ހެޕަޓައިޓިސް އަކީ ފުރަމޭ ދުޅަވުމުގެ ބައްޔެވެ. މިއީ އާންމުކޮށް ވައިރަސްއެއް ނުވަތަ ވައިރަސްތަކެއްގެ ސަބަބުން ޖެހޭ ބައްޔެކެވެ. މޭގަނޑު ދުޅަކުރާ ހެޕަޓައިޓިސް ޖައްސާ 5 ވައްތަރެއްގެ ވައިރަސް ހުންނަކަންވަނީ ދެނެގަނެވިފައެވެ. މީގެ ތެރޭގައި ހިމެނެނީ ހެޕަޓައިޓިސް އޭ، ބީ، ސީ، ޑީ، އީ އަދި ޖީއެވެ. މީގެ ތެރެއިން މިލިޔުމުގައި ބަލާލާނީ ހެޕަޓައިޓިސް “ބީ”އަށެވެ.

ހެޕަޓައިޓިސް ބީ އަކީ ފުރަމޭ ނުވަތަ މޭގަނޑަށް ޖެހޭ ބައްޔެކެވެ. މިއީ ގައިންގަޔަށްއަރާ ނުރައްކާތެރި ބައްޔެކެވެ. މިއީ ބަލީގެ ކުރީކޮޅުގައި އަލާމާތްތައް ފެންނަ އަދި ދިގު މުއްދަތަކަށް ފަރުވާ ނަގަންޖެހޭ ބައްޔެކެވެ. މިކަމުގެ ސަބަބުން ބަލީގެ ތެރޭގައި ނުރައްކާތެރި އެހެން ބަލިތައް ޖެހުމަށް މަގުފަހި ކޮށްދެއެވެ. އެގޮތުން ޖެހޭ އެންމެ ނުރައްކާތެރި އެއް ބައްޔަކީ ފުރަމޭގެ ކެންސަރެވެ. ތަފާސްހިސާބުތައް ދައްކާގޮތުން ހެޕަޓައިޓިސް ޖެހިގެން މުޅިދުނިޔެއިން ކޮންމެ އަހަރަކު 6 ލައްކަ މީހުން މަރުވެއެވެ.

ހެޕަޓައިޓިސް ބީ ޖެހެނީ ކިހިނެތް؟

ހެޕަޓައިޓިސް ބީ ޖެހެނީ ހެޕަޓައިޓިސް ބީ ޖެހިފައިވާ މީހެއްގެ ހަށިގަނޑުން، އެހެން މީހެއްގެ ހަށިގަނޑަށް ބަލީގެ ވައިރަސް ސީދާ ވާސިލްވެގެންނެވެ. މިގޮތަށް ވައިރަސް ހަށިގަނޑުގެ ތެރެއަށް ވާސިލްވަނީ ހަށިގަނޑުގައި ހިމެނޭ ލެއާއި ދިޔައިގެ ސަބަބުންނެވެ. މީގެތެރޭގައި އަންހެނާގެ ކުރިމަތި ފަރާތުގައިވާ ތެތްކަން ނުވަތަ އަންހެނާގެ ކުރިމަތިފަރާތުން ބޭރުވާ ދިޔައާއި ފިރިހެނުންގެ މަނީގެ ދިޔަ ހިމެނެއެވެ. މިއީ އެއިޑްސް ބަލިވެސް ފެތުރޭ ގޮތެކެވެ.

ގިނަ ދިރާސާތަކުން ހޯދިފައިވާ ގޮތުގައި ހެޕަޓައިޓިސް ބީ ވައިރަހަށް ހަށިގަނޑުގައި ވަރަށްގިނައިރު ދިރިދެމިއޮތުގެ ޤާބިލްކަން ލިބިގެންވެއެވެ. ގާތްގަނޑަކަށް 7 ވަރަކަށް ދުވަސް ވަންދެން ހަށިގަނޑުގެ ބޭރުގައި މަރުނުވެ އޮތުމަށްފަހުވެސް، ލިބޭ ފުރުސަތެއްގައި ހަށިގަނޑުގެ ތެރެއަށް މިވައިރަސް ދެމިގަނެއެވެ.

ހެޕަޓައިޓިސް ބީ ޖެހިފައިވާ މީހަކު ބޭނުންކުރާ ތޫނުއެއްޗެއް އެހެން މީހަކު ބޭނުން ކުރުމުގެ ސަބަބުން މިބަލި އެމީހަކަށް ޖެހުމުގެ ފުރުސަތު އޮވެއެވެ. މިސާލަކަށް މަސްތުވުމަށް އެކަކު ބޭނުންކޮށްފައި ހުންނަ ސިރިންޖް ކަށި އެހެން މީހަކު ބޭނުންކުރުން ނުވަތަ އެކަކު ބޭނުންކުރާ ރޭޒަރު ތިލަ އެހެން މީހަކު ބޭނުންކުރުމަކީ ބަލިޖެހުމުގެ ފުރުސަތު އޮންނަ ކަމެކެވެ. ބަލި ޖެހިފައިވާ މީހަކާއެކު ޖިންސީ ގުޅުން ހިންގުމާއި، ހެޕަޓައިޓިސް ބީ ވައިރަސްހުރި ލޭ އެހެން މީހެއްގެ ގަޔަށް އެޅުމަކީވެސް ބަލިޖެހުމުގެ ފުރުސަތު އޮންނަކަމެކެވެ. ހެޕަޓައިޓިސް ބީ ޖެހިފައިވާ މައިމީހާގެ ފަރާތުން ބަނޑުގައިވާ ތުއްތު ދަރިފުޅަށް މިބަލި ޖެހުމުގެ ފުރުސަތު ވަރަށް ބޮޑެވެ.

ނޯޓް: ހެޕަޓައިޓިސް ބީ ޖެހިފައިވާ މީހަކާއި އެއްގެއެއްގައި އުޅުމާއި އެއްތަނެއްގައި މަސައްކަތްކުރުމާއި، ބަލިޖެހިފައިވާ މީހަކާއި ސަލާމްކުރުމާއި ކެއްސާ ކިނބިހިއެޅުން އަދި ގާތުން ކިރު ދިނުންފަދަ ކަންކަމުން މިބަލި އެކަކު ގައިން އަނެކަކުގެ ގަޔަށް ވާސިލެއް ނުވާނެއެވެ.

ހެޕަޓައިޓިސް ބީ ޖެހުމުގެ ފުރުސަތުބޮޑީ ކޮންބަޔަކަށް؟

ހެޕަޓައިޓިސް ބީ ޖެހިފައިވާ މީހަކާއެކު ރައްކާތެރި ނޫން ގޮތުގައި ޖިންސީ ގުޅުން ހިންގުމާއި، “މަލްޓިޕްލް ސެކްޝުއަލް ޕާރޓްނާރސް” ގެންގުޅުމަކީ ނުރައްކަލެކެވެ.  އެއްޖިންސުން ގުޅުން ހިންގުމާއި، ޖިންސީ ގުޅުމުން އަރާ އެހެން ބައްޔެއް ޖެހިފައިވާ މީހުންނާއި ގިނަގިނައިން ލޭ އަޅަންޖެހޭ މީހުންނާއި، ޑަޔަލިސިސް ހަދަމުންދާ މީހުންނާއި، އެއް ކަށި ނުވަތަ ރޭޒަރ ބޭނުންކުރާ މީހުންނާއި ހެޕަޓައިޓިސް ބީ ޖެހިފައިވާ މައިންނަށް ލިބޭ ތުއްތުކުދިންނަކީ މިބަލި ޖެހުމުގެ ފުރުސަތު ބޮޑުމީހުންނެވެ. މީގެ އިތުރުން ސިއްޙީ ދާއިރާގައި މަސައްކަތްކުރާ މީހުންނަށް މިބަލި ޖެހުމުގެ ނުރައްކާ ބޮޑެވެ.

ހެޕަޓައިޓިސް ބީގެ އަލާމާތްތައް:

ހެޕަޓައިޓިސް ބީގައި އާންމުކޮށް ފެންނަ އަލާމާތްތަކަކީ، ގައިގެ ހަމާއި ލޯ ރީނދޫވުމާއި، ބަނޑު ފުއްޕުމާއި، ގައިކެހުން، އާދައިގެ ވަރަކަށް ހުންއައުން، ކުޑަކަމުދާ އެއްޗެހި ގަދަ ރީނދޫ ކުލައިގައި ހުރުން، ހަށިގަނޑު އަނަރޫފަ ވުމާއި ކާހިތް ނުވުން ފަދަ އަލާމާތްތަކެވެ. (ހެޕަޓައިޓިސް ބީ ލީފްލެޓް 2002-ޑީޕީއެޗް)

ހެޕަޓައިޓިސް ބީ އިން ރައްކާތެރިވުން:

ހެޕަޓައިޓިސް ބީއިން ރައްކާތެރިވުމަށް ކުރެވޭ އެންމެ މުހިންމު އެއްކަމަކީ ހެޕަޓައިޓިސް ބީގެ ވެކްސިން ޖެހުމެވެ. މިއީ ކޮންމެ މީހަކަށްވެސް ޖެހިދާނެ ވެކްސިނެކެވެ. މީގެ އިތުރުން ލޭއެޅުމުގެ ކުރިން އަޅާ ލެއަކީ ހެޕަޓައިޓިސް ބީއަށް ޓެސްޓް ކުރެވިފައިވާ ރައްކާތެރި ލެއެއްތޯ ޔަގީންކުރުމާއި، ދީނުގެ ހަމަތަކުގެ މަތީން ރައްކާތެރި ގޮތުގައި ޖިންސީ ގުޅުމުގެ އަމަލުތައް ބެހެއްޓުމާއި، ބޭސްފަރުވާ ކުރާތަންތަނުގައި ރައްކާތެރިކޮށް ޖަރާސީމުން އެއްކިބާ ކުރެވިފައިވާ އާލާތްތައް (ސިރިންޖް، ތިލަފަދަ ތަކެތި) ބޭނުންކުރުމަކީ ރައްކާތެރިކަމުގެ ގޮތުން އެޅިދާނެ ފިޔަވަޅުތަކެކެވެ.