އެމްޕީ ދޮންބިލެތް އެމްޒެޑުސީ ލޭޑީސް ކަޕް 2023 މުބާރާތުގައި އިއްޔެ ހަވީރު ކުޅުނު ފުރަތަމަ ސެމީ ފައިނަލުގައި ބައްދަލުކުރީ ދަރަނބޫދޫ ގެ އެސޯސިއޭޝަން ފޯރ ދަރަނބޫދޫ ޑިވޮލޮޕްމެންޓު އަދި ފީއަލީ ކައުންސިލްގެ ޓީމެވެ.

މިމެޗުގެ ފުރަތަމަ ސެޓު ފަށައިގެން ކުރިއަށް ދިޔައިރު ފީއަލީ ޓީމުން ދިޔައީ ފުލުފުލުގައި ޕޮއިންޓު ތަކެއް ހޯދަމުންނެވެ. އެގޮތުން ސެޓުގައި ފުރަތަމަ ފަހަރަށް އެޑަށް ޕޮއިންޓެއް ލިބުނީ ފީއަލީ ޓިމުން 11 ޕޮއިންޓުގެ ފަރަގެއްގައި އޮށްވައެވެ. މި ސެޓުގެ ފުރަތަމަ ކޮޅުގައި އެޑް ޓީމުން އެހާ އެދެވޭ ވަރުގެ ކުޅުމެއް ދެއްކިފަ އެއް ނުވެއެވެ. ނަމަވެސް ކުޅުން ރަނގަޅު ކޮށް، އެޓީމުގެ އޮތް 13 ޕްއިންޓުގެ ފަރަގު ކުޑަ ކުރަމުން އެޑް ޓީމުން ވަނީ ސެޓުގެ ފަހު ކޮޅުގައި އެޓީމުގެ ކުޅުން ދައްކާލާފައެވެ. އެގޮތުން، ސެޓުގައި ފުރަތަމަ ފަހަރަށް އެޑުން ވަނީ ނަތީޖާ ހަމަ ހަމަ ކޮށް ސެޓު ހޯދާ ފައެވެ. މި ސެޓު ނިމުނީ އެޑް 25 އަދި ފީއަލީ ކައުންސިލް 23 އިންނެވެ.

ފުރަތަމަ ސެޓު އެޑުން ގެންދިޔަ ކަމުގައިވީނަމަވެސް ހިތްވަރު އެލުވައި ނުލާ ފީއަލީ ކައުންސިލުން ކުޅުމުގެ ނަތީޖާ އަކީ ދެވަނަ ސެޓު އެޓީމަށް ލިބުމެވެ. މި ސެޓު ނިމިގެން ދިޔައީ ފީއަލީ ކައުންސިލް 27 އެޑް 25 އިންނެވެ.

ތިންވަނަ ސެޓުގައި އެޑުން ވަނީ ކުޅުން ރަނގަޅު ކޮށް އެ ސެޓު ހޯދާފައެވެ. އެޑުން މި ސެޓު ހޯދީ 25 – 17 އިންނެވެ.

ހަތަރު ވަނަ ސެޓުގައިވެސް އެޑުން ދިޔައީ ވަރުގަދަ އަށް ކުޅެމުންނެވެ. ނަތީޖާ އެއްގެ ގޮތުން ފީއަލީ ޓީމަށް މިސެޓުގްއި އެހާ އެދެވޭ ވަރެއްގެ ކުޅުމެއް ވަނީ ނުދެއްކިފައެވެ. މި ސެޓު އެޑުން ހޯދީ 25 – 10 އިންނެވެ.

މިނަތީޖާއާއެކު އެޑްޖަމްޢިއްޔާއިންވަނީ މިމުބާރާތުގެ ފައިނަލްގެ ފުރަތަމަ ޖާގަ ކަށަވަރުކޮށްފައެވެ. މެޗުން ބަލިވިނަމަވެސް، މިރޭ ކުޅުނު ސެމީގެ ދެވަނަ މެޗުން މޮޅުވި ދަރަނބޫދޫގެ އޭކްސް ޓީމާއި ވާދަކޮށްގެން މޮޅުވެއްޖެނަމަ، ފީއަލީ ކައުންސިލް ޓީމަށް ފައިނަލްގެ ދެވަނަ ޖާގަ ކަށަވަރު ކުރުމުގެ ފުރުސަތު އަދި އެބައޮތެވެ.

މި މެޗުގެ ކުއީން އޮފް ދަ މެޗަކަށް ހޮވުނީ އެޑް ޖަމިއްޔާގެ ޖާރޒީ ނަންބަރު 7 ޕޮލީނާ އެވެ.

މި މުބާރާތުގައި ރޭގަ ދެވަނަ ސެމީ ފައިނަލުގައި ބައްދަލު ކުރީ ދަރަނބޫދޫ އޭކްސް ޓީމާއި ފީއަލީ އެކުވެރި ޒުވާނުންގެ ގުޅުން (ފެޒްގ) އެވެ. މިމެޗުގެ ފުރަތަމަ ސެޓުގައި ދެޓީމުގެ ފަރާތުންވެސް ފެނުނީ ހަމަހަމަ ކުޅުމެކެވެ. ނަމަވެސް، ސެޓުގެ މެދަކާ ހިސާބުން އޭކްސް ޓީމުން ވަނީ ގިނަ ޕޮއިންޓު ތަކެއް ހޯދާ ސެޓުގެ ފަރަގު އިތުރު ކޮށްފައެވެ. މި ސެޓު ނިމިގެން ދިޔައީ އޭކްސް 25 އަދި ފެޒްގ 18 އިންނެވެ.

ދެވަނަ ސެޓުގައި އޭކްސް އިން ވަނީ ކުޅުން އިތުރަށް ރަނގަޅު ކޮށް ސެޓު 13 ޕޮއިންޓުގެ ފަރަގެއްގައި އޮވެ ސެޓު ކާމިޔާބު ކޮށްފައެވެ. މި ސެޓު ނިމުނީ އޭކްސް 25 އަދި ފެޒްގ 12 އިންނެވެ.

ފުރަތަމަ ސެޓާއި ދެވަނަ ސެޓު ގެއްލުނު ނަމަވެސް ތިންވަނަ ސެޓުގައި ފެޒްގ އިން ވަނީ ކުޅުން ރަނގަޅުކޮށްފައެވެ. މި ސެޓު ވަރަށް ވާދަވެރި ކޮށް ކުޅެމުންގޮސް ސެޓު ހޯދީ އޭކްސް އިންނެވެ. މި ސެޓު ނިމުނީ އޭކްސް 27 އަދި ފެޒްގ 25 އިންނެވެ.

މި މެޗު ތިންސެޓުން ކާމިޔާބުކޮށް އޭކްސް މިވަނީ މި މުބާރާތުގެ ތިންވަނަ ސެމީ ފައިނަލުގެ ޖާގަ ހޯދާފައެވެ. އަދި މި ނަތީޖާއާއެކު ފެޒްވަނީ މުބާރާތުން ކަޓާފައެވެ. ފެޒް އަކީ މިމުބާރާތުގެ އެންމެ ކާމިޔާބު ޓީމެވެ. އެޓީމު ވަނީ މިމުބާރާތުގެ 4 ފައިނަލެއްގައި ކުޅެ 3 ފައިނަލް ކާމިޔާބުކޮށްފައެވެ.

މި މެޗުގެ އެންމެ މޮޅު ކުޅުންތެރިޔަކަށް ހޮވިފައިވަނީ އޭކްސް ޓީމުގެ ޖާރޒީ ނަންބަރު 2 ރާޝްމީ އެވެ.