ފުއްޓަރު ސްޕޯޓްސް ޖަޒީރާ ލީގު 2023 ގައި މިރޭ ގަޓް ސިޓީ އާއި ބީސީ ސްޕޯސްޓް ކުލަބު ބައްދަލުކުރި މެޗުން ގަޓްސިޓީ ބަލިވެއްޖެއެވެ.
މި މެޗު ބީސީ ސްޕޯޓްސް ކުލަބުން ކާމިޔާބުކުރީ 2-0 ގެ ނަތީޖާއިންނެވެ.
ބީސީ އިން މެޗުގައި ޖެހި ދެލަނޑުވެސް ފެނިގެން ގޮސްފައިވަނީ ފުރަތަމަ ހާފް ގައެވެ. މި ދެ ލަނޑުވެސް އެޓީމަށް ކާމިޔާބު ކޮށްދިނީ މި މުބާރާތުގައި މޮޅު ކުޅުމެއް ދައްކަމުން އަންނަ މުޒްދާން އެވެ. މުޒްދާންގެ ފުރަތަމަ ލަނޑު މެޗުގެ 4 ވަނަ މިނެޓުގައި ފެނިގެން ގޮސްފައިވާއިރު ފަހު ލަނޑު ޖަހާފައިވަނީ ފުރަތަމަ ހާފްގެ ފަހު މިނެޓުގައެވެ.
ދެޓީމުގެ ފަރާތުން ފަހު ހާފްގައި ފެނިގެން ދިޔައީ ވަރަށް އެއްވަރުގެ ކުޅުމެކެވެ. ފަހު ހާފް ނިމެން ސިކުންތު ކޮޅަކަށް ވެފައި ވަނިކޮށް ގަޓްސިޓީގެ މަހްފޫޒް ބީސީގެ ޒަޔާނަށް ކުރި ފައުލަކާއި ގުޅިގެން ވަނީ ރީނދޫ ކާޑެއް ދައްކާފައެވެ. މި ކާޑާއެކު މަހުފޫޒް ވަނީ ކުރިއަށް އެޓީމުން ކުޅެން އޮތް މެޗަށް ސަސްޕެންޑް ވެފައެވެ.
މި މެޗުގެ ކިންގަކަށް ހޮވިފައިވަނީ ބީސީއަށް ދެގޯލު ކާމިޔާބުކޮށްދިން މުޒްދާނެވެ.
މި މުބާރާތުގައި ބީސީ ސްޕޯޓްސް ކުލަބު ދެން ބައްދަލުކުރާނީ ވެސްޓް ސިޓީއާއެވެ. ގަޓްސިޓީ ބައްދަލު ކުރާނީ އޭކްސް ސްޕޯޓްސް ކުލަބާއެވެ. މި ދެމެޗުވެސް ކުޅެން ހަމަޖެހިފައިވަނީ މާދަމާ ރޭގައެވެ.
