ފުއްޓަރު ސްޕޯޓްސް އިން އިންތިޒާމްކުރާ “ޖަޒީރާ ލީގު 2023” ގެ ކުޅުން މިރޭ ފަށައިފިއެވެ.
ލީގުގެ ފުރަތަމަ މެޗުގައި ބައްދަލުކުރީ އެޑް ޖަމްޢިއްޔާއާއި ވެސްޓް ސިޓީއެވެ. ފޯރިގަދަ ކުޅުމެއް ފެނިގެން ދިޔަ މި މެޗު 3 ލަނޑު 1 ލަނޑުން ކާމިޔާބު ކޮށްފައިވަނީ އެޑު ޖަމްޢިއްޔާއިންނެވެ.
މެޗުގެ ފުރަތަމަ ގޯލު ކާމިޔާބު ކުރީވެސް އެޑް ޖަމްޢިއްޔާއިންނެވެ. މި ލަނޑަކީ އެޓީމުގެ އުސާމަތު ނަގައިދިން ހުރަހަކުން އަލީ ނަސީރު ބޮލުންޖަހައި ކާމިޔާބުކުރި ލަނޑެކެވެ. މި ލަނޑާއެކު ހަމަހަމަ ކުޅުމެއް ފެންނަމުން ދިޔަ މި މެޗުގެ އޮއިވަރު ވަރަށް ބޮޑަށް ބަދަލުވެގެން ގޮސްފައިވެއެވެ.
އެގޮތުން ކާމިޔާބުކުރި ފުރަތަމަ ލަނޑާއެކު ސަޕޯޓަރުންގެ ފޯރި ގަދަވެފައިވަނިކޮށް މާގިނައިރުތަކެއްނުވެ އެޑްގެ ދެވަނަ ގޯލު މުޙައްމަދު ހާރޫނު ކާމިޔާބުކުރިއެވެ. މި ލަނޑު ޖެހުމަށް އެހީތެރިވެފައިވަނީ ރިޝްވާނު އަޙުމަދެވެ. މި ލަނޑަށްފަހު އެޑަށް ލިބުނު ރަނގަޅު ފުރުސަތެއްގައި މުޙައްމަދު ހާރޫނު ފޮނުވާލި ބޯޅައެއް ގޯލުތެރެއަށް ވަނުމުގެ ކުރިން އެޓީމުގެ އަނޫފްވަނީ އެ ބޯޅާގައި ޖަހައި އެޓީމުގެ 3 ވަނަ ލަނޑު ކާމިޔާބު ކޮށްފައެވެ.
ވެސްޓް ސިޓީން މި މެޗުގައި ޖެހި ހަމައެކަނި ލަނޑު ޖަހާފައިވަނީ މެޗު ނިމެން ގާތްވެފައިވަނިކޮށް އެޓީމުގެ ޝާމް ޢަލީއެވެ.
މި މެޗްގައި ދެޓީމަށްވެސް ރީނދޫ ކާޑެއް ދައްކާފައިވެއެވެ. އެގޮތުން ވެސްޓް ސިޓީގެ ޢުމަރު އަލީއަށް ކުރި ފައުލަކާއި ގުޅިގެން އެޑުގެ އުސާމަތަށް ރީނދޫ ކާޑު ދައްކާފައިވާއިރު ވެސްޓް ސިޓީގެ ޝާމަށް ކުރި ފައުލަކާއެކު ވެއްޓެމުން ދަނިކޮށް ކުޅުމުގެ ތެރެއިން ބޯޅަ އަތައް ނެގުމުން ރެފްރީވަނީ ޝާމަށް ވެސް ރީނދޫ ކާޑު ދައްކާފައެވެ.
މި މެޗުގެ ކިންގް އޮފް ދަ މެޗަށް ހޮވިފައިވަނީ އެޑް ޖަމްއިއްޔާއަށް ފުރަތަމަ ގޯލު ކާމިޔާބުކޮށްދިން އަލީ ނަސީރެވެ
މި މުބާރާތުގައި އެޑްޖަމިއްޔާގެ ދެވަނަ މެޗެއް އޮތީ މާދަމާރޭ 20:30 ގައެވެ. އެޑާއި ދެކޮޅަށް މި މެޗުގައި ނިކުންނާނީ ޒުވާން ކުޅުންތެރިންނާއެކު މިމުބާރާތުގައި ވާދަކުރާ ބީސީ ސްޕޯޓްސް ކުލަބެވެ. އަދި ހަމަ މާދަމާރޭ 21:30 ގައި ވެސްޓް ސިޓީ އާއި ގަޓްސިޓީ ބައްދަލުކުރާ މެޗެއް އޮންނާނެއެވެ.
