ފ. މަގޫދޫ ޒުވާނުންގެ ކުލަބުން އިންތިޒާމް ކޮށްގެން ޖުލައި 25 ން 31 ގެ ނިޔަލަށް ކުރިއަށް ގެންދިޔަ “އެމްޕީ ދޮންބިލެތް އެމްޒެޑްސީ ލޭޑީސް ކަޕް 2023” ފ. ދަރަނބޫދޫ އެޑް ޖަމްޢިއްޔާއިން ކާމިޔާބު ކޮށްފިއެވެ. މިއީ އެ ޖަމްޢިއްޔާއިން މި މުބާރާތް ކާމިޔާބުކުރި ދެވަނަ ފަހަރެވެ.
ފައިނަލުގައި އެޑް ބައްދަލު ކޮށްފައިވަނީ ފީއަލީ ކައުންސިލާއެވެ. މި މެޗު އެޑުން ކާމިޔާބުކުރީ ސީދާ ތިން ސެޓުންނެވެ. ދެޓީމުގެ ފަރާތުންވެސް ވަރަށް ވަރުގަދަ ތަފާތު ކުޅުމެއް ފެނިގެންދާނެކަމަށް ބެލެވުނު ނަމަވެސް މެޗުގެ ދެ ސެޓެއް ނިމިގެން ދިޔައީ ތަފާތު ބޮޑު ސްކޯރ އަކުން އެޑް ކުރީގައި އޮވެގެންނެވެ.
މި މެޗުގެ ފުރަތަމަ ސެޓް ނިމުނީ 25-13 އިންނެވެ. ދެވަނަ ސެޓްގައި ދެޓީމުގެ ފަރާތުންވެސް މޮޅު ކުޅުމެއް ފެނިގެން ދިޔައެވެ. މި ސެޓު އެޑުން ކާމިޔާބުކުރީ 28-26 އިންނެވެ. ފަހު ސެޓު އެޑުން ކާމިޔާބު ކޮށްފައިވަނީ 25-12 ގެ ނަތީޖާއިންނެވެ.
ފައިނަލް މެޗުގެ ކުއީންއަކަށް ހޮވުނީ އެޑް ޖަމިއްޔާގެ ޖާޒީ ނަމްބަރު 7، ޕޮލީނާއެވެ. ޕޮލީނާވަނީ ސެމީ ފައިނަލްގެ ފުރަތަމަ މެޗުގައިވެސް ފީއަލީ ކައުންސިލާ ދެކޮޅަށްކުޅެ އެ މެޗުގެ ކުއީންކަން ހޯދާފައެވެ.
މި މެޗު ކާމިޔާބުކޮށް ޗެމްޕިއަންކަން ރަށަށް ގެންދިއުމަށް ފައިނަލްގައި ކުޅުނު ފީއަލީ އަދި ދަރަނބޫދޫއިންވެސް ގިނަ އަދަދަކަށް ސަޕޯޓަރުން ކުޅުންތެރިންނަށް ހިތްވަރު ދިނުމަށް މަގޫދޫއަށް ދަތުރު ކޮށްފައިވާކަން ފާހަގަކުރެވުނެވެ.
ފައިނަލް މެޗުގައި ދަރަނބޫދޫ ތަމްސީލްކޮށްދިން އެޑް ޖަމްޢިއްޔާއިން ހޯދި ކާމިޔާބީ ފާހަގަކޮށް ގިނަބަޔަކު އަންނަނީ މަރުހަބާ ކިޔަމުންނެވެ. މީގެ ތެރޭގައި ވާދަވެރި ޓީމުތަކާއި ޖަމްޢިއްޔާތައްވެސް ހިމެނެއެވެ.