އެމްޕީ ދޮންބިލެތް އެމްޒެޑްސީ ލޭޑީސް ކަޕް 2023 ގެ ފައިނަލުގެ ފަހު ޖާގަ ފީއަލީ ކައުންސިލް ޓީމުން ހޯދައިފިއެވެ.
ފީއަލީ ކައުންސިލް ޓީމުން ފައިނަލްގެ ޖާގައެއް ހޯދާފައި މިވަނީ މިއަދު ހަވީރު ކުޅެވުނު ސެމީގެ ތިންވަނަ މެޗުގައި ސީދާ ތިން ސެޓުން ދަރަނބޫދޫ އޭކްސް ޓީމުގެ މައްޗަށް ކުރި ހޯދައިގެންނެވެ.
މެޗު ފެށިގެން ދިޔައީ އޭކްސް ޓީމުން ރަނގަޅު ކުޅުމެއް ދައްކައި ލީޑުކުރަމުން ދިޔަނަމަވެސް، ފީއަލީ ކައުންސިލް ޓީމުންވަނީ ވާދަވެރި ކުޅުމެއް ސެޓުގެ ފަހު ވަގުތާއި ހަމައަށްވެސް ދައްކާފައެވެ. އެގޮތުން މެޗުގެ ފުރަތަމަ ސެޓް ފީއަލީ ކައުންސިލް ޓީމުން ކާމިޔާބުކުރީ މޮޅަށް ކުޅެމުން ދިޔަ އޭކްސް ޓީމު 29-27 އިން ބަލިކޮށްގެންނެވެ.
ވާދަވެރި ފުރަތަމަ ސެޓަށްފަހު ދެވަނަ ސެޓުވެސް ފޯރިގަދަކޮށް ދާނެކަމަށް ބެލެވުނު ނަމަވެސް، ދެވަނަ ސެޓްގައި އޭކްސް ޓީމަށް ގިނަ ގޯސްތަކެއް ހެދުނުތަން ފެނިގެން ދިޔައެވެ. މި ސެޓް ފެށިގެން ނިމެންދެންވެސް މޮޅަށްކުޅެ ލީޑުނަގަމުން އައީ ފީއަލީ ކައުންސިލް ޓީމެވެ. މި ސެޓް ފީއަލީ ކައުންސިލް ޓީމުން ހޯދީ 25-8 ގެ ބޮޑު ތަފާތަކުންނެވެ. ފީއަލީ ކައުންސިލް ޓީމުގެ ތައިލޭންޑް ކުޅުންތެރިޔާ، ކުޓިކާގެ ބާރުގަދަ ޝޮޓުތަކެއް ފެނިގެން ދިޔަ މި ސެޓުގައި އޭކްސް އިން 8 ޕޮއިންޓް ހޯދިއިރު ފީއަލީ ކައުންސިލް ޓީމު އޮތީ 13 ޕޮއިންޓް ހޯދާފައެވެ. އެހިސާބުން ސެޓް ނިމުމާހަމައަށް ފުލުފުލުގައި ޕޮއިންޓްތަކެއް ފީއަލީ ޓީމުން ހޯދިއިރު އިތުރު ޕޮއިންޓެއް އޭކްސް ޓީމަށް ހޯދިފައިނުވެއެވެ.
މެޗުގެ ތިންވަނަ ސެޓް ފެނިގެން ދިޔައީ ފުރަތަމަ ސެޓާއި އެއްގޮތަށް ވަރަށް ވާދަވެރިކޮށެވެ. ދެވަނަ ސެޓްގައި ހެދުނު ގޯސްތައް ރަނގަޅުކޮށް، ދެޓީމުގެ މެދުގައި ފަރަގު ބޮޑުކޮށް ޕޮއިންޓް ހޯދިފައިނެތް މި ސެޓް ފީއަލީ ކައުންސިލުން ކާމިޔާބުކުރީ 25-21 ގެ ނަތީޖާއިންނެވެ. މިއާއެކު ތިންސެޓު ހޯދައިގެން ފީއަލީ ކައުންސިލް ޓީމުން ފައިނަލްގެ ފަހު ޖާގަ ވަނީ ކަށަވަރު ކޮށްފައެވެ.
ފާހަގަ ކޮށްލެވޭ އަނެއްކަމަކީ މި މުބާރާތުގެ ގްރޫޕް ސްޓޭޖްގެ ފުރަތަމަ މެޗުގައިވެސް މި ދެޓީމު ބައްދަލު ކޮށްފައިވާއިރު، އެ މެޗުވެސް ފީއަލީ ކައުންސިލް ޓީމުން ކާމިޔާބުކޮށްފައިވަނީ ސީދާ ތިން ސެޓުންކަމެވެ.
މި މުބާރާތުގެ ފައިނަލް މެޗު އޮންނާނީ މާދަމާރޭ 20:15 ގައެވެ. ފައިނަލްގައި ފީއަލީ ކައުންސިލް ޓީމާއި ދެކޮޅަށް ނިކުންނާނީ ދަރަނބޫދޫ އެޑް ޖަމިއްޔާއެވެ. މި ދެޓީމުވަނީ މިމުބާރާތުގެ ސެމީގެ ފުރަތަމަ މެޗުގައި ބައްދަލުކޮށްފައެވެ. އެ މެޗު އެޑް ޖަމިއްޔާއިން ކާމިޔާބުކުރީ 3-1 ސެޓުންނެވެ.
One Response
Alhamdhlillahi feeali caouncil ah