ފ. މަގޫދޫ ޒުވާނުންގެ ކުލަބުން އިންތިޒާމް ކޮށްގެން ކުރިއަށް ގެންދިޔަ “އެމްޕީ ދޮންބިލެތް އެމްޒެޑްސީ ލޭޑީސް ކަޕް 2023” އަށް ދަނިއުސް އިން އިތުރު ފުރިހަމަކަމެއް ގެނެސް ދެއްވާފައިވާކަމަށް ފ. މަގޫދޫ ކައުންސިލްގެ ރައީސް ޢަބްދުﷲ ވަހީދު ވިދާޅުވެއްޖެއެވެ.
ވަހީދު މިހެން ވިދާޅުވެފައިވަނީ މުބާރާތުގެ ފައިނަލް މެޗަށްފަހު، މުބާރާތުގެ އިންތިޒާމްގެ ކަންތައްތައް ކުރިއަށް ގޮސްފައިވާ ގޮތާއި ބެހޭގޮތުން ދަނިއުސްއަށް ދެއްވި ބަސްދީގަތުމެއްގައެވެ.
ވަޙީދު ފާހަގަކުރެއްވި ގޮތުގައި މެޗު ބަލާލުމަށް ދަނޑަށް ނުދެވޭ ފަރާތްތަކަށް ދުރުގައި ތިބެގެން މެޗުތައް ބަލާލުމުގެ ފުރުޞަތު ލިބިގެން ދިއުމަކީ މުބާރާތަށް ލިބިގެން ދިޔަ އިތުރު ފުރިހަމަކަމެއް ކަމަށާއި، ދަނިއުސް ފޮލޯކުރާ ގިނަ އަދަދެއްގެ ބަޔަކު ތިބުމާއެކު މުބާރާތް ވަރަށް ބޮޑަށް އިޝްތިހާރު ވެގެން ގޮސްފައިވާތީ ދަނިއުސް ޓީމަށް އިޚްލާސްތެރިކަމާއެކު ޝުކުރު ދަންނަވާ ކަމުގައެވެ.
“މުބާރާތުގެ މެޗުތައް ލައިވްކޮށް ދުރުގައި ތިބި މީހުންނަށް ގެނެސް ދިނުމަށް ކޮށްދެއްވި ބުރަ މަސައްކަތް ވަރަށް ބޮޑަށް ފާހަގަކުރަން”
ފ. މަގޫދޫ ކައުންސިލްގެ ރައީސް ޢަބްދުﷲ ވަޙީދު
އެމްޕީ ދޮންބިލެތް އެމްޒެޑްސީ ލޭޑީސް ކަޕަކީ ދަނިއުސްއިން ލައިވްކޮށް ގެނެސް ދިން ފުރަތަމަ އިވެންޓެވެ. މި އިވެންޓާއި ގުޅޭ ލައިވްތަކާއި ވީޑިއޯތަކަށް ޖުމްލަ 42،270 ވިއުސް ވަނީ ލިބިފައެވެ. މުބާރާތުގެ ލައިވްތަކަށް ބަލާއިރު ދިމާވި ޓެކްނިކަލް ކަމަކާއި ހުރެ މުބާރާތުގެ ފުރަތަމަ މެޗުގައި މައްސަލަތަކެއް ހުރިނަމަވެސް ދެންހުރި މެޗުތައް ގެނެސްދީފައިވަނީ އެ މައްސަލަތައް ޙައްލު ކުރުމަށްފަހުގައެވެ.
މި މުބާރާތް ކަވަރު ކުރުމަށް ފ. މަގޫދޫ ޒުވާނުންގެ ކުލަބުންވަނީ ދަނިއުސްއަށް ގިނަ އެހީތެރިކަން ފޯރުކޮށް ދެއްވާފައެވެ.
