ހާޓްއެޓޭކް ޖެހުމޭ ބުނެވެނީ ހިތުގެ މަސްގަނޑަށް ދާއިމީ ސިފައެއްގައި ގެއްލުމެއްވުމަށް ނުވަތަ ހިތުގެ މަސްތަކަށް ލޭ ދައުރުކުރާ މިންވަރު މަދުވުމަށެވެ. މި ކަމަށް ސިއްޙީ ދާއިރާގައި ބޭނުންކޮށް އުޅޭނަމަކީ “މަޔޯކާޑިއަލް އިންފާކްޝަން” އެވެ. އެހެން ގޮތަކަށް ބުނާނަމަ މިއީ ހިތަށް ބޭނުންވާވަރަށް ލޭ ނުލިބުމުގެ ސަބަބުން ހިތުގެ މަސްގަނޑު ނުވަތަ މަސްގަނޑުން ބައެއް މަރުވުމޭވެސް ބުނެވިދާނެއެވެ.
ހާޓްއެޓޭކް ޖެހެނީ ކިހިނެތް؟
ހާޓްއެޓޭކެއް ޖެހެން ދިމާވަނީ ހިތަށް ލޭ ފޯރުކޮށްދޭ ހޮޅީގެ ތެރޭގައި އެތިކޮޅެއް ތާށިވެ ހިތުގެ ވަކިހިސާބަކަށް ލޭ ފޯރުކޮށްދިނުން މަދުވުމުގެ ސަބަބުންނެވެ. މައިގަނޑު ގޮތެއްގައި ހިތަށް ލޭފޯރުކޮށްދޭ މައި ނާރު (ކޮރޯނަރީ އާޓަރީ) ބެދުމުގެ ސަބަބުންނެވެ. ހާޓްއެޓޭކް ޖެހުމުގައި ދެގޮތެއް ވެއެވެ. ފުރަތަމަ ގޮތަކީ ލޭ ދައުރުކުރާ ހޮޅީގައި ގަނޑުލޭ ކޮޅެއް އުފެދި، ލޭހޮޅި ބެދޭގޮތް ވުމެވެ. ލޭ ހޮޅީގެ ތެރޭގައި ގަނޑުލޭ އުފެދުމަށް ދިމާވާ އެއް ސަބަބަކީ ލޭހޮޅި ހަރުވެ ހޮޅީގެ އެތެރެބައި ބޯވުމެވެ. މިއީ ވަރަށް ގިނަދުވަހުން ކުރިމަތިވާނެކަމެކެވެ. ހާޓްއެޓޭކް ޖެހުމަށް ދިމާވާ ދެވަނަ ގޮތަކީ، ލޭދައުރުކުރާ ހޮޅި ހިމަވުމެވެ. ނުވަތަ ފިތުމެވެ. މިގޮތަށް ދިމާވެއްޖެނަމަ، ލޭހޮޅީގެ ހޮއި ކުޑަވެއެވެ. މިގޮތަށް ހޮއި ކުޑަވާ ނިސްބަތަކުން އެހޮޅިއަކުން ހިތަށް ލޭ ގެންގޮސްދޭ މިންވަރު މަދުވެއެވެ.
ހާޓް އެޓޭކެއްޖެހި ފަރުވާ ދިނުމުގައި ލަސްވެގެން ދާނަމަވެސް، ހިތުގެ މަސްތަކަށް ގެއްލުން ލިބެއެވެ. އެހެންކަމުން މި ބަލީގައި އާންމުކޮށް ފެންނަ އަލާމާތްތައް އެނގި އެކަމަށް ހޭލުންތެރިވުމަކީ މުހިންމުކަމެކެވެ.
ހާޓްއެޓޭކްގެ އާންމު އަލާމާތްތަކަކީ ކޮބާ؟
ހާޓްއެޓޭކްގެ އަލާމާތްތައް ވަރަށް ގިނައެވެ. އެއްފަހަރު ހާޓްއެޓޭކް ޖެހިފައިވާ މީހާއަށްވެސް ދެވަނަ ފަހަރު އެކަން ދިމާވުމުން އެއީ ހާޓްއެޓޭކްއެއްކަން ފާހަގަ ނުކުރެވިދާނެއެވެ. ހާޓްއެޓޭކް ޖެހުމުގެ އުނދަގޫތައް އާންމުކޮށް ފެށިގެން އަންނަނީ ލަސްލަހުން އިތުރުވަމުން އަންނަ އުނދަގޫތަކެއްގެ ސިފައިގައެވެ. ކުއްލިއަކަށް ނުވަތަ ކުޑަވަގުތު ކޮޅެއްގެ ތެރޭގައި އުނދަގޫކުރިމަތިވެ، ނުރައްކާވަނީ މަދުފަހަރެއްގައެވެ. ހާޓްއެޓޭކެއްޖެހި އެކަމުގެ އަލާމާތްތައް އާންމުކޮށް ފެންނަން ފަށަނީ ހާޓް އެޓޭކް ޖެހި ހިތް ހިނގުމުގެ ހަމަ ގެއްލޭތާ ގަޑިއެއްހާއިރު ތެރޭގައެވެ.
- އެންމެ އާންމު އެއް އަލާމާތަކީ މެޔަށް އޮއްބައި ވާންވެ، ފިއްތާ ބާރުވާކަހަލަ ގޮތަކަށް މޭގައި ރިހުމެވެ.
- މޭގައި ދިލަ ނަގާކަހަލަ ތަދެއް ފާހަގަވުން
- މެއަށް އަރާތަދު، ކޮނޑުހުޅާއި އަތް، ކަރުދަށާއި ބުރަކައްޓަށް ފެތުރުން (ގިނަފަހަރަށް ވާތްފަރާތަށް)
- މެއަށް އަރާ މިފަދަ ތަދު 30 މިނެޓަށްވުރެ ދިގުލައިފިނަމަ، އެންމެ އެކަށީގެންވަނީ ހިތްހުއްޓުމުގެ އަލާމާތަކަށެވެ.
- މެއަށް ތަދުވުމާއެކު މޭނުބައިކޮށް ހޮޑުލެވުން
- ހިތް އަވަސްވުން/ މޭ ބާރަށް ތެޅުން ނުވަތަ ވިންދު ޖެހުމުގެ ހަމަ ގެއްލުން
- ނޭވާކުރުވުން
- މާގިނައިން / އަވަސް އަވަހަށް ދާހިތްލުން
- ހޭނެތުމާއި އަނބުރައިގަތުން
- ހަމާއި ނިޔަފަތި އަދި ތުންފަތާއި ދުލުން ލޭ މަދުވާކަމަށް ފާހަގަވުން
- ފިނިވިޔަސް އަދި ފިނި ނުވިޔަސް ދާހިތްލުން ފަދަ އަލާމާތްތައް ފާހަގަކުރެވޭނެއެވެ.
ހާޓް އެޓޭކް ޖެހުމުގެ ކުރިން އޭގެ އަލާމާތެއް ނުވަތަ އުނދަގުލެއް ފާހަގަވުމެއްނެތި، ހާޓްއެޓޭކް ޖެހުން އާންމުކޮށް މެދުވެރިވަނީ ހަކުރު ބަލީގެ މީހުންނާއި ހިތް ބަދަލުކުރުން ފަދަ އޮޕަރޭޝަންތައް ކޮށްފައިވާ މީހުންނާއި އުމުރުން ދުވަސްވީ މީހުންނަށެވެ.
ހާޓްއެޓޭކެއް ޖެހިއްޖެނަމަ ދެން ހަދާނީ ކިހިނެތް؟
ހާޓްއެޓޭކެއްގެ ކުޑަނަމަވެސް އަލާމާތެއް ފެނިއްޖެނަމަ، ވީހާވެސް އަވަހަކަށް ހަށިގަނޑުން ވާގިދޫކޮށްލަން ބުނަންވާނެއެވެ. އަދި ހަމަ ތަނެއްގައި މީހާ ބާއްވާލަންވާނެއެވެ. ސިއްޙީ ފަރުވާދޭ މަރުކަޒަކާއި ހަމައަށް މީހާ ގެންދާއިރު ވީވަރަކުން ނުގުޑުވާ ވޭތޯ ބެލުން މުހިންމެވެ.
ހާޓްއެޓޭކް ޖެހުމުން ރައްކާތެރިވުމަށް ކުރެވޭނީ ކޮންކަމެއް؟
ދުންފަތުގެ އިސްތިޢުމާލު ކުރުމުން ދުރުހެލުވުމަކީ ހިތުގެ ބަލިތަކުން ސަލާމަތްވުމަށް ކުރެވޭނެ އެންމެ މުހިންމު އެއްކަމެވެ. މީގެ އިތުރުން ދުމުން ރައްކާތެރިވުމާއި، ކޮލެސްޓްރޯލް މަތިވިޔަ ނުދިނުމާއި، ހަށިގަނޑަށް އެކަށޭނެ މިންވަރެއްގައި ލޭގެ ޕްރެޝަރ ބެހެއްޓުން ވަރަށް މުހިންމެވެ. ހަށިގަނޑުގެ ބަރުދަން ހަމަ އިމުގެ ތެރޭގައި ބެހެއްޓުމާއި، ހަށިގަނޑަށް ފައިދާހުރި ކާނާ ވީހާވެސް ގިނައިން ބޭނުންކުރުމާއި، އާއިލީ ދިރިއުޅުމާއި، ވަޒީފާގެ މާހައުލު އަދި އާންމު ދިރިއުޅުމުގައިވެސް ހާސްވެ ފިކުރުކުރުން ދުރުކޮށްދޭނެފަދަ ގޮތަކަށް ކަންކަން ރޭވިފައި ހުރުމަކީ ބޭނުންތެރިކަމެކެވެ. މީގެ އިތުރުން ވީހާވެސް ބޮޑަކަށް ހެލިފެލިވެ އުޅުމާއި، ގަވާއިދުން ކަސްރަތު ކުރެވޭތޯ ބަލަންވާނެއެވެ.
