ސްޓްރެސް އަކީ ދިރިއުޅުމުގައި ކުރިމަތިވާ ކަމަކާއި ގުޅިގެން ހަށިގަނޑު ވަކިކަމަކަށް ނުވަތަ ކަންތައްތަކަކަށް ޑިމާންޑް ކުރުމެވެ. މިއީ ހިތާމަވެރިކަމަށް ނުވަތަ އުފާވެރިކަމަކަށްވެސް ވެދާނެއެވެ. އެހެން ގޮތަކަށް ބުނާނަމަ މިއީ ހިތާއި ސިކުނޑިއަށް ކަންބޮޑުވެގެން ކުރާ ބާރެކެވެ. ސްޓްރެސް އަކީ ހަމައެކަނި ހާސްވެ ކަންބޮޑުވުމެއްވެސް ނޫނެވެ. ސްޓްރެސްގެ ސަބަބުން އިންސާނާގެ ހަށިގަނޑަށް ވަރަށް ބޮޑު އަސަރުތަކެއް ކޮށްފާނެއެވެ.
ސްޓްރެސް ކުރިމަތިވަނީ ކިހިނެތް؟
ބައެއް ފަހަރު ސްޓްރެސްއަކީ ނުރައްކަލެއް ތިމާއަށް ކުރިމަތިވެދާނެކަމަށް ބިރުހީވެ، އެނުރައްކަލެއްގެ ވަށައިގެން ހިނގައިފާނެ އިތުރު ކަންތައްތަކަކަށް ސިކުނޑި ހުޅުވާލުމުން ކުރިމަތިވާ ހާލަތަކަށް ވެދެއެވެ. މިސާލަކަށް ރޭގަނޑު އެކަނި ނިދަން އޮއްވައި ދޮރުގައި މީހަކު ޓަކިދެނީއެވެ. ފަހަރުގައި އެއީ ގޯސްކަމެއް ވާންއުޅެނީ ކަމަށްވެސް ވެދާނެއެވެ. އެފަދަ ހާލަތްތަކުގައި ވަރަށް ގިނަ ކަންކަމާއި ކުޑަ ވަގުތުކޮޅެއްގެ ތެރޭގައި ވިސްނާލަންޖެހިދާ ފަހަރު އާދެއެވެ. ގަޑިބަލާލެވުމާއި، ދޮރުގައި ޓަކި ދެނީ ކާކުބާއޭ ހިތަށްއަރައި ނުތަނަވަސްކަމެއް އުފެދެންފަށާފާނެއެވެ.
ވަގުތުން ތިމާގެ ހަށިގަނޑު އޭގެ ޒާތުގައި އެކަމަށް ސަމާލުކަން ގެނެސްދޭނެ ބިރުވެރިކަމަށް އުފައްދަނީއެވެ. ކުއްލިއަކަށް ލޭގެ ތެރޭގައި ހޯމޯންސް އިތުރުވެ ހިއްސުތައް ހޭލައްވާލަނީއެވެ. ދޮރުހުޅުވާނީ ބާއޭ ނުވަތަ ކަމެއް ދިމާވެއްޖެނަމަ ދެން ހަދާނީ ކިހިނެތްތޯވެސް ވިސްނަން ފެށެއެވެ. އެ ބިރުވެރިކަމަށް ހަށިގަނޑު އަމިއްލަ ޒާތުގައި ތައްޔާރުވެސް ކުރެވެނީއެވެ. ސްޓްރެސް އަކީ މިފަދަ ގޮތަކަށް ކޮންމެ މީހަކަށްވެސް ކުރިމަތިވެދާނެ ކަމެކެވެ.
ސްޓްރެސްވާން ދިމާވާ ސަބަބުތަކަކީ ކޮބާ؟
މީހަކު ސްޓްރެސް އަށް ހުށަހެޅުމަށް ވަރަށް ގިނަ ސަބަބުތައް މެދުވެރިވެދާނެއެވެ. އެކަމެއް ބިނާވެގެންވަނީ އެމީހަކަށް ކުރިމަތިވާ ކަމެއްގެ މައްޗަށެވެ. އާންމު ގޮތެއްގައި ކުރިމަތިވާ ހިތްދަތިކަމެއް ނުވަތަ ހިތާމައެއްގެ ސަބަބުން ސްޓްރެސް ވެދާނެއެވެ. މިސާލަކަށް ތިމާގެ ގާތް މީހަކު ނިޔާވުން، ނުވަތަ ބޮޑު ބައްޔެއްހުރިކަން ފާހަގަވުން ކަހަލަ ކަމެއް ދިމާވުމެވެ. އާއިލާ ތަކުގެ ތެރޭގައި ދިމާވާ މައްސަލަތަކާއި، މަސައްކަތްތައް ކުރުމުގައި ވަގުތު ހެޔޮގޮތުގައި ބޭނުން ނުކުރެވުން ފަދަ މައްސަލަތަކެވެ. ދަރަންޏާއި ފައިސާއާއި ގުޅުންހުރި މައްސަލަތަކާއި ވަޒީފާ އަދާކުރާ މާޙައުލުގައި ކުރިމަތިވާ މައްސަލަތަކާއި، އެކަނިވެރިކަން މާބޮޑަށް އިހްސާސް ކުރަންޖެހުމާއި ބުލީކުރުން ފަދަ މައްސަލަތަކަކީ ސްޓްރެސް ވުމަށް މެދުވެރިވެދާނެ ސަބަބުތަކުގެ ތެރޭގައި ހިމެނޭ ކަންކަމެވެ.
ސްޓްރެސްވުމުން ފާހަގަވެދާނެ ކަންކަމަކީ ކޮބާ؟
ސްޓްރެސްއަށް މީހާގެ ހާލަތު ދިއުމުން ދިމާވާ ހާލަތެއްގެ ބާވަތުން ވަރަށް ގިނަ ކަންކަން ފާހަގަކުރެވޭނެއެވެ. މީގެތެރޭގައި ލޭގެ ޕްރެޝަރު މައްޗަށް ދިއުމާއި، އަވަސް އަވަހަށް ރުޅިގަދަވުމާއި، ވިސްނުމުގެ ގާބިލްކަން ދަށްވުމާއި ނިދަން އުނދަގޫވުންކަހަލަ ކަންކަން ކުރިމަތިވެދާނެއެވެ. ހަށިގަނޑަށް އެކިކަހަލަ އުނދަގޫވުމާއި، ކަންކަމުގައި ރައްކާތެރިކަމެއް ނެތްކަމަށް އިހްސާސްވާން ފެށުމާއި، ކަންކަމުގައި ފަސޭހައިން ހިތްހަމަ ނުޖެހުމާއި، ދެރަވެ ރޮވުމާއި، ކަންކަމުގައި ފަރުވާކުޑަވުމާއި މީހުންނާއި ކުރިމަތިލާން ބޭނުން ނުވުން ކަހަލަ ކަންކަން ކުރިމަތިވެއެވެ. އަދި ދުންފަތުގެ އިސްތިއުމާލުކުރުމާއި މަސްތުވާތަކެތި ބޭނުންކުރުން ކަހަލަ ގޯސް ކަންކަމުގެ ތެރެއަށް ތިމާ ގެންގޮސް އެކަންކަމަކީ ހައްލެއްކަމުގައި އިހްސާސް ކުރެވޭގޮތް ދިމާވެއެވެ.
މާބޮޑަށް ސްޓްރެސް ވެފައިވާނަމަ، ކުރާ މަސައްކަތްތައް ހަމަޖެހިލައިގެން ކުރަން އުނދަގޫވުމާއި، ވިސްނަން ފެށޭކަމެއް ކޮޅެއްގައި ނުޖެހި އިތުރު ކަންކަމަށް ވިސްނެން ފެށުމާއި، އަމިއްލަ ނަފްސަށް އިތުބާރުކުޑަވެ، ކަންކަން އަމިއްލައަށް ނިންމުމުގައި ދަތިވުމާއި، އަބަދުވެސް ތިމާ ބޭނުންވާ ގޮތަށް ކަންކަން ގެންދެވޭތޯ މަސައްކަތް ކުރެވޭ ފަހަރު އާދެއެވެ.
ސްޓްރެސްއާއި ކުރިމަތިލުން:
ސްޓްރެސް އަކީ އަމިއްލައަށްވެސް ރަނގަޅުކުރެވިދާނެ ކަމެކެވެ. ބައެއް ހާލަތްތަކުގައި ބޮޑުވަރު ވެއްޖެނަމަ، ސިއްޙީއެހީތެރިއެއްގެ ލަފާގެ މަތީން ބޭސް ބޭނުންކޮށްގެން ވެސް، ސްޓްރެސް ރަނގަޅުކުރެވެއެވެ. ކަސްރަތު ކުރުމަކީ ލޭދައުރުކުރާ ނިޒާމްގެ ހިނގުން ރަނގަޅުވެ ސިކުނޑިއަށް އަރާމު ގެނުވައިދޭ ކަމަކަށްވާއިރު، ކަސްރަތުން ސްޓްރެސް ދުރުކޮށްދޭކަމަށް ވަރަށް ގިނަ ދިރާސާތުން ދައްކާފައިވެއެވެ. މީގެ އިތުރުން ކުރިމަތިވާ ކަންކަމުގައި އިތުބާރުކުރެވޭ އެހެން މީހުންނާއި ހިއްސާކޮށް ތިމާއަށްވުރެ ފެންވަރު ދަށް ނިކަމެއްޗަކުވެސް، ރަނގަޅު ޚިޔާލެއް ދީފާނެކަމަށް ގަބޫލުކޮށް މަޝްވަރާ އިސްކުރުމަކީ މުހިންމު ކަމެކެވެ. ވީހާވެސް ގިނައިން އަރާމުކުރުމާއި، ހަށިގަނޑަށް ފައިދާހުރި ކާނާކެއުމާއި، ވަގުތު ހެޔޮގޮތުގައި ބޭނުންކުރެވޭތޯ ބަލަންވާނެއެވެ.
ބައެއް މީހުންނަށް ގަބޫލުކުރެވިފައި އޮންނަނީ ދުންފަތުގެ އިސްތިއުމާލުކުރުމަކީ ބޭކާރު ކަންކަމުން ވިސްނުން ދުރުކޮށްދޭނެކަމެކެވެ. އެހެން ނަމަވެސް އެއީ ކުށްހީއެވެ. ދުންފަތުގެ އިސްތިއުމާލުކުރުމަކީ ހަގީގަތުގައި ހިތްހަމަޖެހުމަށްވުރެ މާބޮޑަށް ހިތް ނުތަނަވަސްވެސް ކުރުވާ ކަމެކެވެ. އެހެންކަމުން މިފަދަ އަމަލުތަކުން ދުރުހެލިވުމަކީ ބޭނުންތެރިކަމެކެވެ.
