ފުއްޓަރު ސްޕޯޓްސް ކުލަބުގެ ޖަޒީރާ ލީގު 2023 ގެ ފައިނަލަށް ބީސީ ސްޕޯޓްސް އާއި ގަޓްސިޓީ ދަތުރު ކޮށްފިއެވެ.

މި މުބާރާތުގެ ސެމީ ފައިނަލުގައި ފުރަތަމަ ބައްދަލުކުރީ ބީސީ ސްޕޯޓްސް ކުލަބް އަދި ވެސްޓް ސިޓީއެވެ. މި މެޗު ބީސީ ސްޕޯޓްސް ކުލަބުން ކާމިޔާބުކުރީ 6 ލަނޑު 1 ލަނޑުންނެވެ.

މި މެޗުގައި ބީސީންވަނީ ދެ ހެޓްރިކް ހަދާފައެވެ. މެޗު ފައްޓައިގެން 35 ވަނަ ސިކުންތުގައި ބީސީގެ އަޒުހާންވަނީ އެޓީމަށް ގޯލެއް ކާމިޔާބު ކޮށްދީފައެވެ. މިއީ މި މުބާރާތުގައި ފެނިގެން ދިޔަ އެންމެ އަވަސް ގޯލެވެ. 12 ވަނަ މިނެޓާއި 14 ވަނަ މިނެޓުގައި ޖެހި ލަނޑުތަކުން އަޒުހާން ހެޓްރިކް ފުރިހަމަކުރިއެވެ. ހެޓްރިކް ހެދުމަށް އަޒުހާން ޖެހި ގޯލަކީ ފުރީކިކަކުން ޖެހި ގޯލެކެވެ.

ފުރަތަމަ ހާފް ނިމެން މިނެޓަކަށް ވެފައިވަނިކޮށް ބީސީގެ ހަތަރުވަނަ ގޯލު ކާމިޔާބު ކޮށްދީފައިވަނީ ރަޔާން އެވެ. ދެވަނަ ހާފްގެ ކުޅުން ފެށިގެން ފުރަތަމަ މިނެޓުގައި ރަޔާން އިތުރު ގޯލެއް ކާމިޔާބު ކޮށްދީފައިވާއިރު މިހާފްގެ 13 ވަނަ މިނެޓްގައި އިތުރު ގޯލެއްޖަހައި ރަޔާންވަނީ ހެޓްރިކް ހަދާފައެވެ. ވެސްޓް ސިޓީން މިމެޗުގައި ޖެހި ހަމައެކަނި ލަނޑު ޖަހާފައިވަނީ މެޗުގެ ދެވަނަ ހާފްގެ ނުވަ ވަނަ މިނެޓުގައި ކުރިން ބީސީ ސްޕޯޓްސް ކުލަބަށް ކުޅުނު އިބްރާހީމް އަހުމަދު (ދޫނި އިއްބެއެވެ).

މި މެޗު ނިމެން ކުޑަތަން ވެފައިވަނިކޮށް ވެސްޓް ސިޓީގެ ގޯލް ކީޕަރު ރިޝާއުއަށް ރީނދޫ ކާޑެއް ދައްކާފައިވެއެވެ. މި މެޗުގެ ކިންގަކަށް ހޮވިފައިވަނީ ބީސީގެ ފުރަތަމަ ހެޓްރިކް ހެދި އަޒުހާނެވެ.

މި ލީގުގެ ސެމީ ފައިނަލްގެ ފަހު މެޗުޗެސް މިރޭ ވަނީ ކުޅެފައެވެ. ގަޓްސިޓީ އަދި އެޑް ޖަމިއްޔާ ބައްދަލުކުރި މިމެޗުގެ ފުރިހަމަ ވަގުތު 1-1 އިން ދެޓީމު އެއްވަރުވުމުން ފައިނަލްގައި ކުޅޭނެ ޓީމެއް ކަނޑައެޅީ ޕެނަލްޓީ ޖަހައިގެންނެވެ. ޕެނަލްޓީ ޝޫޓުއައުޓުން އެޑް ޖަމިއްޔާގެ މައްޗަށް ކުރިހޯދީ ގަޓްސިޓީންނެވެ.

މި މެޗުގެ ފުރިހަމަ ކުޅުމުގެ ތެރެއިން އެޑްޖަމިއްޔާއަށް ގޯލް ކާމިޔާބުކުރީ ލިބުނު ފުރީކިކަކުން ރިޝްވާނެވެ. ގަޓްސިޓީއަށް ގޯލު ކާމިޔާބު ކޮށްދިނީ މެޗުގެ ކިންގަކަށް ހޮވުނު އެޓީމުގެ ކެޕްޓަން އާދަމްއެވެ. މިމެޗުގައި އެޑް ޖަމިއްޔާގެ އަލީ ނަސީރަށް ރެފްރީވަނީ ރީނދޫ ކާޑެއް ދައްކާފައެވެ.

ޕެނަލްޓީ ޝޫޓުގައި ގަޓްސިޓީގެ އާބިދު ފިޔަވައި އެހެން ކުޅުންތެރިންވަނީ ގޯލެއް ކާމިޔާބު ކޮށްފައެވެ. އާބިދު ޖެހި ޕެނަލްޓީ ދިޔައީ ގޯލާ އަމާޒުނުވެއެވެ. އެޑް ޖަމްޢިއްޔާއަށް ބަލާލާއިރު އެޓީމުގެ އުސާމަތު ޖެހި ޕެނަލްޓީ ވަނީ ގޯލާއި މާމަތިން ގޮސްސައެވެ. އެޑް ޖަމިއްޔާގެ އަލީ ނަސީރު ޕެނަލްޓީ ޝޫޓުގެ ތެރެއިން ޖަހަން ލިބުނު ދެވަނަ ޕެނަލްޓީ ގަޓްސިޓީގެ ކީޕަރު ޝައިހާންވަނީ ދިފާއު ކޮށްފައެވެ. އެޑް ޖަމިއްޔާގެ އެހެން ކުޅުންތެރިންވަނީ ޕެނަލްޓީތައް ކާމިޔާބު ކޮށްފައެވެ.

މި ލީގުގެ ފައިނަލް މެޗު ކުޅެން ހަމަޖެހިފައިވަނީ މާދަމާރޭ 20:30 ގައެވެ. ފައިނަލްގައި ބައްދަލުކުރާނީ ބީސީ ސްޕޯޓްސް ކުލަބާއި ގަޓްސިޓީއެވެ.