ޚާއްސަ ނޯޓް: މި ރިޕޯޓަކީ ދަރަނބޫދޫ ސްކޫލުގެ ދަރިވަރުންގެ ޤުލްޝަނުގެ އިންޓަހައުސް މުބާރާތްތަކުގެ މެއިން ސްޕޮންސަރ ކުރުމުގެ އެއްބަސްވުމުގައިވާ ގޮތުގެ މަތީން، ދަރަނބޫދޫ ސްކޫލުގައި ތަޢުލީމް ޙާސިލްކުރަމުންދާ ދަރިވަރު، ބައްޝާރު ޢަބްދުއް ޞަމަދު ލިޔެފައިވާ ރިޕޯޓެކެވެ.
ފޯރިގަދަ ދެ ފައިނަލާ އެކު ދަރަނބޫދޫ ސުކޫލުގެ އިންޓަރހައުސް ނެޓުބޯޅަ މުބާރާތް މިއަދު ނިމިއްޖެއެވެ.
މި އަހަރުގެ މުބާރާތުގައި ދެ އުމުރުފުރާއަކަށް ދެ މުބާރާތްވަނީ ކުރިއަށް ގެންދެވިފައެވެ. ޖޫނިއަރ ބައިގައި ކުޅެވުނީ ގުރޭޑް ހަތަރަކުން ދަށުގެ ދަރިވަރުންނެވެ. އަދި ސީނިއަރ ބައިގައި ކުޅެވުނީ ގުރޭޑް ފަހަކުން މަތީގެ ދަރިވަރުންނެވެ. މި ދެ މުބާރާތް މިހާ ކާމިޔާބު ކަމާއެކު ނިންމާލެވުނީ އެތައް ބައެއްގެ ސްޕޮންސަރާ ދީލަތި އެހީތަކުގެ ސަބަބުންނެވެ. މި ދެމުބާރާތަކުގެ މެއިން ސްޕޮންސަރަކީ ދަނިއުސް އެވެ. ކޯ ސްޕޮންސަރަކީ ހުޅުމާލެ ޔޫތު އެން ސްޕޯރޓްސް ކުލަބުގެ ސްޕޯރޓްސް އެކަޑަމީ އެވެ. އަދި އިތުރު ސްޕޮންސަރުންގެ ތެރޭގައި ދަރަނބޫދޫ އަންހެނުންގެ ތަރައްޤީއަށް މަސައްކަތްކުރާ ކޮމެޓީ، އެޑް ޖަމިއްޔާ،މަލްޓިކަލާރ އަދި ވިލާ އެޑަމް ހިމެނެއެވެ.
މި އަހަރުގެ މުބާރާތް ފެށިފައިވަނީ 30 ޖަނަވަރީ 2023 ވީ ހޯމަ ދުވަހު އެވެ. ކޮންމެ ދުވަހަކު ދެމެޗު ވަނީ ކުޅުފައެވެ. ފުރަތަމަ 16:30 ގައި ޖޫނިއަރ ބައިގެ މެޗަކާއި 17:15 ގައި ސީނިއަރ ބައިގެ މެޗެކެވެ.
މި މުބާރާތުގެ ފުރަތަމަ މެޗެއްގެ ގޮތުގައި އޮތީ ޖޫނިއަރ ބައިގެ މެޗެކެވެ.މި މެޗުގައި ބައްދަލު ކުރީ ހަލަވެލި ހައުސް އާއި ކުރެދި ހައުސް އެވެ. މި މެޗު ނިމިގެން ދިޔައީ ހަތެއް ތިނަކުން ހަލަވެލި ކުރި ހޯދައިގެންނެވެ. މި މެޗުގެ މޮޅު ކުޅުންތެރިޔަކަށް ހޮވުނީ ހަލަވެލި ހައުސްގެ އައިރީން އަބްދުލް މުހުސިނެވެ.
ފުރަތަމަ ދުވަހުގެ ސީނިއަރ ބައިގެ މެޗަކަށް އޮތީ ހަލަވެލި ހައުސް އާއި މަދޮށީ ހައުސް ބައްދަލު ކުރި މެޗެކެވެ. މި މެޗު ނިމިގެން ދިޔައީ މަދޮށިން 23 އަދި ހަލަވެލިން 14 ޕޮޓު ކޮށްގެންނެވެ. މި މެޗުގެ މޮޅު ކުޅުންތެރިޔަކަށް ހޮވުނީ މަދޮށި ހައުސްގެ ޖުމާން އުބައިދެވެ.
މި މުބާރާތުގެ ދެވަނަ ދުވަހުގެ ޖޫނިއަރ ބައިގައި ކުޅެވުނީ ކުރެދި ހައުސް އާއި މަދޮށި ހައުސްގެ މެޗެކެވެ. މި މެޗު ނިމިގެން ދިޔައީ ކުރެދި 27 އަދި މަދޮށިން 5 ޕޮޓު ކޮށްގެންނެވެ.މި މެޗުގެ މޮޅު ކުޅުންތެރިޔަކަށް ހޮވުނީ ކުރެދި ހައުސްގެ ޒިލާ މުޙައްމަދެވެ.
މި ދުވަހުގެ ސީނިއަރ ބައިގައި ބައްދަލު ކުރީ ހަލަވެލި ހައުސް އާއި ކުރެދި ހައުސްއެވެ.މި މެޗު ނިމިގެންދިޔައީ ހަލަވެލި 18 ކުރެދިން 14 ޕޮޓު ކޮށްގެންނެވެ. މި މެޗުގެ މޮޅު ކުޅުންތެރިޔަކަށް ހޮވުނީ ހަލަވެލި ހައުސްގެ އައިޝަތު ޝައިހާ އެވެ.
މުބާރާތުގެ ތިންވަނަ ދުވަހު ޖޫނިއަރ ބައިގައި ކުޅެވުނީ މަދޮށި ހައުސް އާއި ހަލަވެލި ހައުސް ބައަދަލު ކުރި މެޗެކެވެ. މި މެޗު ނިމިގެންދިޔައީ ހަލަވެލި 25 މަދޮށިން 7 ޕޮޓު ކޮށްގެންނެވެ.މި މެޗުގެ މޮޅު ކުޅުންތެރިޔަކަށް ހޮވުނީ ހަލަވެލި ހައުސްގެ ނުސައިބާ އަބްދުﷲ ހަމީދެވެ.
މި މެޗާއެކު ޖޫނިއަރ ބައިގެ ފައިނަލަށް ދަތުރު ކޮށްފައިވަނީ ކުރެދި ހައުސްއާއި ހަލަވެލި ހައުސްއެވެ.
މި ދުވަހުގެ ސީނިއަރ ބައިގެ މެޗުގައި ބައްދަލުކުރީ ކުރެދި ހައުސްއާއި މަދޮށި ހައުސްއެވެ. މި މެޗު ނިމިގެންދިޔައީ މަދޮށި 17 ކުރެދިން 10 ޕޮޓު ކޮށްގެންނެވެ. މި މެޗުގެ މޮޅު ކުޅުންތެރިޔަކަށް ހޮވުނީ މަދޮށި ހައުސްގެ އީނާޡް ޒުރާރަތެވެ.
މި މެޗާއެކު މުބާރާތުގެ ސީނިއަރ ބައިގެ ފައިނަލަށް ގޮސްފައިވަނީ ހަލަވެލި ހައުސް އާއި މަދޮށި ހައުސްއެވެ.
މި މުބާރާތުގެ ދެ ފައިނަލް ކުޅެވިފައިވަނީ 02 ފެބްރުއަރީ 2023 ވީ ބުރާސްފަތި ދުވަހުގައެވެ.
ޖޫނިއަރ ބައިގެ ފައިނަލް މެޗު
މި މުބާރާތުގެ ފައިނަލް މެޗުގައި ބައްދަލު ކުރީ ހަލަވެލި ހައުސް އާއި ކުރެދި ހައުސްއެވެ. މި މެޗު ނިމިގެން ދިޔައީ ވަރަށް ފޯރިގަދަކޮށެވެ. ހައުސް އަކުން ފަހަރަކު ޕޮޓެއް ކުރަމުން ދަމުން ގޮސް މެޗު ނިމިގެން ދިޔައީ ހަލަވެލި ފަހުވަގުތުގައި ކުރި ޕޮޓުން ކުރި ހޯދައި މޮޅުވެގެންނެވެ. މި މެޗުގެ ނަތީޖާ އަކީ ހަލަވެލި 11 ކުރެދި 10 އެކެވެ.މި މެޗުގެ މޮޅު ކުޅުންތެރިޔަކަށް ހޮވުނީ ކުރެދި ހައުސްގެ އިބާ އަބޫބަކުރެވެ.
ސީނިއަރ ބައިގެ ފައިނަލް މެޗު
މި މުބާރާތުގެ ފައިނަލުގައި ކުޅުނީ ހަލަވެލި ހައުސް އާއި މަދޮށި ހައުސްއެވެ.މި މެޗު ފެށިގެން ފުރަތަމަ ތިން ޕޮޓު ހަލަވެލިން ކުރިއެވެ. ނަމަވެސް، މަދޮށިން ވަނީ އިތުރު ހިތްވަރެއްލައި ގިނަ ޕޮޓު ތަކެއްކޮށް މެޗުގެ ކުރި ހޯދާފައެވެ. މި މެޗު ނިމިގެން ދިޔައީ މަދޮށި 21 ހަލަވެލި 8 ކުން މަދޮށި ކުރި ހޯދައިގެންނެވެ. މި މެޗުގެ މޮޅު ކުޅުންތެރިޔަކަށް ހޮވުނީ މަދޮށި ހައުސްގެ ޖުމާން އުބައިދެވެ.
ޖޫނިއަރ މުބާރާތުގެ ވަނަތަށް.
އެންމެ މޮޅު ފަސްކުޅުންތެރިން ތެރޭގައި ހިމެނިފައިވަނީ ހަލަވެލި ހައުސްގެ އައިރީން ޢަބްދުލް މުޙްސިނާއި، ނުސައިބާ ޢަބްދުﷲ ޙަމީދާއި އިނާން އާދަމް އަދި ކުރެދި ހައުސްގެ ދެ ކުޅުންތެރިން ކަމަށްވާ ޒިލާ މުޙައްމަދާއި އައިނީ އިސްމާޢީލް ސިޔާމެވެ. އެންމެ ގިނަ ޕޮޓު ކުރި ކުޅުންތެރިޔާއަކަށް ހޮވުނީ ހަލަވެލި ހައުސްގެ އައިރީން އަބްދުލް މުހުސިނެވެ. އައިރީން ވަނީ މިމުބާރާތުގައި ޖުމުލަ 38 ޕޮޓްކޮށްފައެވެ. މި މުބާރާތުގެ އެންމެ މޮޅު ކުޅުންތެރިޔާއަކަށްވެސް ހޮވިފައިވަނީވެސް އައިރީންއެވެ. އެންމެ އުންމީދީ ކުޅުންތެރިޔާއަކީ ކުރެދި ހައުސްގެ ރުޙާ ބިންތު ރިޝްވާނެވެ.
ސީނިއަރ މުބާރާތުގެ ވަނަތަށް.
އެންމެ މޮޅު ފަސްކުޅުންތެރިންތެރޭގައި ހިމެނިފައިވަނީ މަދޮށި ހައުސްގެ ޖުމާން އުބައިދާއި، އީނާޘް ޒުރާރަތާއި މިޝްކާ މޫސާގެ އިތުރުން ހަލަވެލި ހައުސްގެ އައިޝަތު ޝައިހާ އާއި ރިދާ ބިންތު ޢަބްދުލް ވާޙިދެވެ.ޖުމުލަ 34 ޕޮޓްކޮށްގެން މި މުބާރާތުގެ އެންމެ ގިނަ ޕޮޓު ކުރި ކުޅުންތެރިޔާގެ މަޤާމާއި އެންމެ މޮޅު ކުޅުންތެރިޔާގެ މަޤާމް ހޯދާފައިވަނީ މަދޮށި ހައުސްގެ ޖުމާން އުބައިދެވެ. އެންމެ އުންމީދީ ކުޅުންތެރިޔާއަކީ ކުރެދި ހައުސްގެ އަރުޝީ މަޙުމޫދު ރަޝީދެވެ.