މަގޫދޫ ޒުވާނުންގެ ކުލަބުން އިންތިޒާމްކޮށްގެން ކުރިއަށް ގެންދާ “އެމްޕީ ދޮންބިލެތް އެމްޒެޑްސީ ލޭޑީސް ކަޕް 2023” މާދަމާ ހަވީރު ފަށާނެއެވެ. ލޭޑީސް ކަޕަކީ ފ. އަތޮޅުގައި ބާއްވަމުން އަންނަ އެންމެ ކާމިޔާބު އަދި އެންމެ ވަރުގަދަ ވޮލީ މުބާރާތެވެ. މިއީ ހިންގުންތެރިކަމާއެކު އެކުލަބުން ބާއްވާ ފަސްވަނަ މުބާރާތެވެ.
ޖުމުލަ 6 ޓީމް ވާދަކުރާ މިއަހަރުގެ މުބާރާތުގެ މެޗްތަކުގެ ޝެޑިއުލް މަގޫދޫ ޒުވާނުންގެ ކުލަބުންވަނީ މިދިޔަ ހޮނިހިރު ދުވަހުގެ ރޭގައި އާންމުކޮށްފައެވެ. ދެ ގުރޫޕަކަށް ބަހާލައިގެން ކުރިއަށް ގެންދާ ގްރޫޕް ސްޓޭޖްގެ މެޗުތައް ޖުލައި 27 ވަނަ ދުވަހުގެ ރޭ ނިމޭނެއެވެ. މި ފ އަދި ދ އަތޮޅަށް ހުޅުވާލި މިމުބާރާތުގައި ވާދަކުރުމަށް ނިންމާފައިވަނީ މަގޫދޫގެ އިތުރުން ދަރަނބޫދޫ އަދި ފީއަލިންނެވެ.
މަގޫދޫއިން މިމުބާރާތުގައި ވާދަކުރަނީ އެސޯސިއޭޝަން ފޮރ މަގޫދޫ ޑިވެލޮޕްމަންޓާއި (އޭއެމްޑީ) ފެލޭލާ ސްޕޯޓްސްއެވެ. ދަރަނބޫދޫން ވާދަކުރަނީ އެސޯސިއޭޝަން ފޮރ ދަރަނބޫދޫ ޑިވެލޮޕްމަންޓް (އެޑް ޖަމިއްޔާ) ގެ އިތުރުން އޭކްސް ސްޕޯޓްސް ކުލަބެވެ. އެޑް ޖަމްޢިއްޔާއަކީ މި މުބާރާތް 2018 ވަނަ އަހަރު ކާމިޔާބުކުރި ޓީމެވެ. އަދި 2017 އަދި 2016 ވަނަ އަހަރު މިމުބާރާތުގެ ރަނަރއަޕް ކަން ހޯދާފައިވާ ޓީމުވެސް މެއެވެ. ފީއަލިން މިމުބާރާތުގައި ވާދަކުރަނީ މިމުބާރާތުގެ އެންމެ ކާމިޔާބު ޓީމުކަމަށްވާ ފީއަލީ އެކުވެރި ޒުވާނުންގެ ގުޅުން (ފެޒް) އަދި ފީއަލީ ކައުންސިލެވެ. ފެޒް އިންވަނީ މި މުބާރާތުގެ 4 ފައިނަލްގައި ކުޅެ ތިން ޗެމްޕިއަންކަން ހޯދާފައެވެ. އެގޮތުން މި މުބާރާތް އެންމެ ފަހުން ބޭއްވި 2019 ވަނަ އަހަރުގެ ޗެމްޕިއަންކަން ހޯދާފައިވަނީވެސް އެޓީމުންނެވެ.
މި މުބާރާތް އެންމެ ފުރަތަމަ ބާއްވާފައިވަނީ 2016 ވަނަ އަހަރުގައެވެ. އެއަހަރުން ފެށިގެން 2019 ވަނަ އަހަރާއި ހަމައަށް މެދުކެނޑުމެއްނެތި 4 މުބާރާތް ބޭއްވިނަމަވެސް، 2020 ވަނައަހަރުގެ ކޯވިޑް19 ގެ ހާލަތާއި ގުޅިގެން މެދުކެނޑިފައި އޮތުމަށްފަހު އާ މުބާރާތަކަށް މަގޫދޫ ޒުވާނުންގެ ކުލަބުވަނީ ވަރަށް ބޮޑަށް ތައްޔާރުވެފައެވެ.
މަގޫދޫ ޒުވާނުންކުލަބުގެ މިމުބާރާތަކީ ވަރަށް ގިނަ ބައެއްގެ ދީލަތީ އެހީތެރިކަމާއެކު ކުރިއަށް ގެންދެވޭ މުބާރާތެކެވެ.
