ޙައްޖު އަދި ޢުމްރާގެ އަޅުކަމަށް ގޮސް އުޅުއްވާ ފަރާތްތަކަށް ވަރަށް ގިނަފަހަރު ސިއްޙީއެކިއެކި މައްސަލަތަކާއި ކުރިމަތިވެއެވެ. ގިނަ ފަހަރަށް އާންމު ބަލިތައް ނުވަތަ ރޯގާގެ މައްސަލަތަކެވެ. ރޯގާ ފަސޭހަކަމާއެކު ގައިންގަޔަށް އެރުމާއި، އަޅުކަމުގައި ގިނަ މީހުންތަކެއް އެކުވެގެން އުޅުމުގެ ސަބަބުން މިފަދަ ސިއްޙީ ކަންކަން ދިމާވުން އޮންނަނީ އާންމުކަމަކަށް ވެފައެވެ. މި ލިޔުމުގައި މި ބަލާލަނީ ޙައްޖާއި އުމްރާގެ އަޅުކަމަށް ފުރުމުގެކުރިން ސިއްޙީގޮތުން ފަރުވާތެރިކަން ބެހެއްޓުން މުހިންމު ކަންކަމަށެވެ. މިއީ ދިވެހިރާއްޖޭގައި ޙައްޖުވެރިންނަށް ދަތުރުގެ ކުރީން ފޯރުކޮށްދޭ އާންމު މަޢުލޫމާތެވެ.

ޙައްޖުގެ އަޅުކަމަށް ފުރުމުގެ ކުރިން ސިއްޙީގޮތުން އަޅަންޖެހޭ އެންމެ މުހިންމު އެއް ފިޔަވަޅަކީ ޙައްޖަށް ފުރުމުގެ ކުރިން ޖަހަންޖެހޭ ހުރިހާ ވެކްސިނެއް ޖަހައި ހަމަކުރަންވާނެއެވެ. އެގޮތުން ދެވޭ ވެކްސިންތަކަކީ ފޯލިއޯ، މެނިންޖައިޓިސް އަދި އިންފުލުއެންޒާ އިން ރައްކާތެރިވުމަށް ދެވޭ ވެކްސިނެވެ.

ޙައްޖުގެ އަޅުކަމަށް ދުރުވާ ފަރާތްތަކުގެ ތެރެއިން ދާއިމީ ގޮތެއްގައި ބައްޔަކަށް ފަރުވާކުރަމުން އަންނަ ފަރާތްތަކުން، އެ ފަރާތްތަކުން އާންމުކޮށް ދައްކަވާ ޑަކްޓަރަށް ދައްކަވައި ލަފާ ހޯއްދެވުން މުހިންމެވެ. އަދި ދާއިމީކޮށް ބޭސްކަމުން އަންނަނަމަ، ޙައްޖަށް ފުރުމުގެ ކުރިން މަދުވެގެން ދެ މަސްދުވަހުގެ ބޭސް ގެންދަންވާނެއެވެ. މީގެ އިތުރުން ސިއްޙީކަމެއް ކުރިމަތިވެދާނެކަމަށް ބަލައި، މިހާރު ފަރުވާކުރަމުންދާ ބަލިތަކާއި ގުޅޭ ލިޔުންތަކާއި މެޑިކަލް ރިޕޯޓްތައް ގެންދަންވާނެއެވެ.

ޙައްޖުގެ އަޅުކަމުގައި ގޮސް އުޅުމުގެ ތެރޭގައި އެންމެ އާންމުކޮށް ދިމާވާ ސިއްޙީ މައްސަލަތަކަކީ ކޮބައިކަން ކުރީބައިގައި އެނގި އޮޅުން ފިލާފައި އޮތުމަކީވެސް ބޭނުންތެރިކަމެކެވެ. އެގޮތުން އެންމެ އާންމުކޮށް ކުރިމަތިވާ ސިއްޙީ މައްސަލަތަކަކީ އަރިދަފުސް ރޯގާ، އިންފުލުއެންޒާ، ވައިރަލް ހުމެވެ. ކާނާ ވިހަވުމާއި ބޭރަށް ހިންގައި ހޮޑުލެވުން އަދި ގޭސްޓްރައިޓިސް (ގޭސް އެރުން) އާއި މެނިންޖައިޓިސް ޖެހެއެވެ. މެނިންޖައިޓިސްއަކީ އޭގެ ސަބަބުން ކުއްލި އުނދަގޫތަކާއި ވޭނީ އިހްސާސްތަކެއް ކުރިމަތިކުރުވާ އަދި އަވަސް ފަރުވާ ބޭނުންވާ ނުރައްކާތެރި ބައްޔެކެވެ. ފަރުވާ ނުކުރެވި ލަސްވާނަމަ، ސިކުނޑިއަށް ގެއްލުން ލިބި، ހަށިގަނޑުން ވާގިނެތުމާއި ސިކުނޑިމަރުވެ ހިތުގެ ހިނގުމަށް ބުރޫއަރައި މަރާއި ކުރިމަތިލާންޖެހުމަކީ ވެދާނެކަމެކެވެ. އެހެންވެ މި ބަލިން ރައްކާތެރިވުމަށް ދެވޭ ވެކްސިން ޙައްޖައް ފުރުމުގެ ކުރިން ކޮންމެ މީހަކަވެސް ދިވެހި ރާއްޖޭގައި ދީއުޅެއެވެ. އިތުރު ސިއްޙީ މައްސަލަތަކަށް ބަލާއިރު، މާރސް ކޮރޯނާ ވައިރަހާއި އަންހެނުންނަށް މައްސަރުކަންތައް ކުރިމަތިވުމާއި، އެކި ކަހަލަ ކުދި އަނިޔާ ނުވަތަ ހާނިއްކަ ލިބުމަކީ އާންމުކޮށް ދިމާވާކަންކަމެވެ. ޙައްޖުގެ އަޅުކަން ވެވޭ ބިމަކީ އާންމުކޮށް ހޫނު ތަނަކަށްވާތީ، ހަށިގަނޑުން ފެންމަދުވުން ނުވަތަ ޑީހައިޑްރޭޓް ވުމަކީ ވެދާނެކަމެކެވެ.

ދުނިޔޭގެ އެކި ހިސާބުތަކުން ވަރަށް ގިނަ ޢަދަދަކަށް މީހުން ޙައްޖުގެ އަޅުކަމަށް ގޮސް އުޅޭތީ ފަސޭހަކަމާއެކު އާންމު ބަލިތަށް ފެތުރިގެން ދިއުމަށް ފުރުސަތު އޮންނާތީ އެކަމުން ރައްކާތެރިވުމަށް ކުރެވެންހުރި ކަންކަން ކުރުމަށް ޚާއްސަ ސަމާލުކަމެއް ދޭންވާނެއެވެ. އެގޮތުން ކުރިން މިދެންނެވުނު ގިނަ ބައްޔަކީ އަމިއްލަ ސާފުތާހިރުކަމަށް ސަމާލުކަން ދެއްވުމުން ރައްކާތެރި ވެވޭނެ ބަލިތަކެކެވެ. އެހެންކަމުން، ތިމާ ދިރިއުޅޭ ކޮޓަރިއާއި ފާޚާނާ ސާފުކޮށް ބެލެހެއްޓުމާއި، ކާބޯތަކެތި ތައްޔާރު ކުރުމުގެ ކުރިންނާއި ކެއުމުގެ ކުރިން އަދި ފަހުންވެސް ރަނގަޅަށް އަތްދޮވުމާއި މާސްކް އެޅުމަކީ ބަލިތަކުން ރައްކާތެރިވުމަށް އެހީތެރިވެދޭނެކަމެކެވެ. މީގެ އިތުރުން މޭވާއާއި ތަރުކާރީ ރަނގަޅަށް ދޮވެގެން ބޭނުންކުރުމާއި ކޮންމެ ދުވަހަކު ފެންވެރުމާއި އަބަދުވެސް ސާފުތާހިރުކޮށް ހުރުމަށް ސަމާލުކަން ދޭންވާނެއެވެ.

ޙައްޖުގެ އަޅުކަންވެވޭ މާޙައުލަކީ ހޫނުތަކަށްވާތީ އަދި ބިންގަނޑު ހޫނުވާނެތީ ފަޔަށް ރައްކާތެރިވެ ރަނގަޅު ފައިވާނެއް ބޭނުންކުރުމާއި ހަށިގަނޑުން ފެންމަދުވާނެކަމަށް ގިނައިން ފެންބުއިން މުހިންމެވެ. ދާއިމީ ބައްޔަކަށް ބޭސްކުރާ ފަރާތްތަކުން ގަޑިން ގަޑިއަށް ބޭސްކެއުމާއި، ކެއްސާ ކިނބިހި އަޅާއިރު އަނގަޔާއި ނޭފަތް ޓިޝޫ ފަދަ އެއްޗަކުން ނިވާކުރުމަށް ސަމާލުކަން ދޭންވާނެއެވެ.

މާރސް ރޯގާއަކީ ޖަމަލުގެ ކިބައިންޖެހޭ ބައްޔަކަށްވާތީ، ކޮންމެހެން ބޭނުންޖެހިގެން ނޫނީ ޖަމަލުގައި އަތްނުލުމާއި ވަލުޖަނަވާރާއި އޮޅުކުރި ޖަނަވާރުގައި އަތްނުލުމަށް ސަމާލުކަން ދޭންވާނެއެވެ. މާރސް ރޯގާގެ ވައިރަސް ހަށިގަނޑަށް ވާސިލްވާ ދުވަހުން ފެށިގެން 14 ދުވަސް ތެރޭގައި، ހުންއައުމާއި ކެއްސުމާއި ނޭވާލާން އުނދަގޫވުން ފަދަ އަލާމާތްތައް ފެންނާނެއެވެ.

ސަމާލު: ޙައްޖުގެ އަޅުކަމުގެ ތެރޭގައި ހުމާއެކު ރޯގާޖެހި ނޭވާލާން އުނދަގޫވާނަމަ، އަދި ބައްޔެއް ވެއްޖެނަމަ ލަސްނުކުރައްވައި ސިއްޙީ އެހީތެރިއަކަށް ދެއްކެވުމަށް ސަމާލުކަން ދޭންވާނެއެވެ. ޙައްޖުގެ އަޅުކަމަށްފަހު 14 ދުވަސް ތެރޭގައި ހުމާއި ރޯގާޖެހި ނޭވަޔަށް އުނދަގޫވާނަމަ ރާއްޖޭގައި އެކަމަށް ޚާއްސަކުރެވިފައިވާ ފްލޫ ކްލިނިކްތަކުން ފަރުވާ ހޯއްދަވާ!