ފުއްޓަރު ސްޕޯޓްސް ޖަޒީރާ ލީގު 2023 ގައި ކުޅުނު ހުރިހާ މެޗަކުން ބަލިވެ އޭކްސް ސްޕޯޓްސް ކުލަބު މުބާރާތާއި އަލްވަދާއު ކިޔަން ޖެހިއްޖެއެވެ.
ލީގުގެ ފުރަތަމަ ބުރުގެ ފަހު މެޗުގައި އޭކްސް ސްޕޯޓްސް ކުލަބު ރޭ ކުޅެފައިވަނީ އެޑް ޖަމްޢިއްޔާ އާއި ދެކޮޅަށެވެ. ދެ ޓީމުގެ ފަރާތުންވެސް ވަރަށް ފޯރިގަދަ ކުޅުމެއް ފެނިގެން ދިޔަ މި މެޗު ނިމުނީ 3-2 ގެ ނަތީޖާއިން އެޑް ޖަމްޢިއްޔާ މޮޅުވެގެންނެވެ.
މި މެޗުގައި އެޑް ޖަމިއްޔާއަށް ތިން ލަނޑުވެސް ކާމިޔާބު ކޮށްދީފައިވަނީ މެޗުގެ ކިންގް އަށްވެސް ހޮވުނު އަނޫފް އާދަމެވެ. އޭކްސް ސްޕޯޓްސް ކުލަބަށް ލަނޑުތައް ޖަހައި ދީފައިވަނީ ޝުއައިބު އަދި އިބްރާހީމް މޫސާ (ކެއްޓު) އެވެ. އިބްރާހީމް މޫސާ ޖެހި ލަނޑު ޖަހައި ދިނުމަށް އެސިސްޓް ދީފައިވަނީ މިމުބާރާތުގައި އަލަށް ފެނިގެން ދިޔަ މަޖީދުއެވެ.
ފޯރިގަދަ ކުޅުމެއް ފެނިގެން ދިޔަ މި މެޗުގައި ލަނޑު ޖެހުމަށް ދެޓީމަށްވެސް ރަނގަޅު ފުރުސަތު ތަކެއް ލިބިގެން ދިޔައެވެ. އެގޮތުން އެންމެ ރަނގަޅު ފުރުސަތެއް ލިބުނު އެއް ކުޅުންތެރިޔަކީ އެޑް ޖަމިއްޔާގެ އަބޫބަކުރެވެ. އޭކްސްގެ އޭރިއާތެރެއަށް ވަދެ ގޯލް ކީޕަރު ކައިރިން ނައްޓާލާފައި ހުސްކޮށް ހުރި ގޯލަށް ފޮނުވާލަން ލިބުނު ބޯޅަ އަބޫބަކުރަށް ފޮނުވާލެވުނީ ގޯލުގެ އަރިމަތިން ބޭރަށެވެ.
ޖަޒީރާ ލީގުގެ ސެމީ ފައިނަލްގައި އެޑް ޖަމިއްޔާ ވާދަކުރާނީ ގަޓްސިޓީ އާއެވެ. މި ދެޓީމު ފުރަތަމަ ބުރުގައި ކުޅުނު މެޗު ނިމުނީ 2-2 ގެ ނަތީޖާއިން އެއްވަރު ވެގެންނެވެ. މި މުބާރާތުގެ ފުރަތަމަ ބުރުގެ ފަހު މެޗުގައި މިރޭ ބީސީ ސްޕޯޓްސް ކުލަބާއި ވެސްޓް ސިޓީ ކުޅޭނެއެވެ. މި މެޗަށް ދެ ޓީމު ނިކުންނައިރުވެސް ސެމީފައިނަލްގައި މި ދެޓީމު ކުޅެންޖެހޭކަން މިހާރުވަނީ ކަށަވަރު ވެފައެވެ.
