ފުއްޓަރު ސްޕޯޓްސް އިން އިންތިޒާމްކުރާ “ޖަޒީރާ ލީގު 2023” ގެ 4 ވަނަ މެޗުގައި ވެސްޓް ސިޓީގެ މައްޗަށް ގަޓްސިޓީން ކުރި ހޯދައިފިއެވެ.
މިރޭ 21:45 ގައި ކުޅެވުނު މި މެޗުގައި ފުރަތަމަ ގޯލު ޖަހައިފައިވަނީވެސް ގަޓްސިޓީންނެވެ. އެގޮތުން މެޗުގެ ފުރަތަމަ ހާފްގައި ވެސްޓް ސިޓީގެ ގޯލް އޭރިޔާތެރެއިން އެޓީމުގެ ޝާއިން ކުރި ފައުލަކާއި ގުޅިގެން ލިބުނު ޕެނަލްޓީއަކުން ފުރަތަމަ ގޯލް ކާމިޔާބުކުރީ ތަޖުރިބާކާރު ކުޅުންތެރިޔާ މުޙައްމަދު ޢުމަރެވެ.
މެޗުގެ ފުރަތަމަ ހާފް މި ނަތީޖާއާއެކު ނިމިފައިވާއިރު، ދެވަނަ ހާފް ފެށިގެން 4 ވަނަ މިނެޓުގައި ގަޓް ސިޓީގެ މަހްފޫޒް ޢުމަރުވަނީ ގަޓްސިޓީއަށް ދެވަނަ ގޯލުޖަހައި ދީފައެވެ. މި ގޯލު ޖެހުމަށް އެހީތެރިވެ ދީފައިވަނީ ގަޓްސިޓީގެ ފުރަތަމަ ގޯލު ކާމިޔާބުކޮށްދިން މުޙައްމަދު އުމަރެވެ.
ގަޓްސިޓީން މިމެޗުގައި ކާމިޔާބުކުރި ފަހު ލަނޑަކީ އެޓީމުގެ ކެޕްޓަން އާދަމް އަހްމަދު ފޮނުވާލި ބޯޅައެއް ގޯލް ލައިން ކައިރިން ފޮނުވާލަން އުޅުމުގެ ތެރޭގައި ވެސްޓް ސިޓީގެ ޝާއިން ގައިޖެހިފައި ބައިކޮޅަށް ވަން ގޯލެކެވެ.
ވެސްޓް ސިޓީން މިމެޗުގައި ޖެހި ހަމަ އެކަނި ލަނޑު ޖަހާފައިވަނީ ދެވަނަ ހާފްގެ 11 ވަނަ މިނެޓުގައި ލުޤުމާނު އަލީއެވެ.
މި މެޗުގެ ކިންގަކަށް ހޮވިފައިވަނީ ގަޓްސިޓީގެ އާދަމް އަޙްމަދެވެ.
މެޗުގެ ކުޅުން ހަމަވިއިރު 3-1 ގެ ނަތީޖާއިން ގަޓްސިޓީ މޮޅުވެފައިވާއިރު މިއީ މި މުބާރާތުގައި އެޓީމުން ހޯދި ދެވަނަ މޮޅެވެ. ވެސްޓް ސިޓީވަނީ ކުޅުނު ދެމެޗުންވެސް ބަލިވެފައެވެ.
