ދަރަނބޫދޫގެ މުވައްސަސާތަކުގެ މެދުގައި ބާއްވަމުން އަންނަ އިންޓަރ އޮފީސް ކުޅިވަރު މުބާރާތް އޮކްޓޯބަރު މަހުގައި ބޭއްވުމަށް ނިންމައިފިއެވެ.
މުވައްސަސާތަކުގެ މެދުގައި އެކުވެރިކަން ބަދަހިކުރުމަށް ކުރިއަށް ގެންދެވޭ މި މުބާރާތުގައި ވޮލީ، ފުޓްސަލް، ކެރަމްގެ އިތުރުން ބެޑްމިންޓަން ކުޅެވޭނެއެވެ. މިކަމާއި ގުޅޭ ބައްދަލުވުމެއް މިއަދު ދަރަނބޫދޫ ކައުންސިލްގައި ވަނީ ބާއްވާފައެވެ. މި ބައްދަލުވުމުގައި ރަށުގެ މުވައްސަސާތަކުން އިސްފަރާތްތައްވަނީ ބައިވެރިވެފައެވެ.
ދަރަނބޫދޫގައި ޖުމްލަ 7 މުވައްސަސާ އަކުން ޚިދުމަތް ދެމުން އާދެއެވެ. މީގެތެރޭގައި ހިމެނެނީ ދަރަނބޫދޫ ކައުންސިލް އިދާރާއާއި، ދަރަނބޫދޫ ސްކޫލާއި، ދަރަނބޫދޫ މެޖިސްޓްރޭޓް ކޯޓާއި، ދަރަނބޫދޫ ސިއްޙީމަރުކަޒާއި، ދަރަނބޫދޫ އެސްޓީއޯ ފާރމަސީއާއި، ފެނަކަ ދަރަނބޫދޫ ބްރާންޗުގެ އިތުރުން މިއަހަރު އަލަށް ޚިދުމަތް ދެމުން އަންނަ ދަރަނބޫދޫ ޕޮލިސް ޕޯސްޓެވެ. ހަތް މުވައްސަސާގެ ޚިދުމަތް ލިބެމުން އައިނަމަވެސް، ބައެއް މުވައްސަސާތަކުގައި ކުޅިވަރުތަކުގައި ބައިވެރިވުމަށް އެކަށީގެންވާ އަދަދަކަށް މުވައްޒަފުން ނެތުމުން މީހުން މަދު އެހެން މުވައްސަސާތަކާއި ގުޅިގެން ބައިވެރިވުމުގެ އިޚްތިޔާރު އެ މުވައްސަސާތަކަށް ދެވިފައި އޮވެއެވެ.
އިންޓަރ އޮފީސް މުބާރާތްތަކަކީ އާންމުގޮތެއްގައި “މުވައްޒަފުންގެ ގުޅުން” ފަދަ ޔޫނިއަންތަކުން ރާވާ އިންތިޒާމްކުރާ މުބާރާތެއް ނަމަވެސް، ދަރަނބޫދޫގައި އެފަދަ ޔޫނިއަންއެއް މިހާރު ނޯވެއެވެ. އެހެންކަމުން މި މުބާރާތް އެކިފަހަރު އެކި އުސޫލާއި އެކި ޤަވާއިދުގެ މަތީން ބާއްވަމުން އަންނަނީ އެއަހަރަކު މުބާރާތް އިންތިޒާމްކުރުމަށް ހަވާލުކުރެވޭ މުވައްސަސާއަކުންނެވެ.
މި އަހަރުގެ މުބާރާތް ބޭއްވުމަށް މިއަދު ބޭއްވުނު މަޝްވަރާ ބައްދަލުވުމުގައި މުބާރާތް އިންތިޒާމްކުރުމަށް އަދި ވަކި މުވައްސަސާއެއް ކަނޑައެޅިފައި ނުވެއެވެ. އެހެން ނަމަވެސް، ފެނަކަ ދަރަނބޫދޫ ބްރާންޗާއި ދަރަނބޫދޫ ސިއްޙީމަރުކަޒު އެކުވެގެން މި އަހަރުގެ މުބާރާތް އިންތިޒާމްކުރުމަށް މަޝްވަރާކުރެވިފައި ވާކަމަށް މަޢުލޫމާތު ލިބެއެވެ.
