތަކާއި ބެހޭގޮތުން ވިދާޅުވީ، މުބާރާތަށް ތައްޔާރުވުމަށް ކައުންސިލްތަކަށް އެކަށީގެންވާ ވަގުތު ލިބިފައިވާކަމަށް ޤަބޫލުކުރައްވާ ކަމުގައެވެ. އަދި މި މުބާރާތުގައި ބިލެތްދޫ ތަމްސީލް ކުރެވޭގޮތް ނުވިކަމުގައި ވީނަމަވެސް، މުބާރާތުގެ އެކިއެކި ކަންތައްތަކުގައި އަތޮޅު ކައުންސިލުން އެދިއްޖެ ކޮންމެ ވަގުތެއްގައި ދެވެން އޮތް އެއްބާރުލުމެއް ދެމުން ގެންދާނެކަމުގެ ޔަޤީންކަންވެސް އަސްލަމް ދެއްވިއެވެ.

މިއަހަރުގެ މުބާރާތުގައި ބައިވެރި ނުވެވުނު ކަމުގައި ވީނަމަވެސް، ކުރިއަށް އޮތްތަނުގައި ބާއްވާ މުބާރާތްތަކުގައި ބިލެތްދޫ ތަމްސީލް ވެގެން ދިއުމަކީ ވަރަށް އުއްމީދު ކުރެވޭ ކަމެއްކަމުގައި އަސްލަމް ވިދާޅުވިއެވެ.

ފ.އަތޮޅު ވޮލީ މުބާރާތް 2023 ފެށުމަށް ހަމަޖެހިފައިވަނީ އަންނަ ބުރާސްފަތި ދުވަހުގެ ހަވީރުގައެވެ. ފ. ނިލަންދޫ ވޮލީ ކޯޓުގައި ކުރިއަށް ގެންދާ މިމުބާރާތުގައި ނިލަންދޫގެ އިތުރުން ދަރަނބޫދޫ، މަގޫދޫ އަދި ފީއަލިން ދެ ޖިންސުގެ ޓީމުތައް ވަނީ ބައިވެރިވެފައެވެ. މީގެ ތެރެއިން ނިލަންދޫ ކައުންސިލަކީ މިމުބާރާތް ހޯސްޓްކުރާ ފަރާތެވެ. މި މުބާރާތުގެ މީޑިއާ ޕާޓްނަރަކީ ދަނިއުސްއެވެ. މުބާރާތުގެ ހުރިހާ މެޗެއްވެސް ދަނިއުސްގެ ފޭސްބުން ޕޭޖުން ލައިވްކޮށް ގެނެސްދެވޭނެއެވެ.