ކޮމެޓީ ރިވިއު 2024 | އަންހެނުންގެ ތަރައްޤީއަށް 43786.30ރ ޚަރަދުކުރި

ކޮމެޓީ ރިވިއު 2024 | އަންހެނުންގެ ތަރައްޤީއަށް 43786.30ރ ޚަރަދުކުރި

185118181 10159801269727642 1728469074780421447 N

ކޮމެޓީ ރިވިއު 2024 | އަންހެނުންގެ ތަރައްޤީއަށް 43786.30ރ ޚަރަދުކުރި

ލިޔުން ކިޔާލެވޭނީ ގާތްގަޑަކަށް 4 މިނިޓުން

ރަށްރަށުގެ ތަރައްޤީއަށް ކުރެވޭ މަސައްކަތްތަކުގައި އެރަށްރަށުގެ އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކަށް ޒިންމާ މަތިކުރެވިފައިވަނީ މުހިންމު ކަންތައްތަކެކެވެ. މި ކޮމެޓީތަކުން ރަށްރަށުގެ ތަރައްޤީއަށް ގިނަ މަސައްކަތްތަކެއް ކުރަމުންދެއެވެ. އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކުގެ މަޤްޞަދަކީ ކައުންސިލްތަކުން ތަރައްޤީއަށް ކުރާ މަސައްކަތްތަކަށް ލަފައާއި މަޝްވަރާ ދިނުމާއި އަންހެނުންގެ ތަރައްޤީއަށާއި ކުރިއެރުމަށްޓަކައި ކުރަންޖެހޭ އެންމެހައި ކަންކަން ރާވައި ހިންގުމެވެ. މިކަންކަން ކުރުމަށް އެކޮމެޓީތަކަށް މަސްޢޫލިއްޔަތުތަކަކާއި ބާރުތަކެއްވަނީ ޤާނޫނާއި ޤަވާއިދުތަކުން ދީފައެވެ. މި ރިޕޯޓުގައި ބަލާލެވިފައިވަނީ ނިމިދިޔަ 2024 ވަނަ އަހަރު ދަރަނބޫދޫ އަންހެނުންގެ ތަރައްޤީއަށް ކުރެވިފައިވާ މަސައްކަތްތަކުގެ ތެރެއިން މިދެންނެވުނު ބާރުތަކާއި މަސްޢޫލިއްޔަތުތަކާއި ގުޅުންހުރި ކަންކަމުގެ މައްޗަށެވެ. ރިޕޯޓަށް މަޢުލޫމާތު ހޯދާފައިވާނީ ސީދާ ކޮމެޓީގެ ބައިވެރިވުމާއެކު ދަރަނބޫދޫ ކައުންސިލުންނެވެ.

ކޮމެޓީގެ އާމްދަނީ:

ތަރައްޤީގެ ރޮނގުގައި އެހެން ބައެއް އަންހެނުންގެ ކޮމެޓީތަކާއި އަޅާބަލާއިރު، ދަރަނބޫދޫ އަންހެނުންގެ ކޮމެޓީއަކީ އާމްދަނީ ހޯދުމުގެ ވަސީލަތްތައް މަދު ކޮމެޓީއެކެވެ. ކޮމެޓީގެ މިދައުރާއި ކުރިން ނިމިދިޔަ ދައުރުތަކުން އެކޮމެޓީއަށް މައިގަނޑު ގޮތެއްގައި އާމްދަނީ ލިބެމުން އައިސްފައިވަނީ އެކޮމެޓީގެ ރަޖިސްޓްރީގައިވާ އިމާރާތް ކުއްޔަށް ދީގެންނެވެ. ހުސްވި އަހަރުގެ ތެރޭގައި އެ އިމާރާތް ކުއްޔަށް ދީގެން ދެލައްކަ ސާޅީސްހާސް ރުފިޔާގެ އާމްދަނީއެއް ކޮމެޓީން ހޯދާފައިވެއެވެ. އަހަރު ނިމުނު އިރު އެކޮމެޓީއަށް އާމްދަނީ އިތުރަށް ލިބިފައިވަނީ އެ އިމާރާތް ހުންނަ ގޯތީގައި އިންދާފައިވާ ރުއްތަކުން ލިބޭ ކުރުނބާ އެކިފަރާތްތަކަށް ވިއްކައިގެންނެވެ. އެގޮތުން ޑިސެމްބަރު މަސް ނިމުނުއިރު އެ ރުއްތަކުން ޖުމުލަ ހަތަރު ހާސް ރުފިޔާ ލިބި، އެއިން 411 ރުފިޔާވަނީ ކައުންސިލަށް ޖަމާކުރެވިފައެވެ.

ދަރަނބޫދޫގެ އަންހެނުންގެ ކޮމެޓީން މީގެ ކުރިން ރަށުގެ އިޖްތިމާޢީ ސަރަޙައްދު ކުނިކަހައިގެން އާމްދަނީ ހޯދާފައިވީނަމަވެސް 2024 ވަނައަހަރު އެ މަސައްކަތް ކޮށްފައިވަނީ ރަށުގެ ޖަމްޢިއްޔާއަކުންނެވެ.

ކޮމެޓީގެ މާލިއްޔަތުގައިވާ މުދާ:
2024 ވަނަ އަހަރު ނިމުނުއިރު ދަރަނބޫދޫ އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ މާލިއްޔަތުގައިވާ އެންމެ އަގުހުރި މުދަލަކީ އެކޮމެޓީގެ ގެއެވެ. “ބިނާ” ނަމުން ނަން ދީފައިވާ ރަށުގެ އިރުއުތުރު ފަރާތުގައި ހުންނަ މި އިމާރާތް ބިނާކުރަން ފަށާފައިވަނީ 2005 ވަނަ އަހަރުގައެވެ. އިމާރާތުގެ މަސައްކަތް ނިމުނުފަހުން އެކިއެކި ވަޒީފާތަކަށް ރަށަށް އައސް ޤާއިމުވެގެން ތިއްބަވާ ފަރާތްތަކަށް ކުއްޔަށް ދޫކުރުމަށް ޚާއްސަ މި ޢިމާރާތުގައި މިހާރު ދިރިއުޅެމުންދަނީ ބިދޭސީންނެވެ. އިމާރާތް ކުއްޔަށް ދީގެން ރަނގަޅު އާމްދަނީއެއް ލިބުނުނަމަވެސް ބެލެހެއްޓުން ދަށްވެފައި ވުމުގެ ސަބަބުން އެކިވަރުގެ ގެއްލުން ލިބިފައިވާ މި އިމާރާތް މިހާރުހުރީ ކުޑަ ޚަރަދަކުން މަރާމާތުކޮށް ނިންމާލެވޭ ޙާލަތެއްގައެއް ނޫނެވެ.

ބިނާގެ
ކޮމެޓީން އެންމެބޮޑު އާމްދަނީއެއް ހޯދާ ބިނާގެ | ފޮޓޯ: ދަނިއުސް 2015

ކޮމެޓީގެ ބިނާގެއަކީ 2 ކޮޓަރިއާއި ތަނަވަސް ސިޓިންގ ރޫމެއްގެ އިތުރުން ބަދިގެއަކާއި ކާގެއެއް ހުންނަ ތަނެކެވެ. މި ރިޕޯޓުގެ ބޭނުމަށް މަޢުލޫމާތު ހޯދުމަށް ފޮނުވި ފޯމަށް ލިބުނު ޖަވާބުގައި މި ކޮމެޓީގެ މާލިއްޔަތުގައި ދެން ހުރީ، އައިސް އަލަމާރި، ސޯފާސެޓު، 2 އެނދާއި 2 އެއަރ ކޮންޑިޝަނަރގެ އިތުރުން 2500 ލީޓަރުގެ 1 ކަޅުހަމާއި 1 ކާމޭޒާއި 4 ގޮނޑިއެވެ. މީގެ އިތުރުން ދޯނި އެހެލާ ވިންޗަކާއި މަދިރިއަށް ފޮގް ކުރުމަށް މެޝިނެއް ކޮމެޓީގެ މާލިއްޔަތުގައި އެބަހުއްޓެވެ.

އަހަރު ނިމުނުއިރު ލިބުނު އާމްދަނީއާއެކު، ދަރަނބޫދޫ އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ މާލިއްޔަތުގައި ޖުމުލަ 539486ރ (ފަސްލައްކަ ތިރީސް ނުވަހާސް ހަތަރުސަތޭކަ އަށްޑިހަ ހަރުފިޔާ) އެބަހުއްޓެވެ.

އަންހެނުންގެ ޙައްޤުތައް ރައްކާތެރިކުރުމަށް ކޮމެޓީން ކުރީ ކޮންކަމެއް!

އަންހެނުންގެ ޙައްޤުތަކަކީ ކޮބައިކަމާއި އެކަމާއި ބެހޭގޮތުން އިތުރު ވާހަކަތަކެއް މިރިޕޯޓްގައި ހިމެނުމަށް ގަސްތު ނުކުރަމެވެ. އެހެންނަމަވެސް އަންހެނުންގެ ކޮމެޓީތަކަށް މަތިކޮށްފައިވާ އެންމެ ބޮޑު އެއް މަސްޢޫލިއްޔަތަކީ އެކޮމެޓީއެއް ނިސްބަތްވާ ރަށެއްގައި ހިމެނޭ އަންހެނުންގެ ޙައްޤުތައް ރައްކާތެރިކުރުމަށް މަސައްކަތް ކުރުމެވެ. އެފަދަ ޙައްޤުތައް ލިބިދެވޭކަން ކަށަވަރުކުރުމަށް ކޮމެޓީން އިސްނަގައި ސީދާ އަންހެނުންގެ ޝަކުވާތަކާއި އިޙްސާސްތައް ދެނެގަތުމަށް ޙަރަކާތްތަކެއް ހިންގަންޖެހެއެވެ. އެހެންނަމަވެސް 2024 ވަނައަހަރު ނިމިގެން ދިޔައީ އަންހެނުންގެ ޙައްޤުތައް ރައްކާތެރިކުރުމަށް އެއްވެސް ކަމެއް ނުކުރެވިއެވެ. ސިޔާސީ ކަންމުގައިވެސް އަންހެނުންގެ ބާރުވެރިކަން އިތުރުކުރުމަށް އެއްވެސް ކަމެއް ހުސްވި އަހަރުތެރޭގައި ކުރެވިފައިނުވެއެވެ. ދަރަނބޫދޫ ކައުންސިލްގައިހުރި ކުރީގެ ލިޔުންތަކަށް ބަލާއިރު، ދަރަނބޫދޫ އަންހެނުންގެ ކޮމެޓީގެ ކުރީގެ ބައެއް ދައުރުތަކުގައި މަތީ ތަޢުލީމު ޙާސިލްކުރާ އަންހެނުންގެ އަދަދު އިތުރުކޮށް، ކޮމެޓީގެ ނަމުގައި ފައިސާގެ އިނާމު ދެވިފައިވެއެވެ.

އެހެންނަމަވެސް އަންހެނުންގެ މެދުގައި ދީނީ ހޭލުންތެރިކަން އިތުރުކުރުމުގެ މަޤްޞަދުގައި ކޮމެޓީގެ ފަރާތުން ރަށުގެ އެކި ސަރަޙައްދުގައި ދީނީ ޝިޢާރުތައް ހަދައި ބެހެއްޓިފައިވާކަން އެކޮމެޓީން ފާހަގަކުރެއްވިއެވެ. މީގެ އިތުރުން ސީދާ ކޮމެޓީން އިސްވެ ކަނބަލުންގެ ސިއްޙީ ހާލަތު ރަނގަޅުކުރުމަށް ކުޅިވަރު ކޭމްޕާއި ކަސްރަތު ޕްރޮގްރާމްތައް އިންތިޒާމް ކުރެވިފައިވާކަން ފާހަގަކުރެވެއެވެ.

438845631 442190811512070 4598654873762835407 N
ދީނީހޭލުންތެރިކަން އިތުރުކުރުމަށް ކޮމެޓީން ބެހެއްޓި ބެނާއެއް | ފޮޓޯ: ފޭސްބުކް 2024

ދަރަނބޫދޫއަކީ އެކި ރޮނގުތަކުން ރަށަށް ތަފާތު ގިނަ ޚިދުމަތްތަކެއް ކުރައްވާފައިވާ އަދި މިހާރުވެސް ކުރައްވަމުން ގެންދަވާ ކަނބަލުންތަކެއް އުޅުއްވާ ރަށެއްނަމަވެސް، އެފަދަ ކަނބަލުންނާއިބެހޭ މުހިންމު މަޢުލޫމާތުއެއްކޮށް ރެކޯޑް ބަލަހައްޓަމުން ނުދާކަމަށް އެކޮމެޓީން ދަނިއުސްއަށް ދެއްވި މަޢުލޫމާތުތަކުން ހާމަވެއެވެ.

ކޮމެޓީން ބޭނުންވާ ކަންކަމުގައި ކައުންސިލުން އެއްބާރުލުން ނުދޭތަ؟

މިހާރުގެ ހިނގަމުންދާ ކޮމެޓީ އިންތިޚާބުވި ފަހުން، ކައުންސިލުން ކޮމެޓީއަށް ކަންކަމުގައި އެއްބާރުލުން ނުދޭވާހަކަ ވަރަށް ގަދަޔަށް ރަށުތެރޭގައި ދެކެވެއެވެ. އެހެންނަމަވެސް ކޮމެޓީންވަނީ އެވާހަކަ ތަކުގައި ހަގީގަތެއް ނެތްކަމަށާއި، ކޮމެޓީން އެހީތެރިކަން ބޭނުންވާ ކަންކަމުގައި ކައުންސިލްގެ އެއްބާރުލުން ވަރަށް ބޮޑަށް ލިބޭކަމަށް ހާމަކޮށްފައެވެ. އަދި ހުސްވި އަހަރުގެ ތެރޭގައި ކޮމެޓީގައި ޖުމުލަ 48 ކަމަކަށް މަޝްވަރާކޮށް ކައުންސިލަށް ހުށަހަޅާފައިވާނެ ކަމަށާއި އޭގެތެރެއިން 34 ކަމެއް ތަންފީޒު ކުރެވިފައިވާކަމަށް ކޮމެޓީން ހާމަކުރިއެވެ.

ފާހަގަކޮށްލެވޭ:

ކޮމެޓީން ރަވާ ހިންގާ ކަންކަން އެންމެ ފަސޭހައިން ފެންނަންހުރީ އެކޮމެޓީގެ މީސްމީޑިއާ މަންސައިގައެވެ. އެކޮމެޓީގެ މީސްމީޑިއާ އެކައުންޓް 2024 ވަނަ އަހަރު ފެނިގެންދަނީ ވަރަށް ޙަރަކާތްތެރިކޮށްކަން ފާހަގަކުރަންޖެހެއެވެ. މިރިޕޯޓަށް މަޢުލޫމާތު ހޯދުމަށް ބޭނުންވި އެކޮމެޓީގެ ރަސްމީ މަސްޢޫލިއްޔަތުތަކުގެ ތެރޭގައި ހިމެނޭ ބައެއްކަންކަން ކޮންމެވެސް ސަބަބަކާއިހުރެ ނުކުރެވި ނުވަތަ ދޫކޮށްލެވިފައި ހުރިނަމަވެސް، ދަރަނބޫދޫގެ ތަރައްޤީއަށް ބޭނުންތެރި އެހެނިހެން ކަންކަން ކޮމެޓީން އިސްނަގައިގެން ކުރިއަށް ގެންގޮސްފައިވާކަން ފާހަގަކުރަމެވެ. އެގޮތުން 2024 ވަނަ އަހަރު އެކަނިވެސް އަންހެނުންގެ ތަރައްޤީއަށް ސާޅީސް ތިންހާސް ހަތްސަކޭކަ އަށްޑިހަ ހަރުފިޔާ ޚަރަދުކުރެވިފައިވާކަމަށް ކޮމެޓީންވަނީ މަޢުލޫމާތު ދެއްވާފައެވެ.

އެގޮތުން އެންމެ ފާހަގަކޮށްލެވޭ އެއްކަމަކީ ރަށުގެ މުވައްސަސާތަކުން ރާވައި ހިންގި ޕްރޮގްރާމްތަކަށް ކޮމެޓީގެ ބައިވެރިވުން ދީފައިވާ މިންވަރެވެ. ޚާއްސަކޮށް އަހަރުތެރޭގައި ފާހަގަކޮށްފައިވާ ޚާއްސަ ދުވަސްތައް ފާހަގަކުރުމަށާއި، ޙިއްސާކޮށްފައިވާ ތަޖުރިބާގެ ދަތުރުތަކާއި، ކޮމެޓީން އިސްނަގައި މަސްދުވަހުގެ މުއްދަތަށް ކުރިއަށް ގެންގޮސްފައިވާ އާރޓް އެންޑް ޑިޒައިން ޕްރޮގްރާމަކީ ފާހަގަ ނުކޮށް ދޫކޮށްލެވޭނެ ކަންކަމެއްނޫނެވެ.

458724390 527041539693663 5581213433082626773 N
ކޮމެޓީގެ ފަރާތުން ސްކޫލް ލައިބްރަރީއަށް ފޮތް ހަދިޔާކުރުން | ފޮޓޯ: ފޭސްބުކް

ހިނގަމުންދާ ދައުރުގެ ބޮޑުބައެއް މިހާރު ނިމިފައިވާ ދަރަނބޫދޫ އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ މެޖޯރިޓީއަކީ ޒުވާނުންނެވެ. ޒުވާނުންގެ މެޖޯރިޓީއަކުން ހިންގާ ތަނަކަށް ރައްޔިތުން ގިނަ އުއްމީދުތަކެއް ކުރާނެއެވެ. ޖުމުލަ ގޮތެއްގައި 2024 ވަނަ އަހަރަކީ އަންހެނުންގެ ކޮމެޓީއަށް ޙަރަކާތްތެރި އަހަރެކެވެ.

އަހަރު ނިމުނުއިރު ކޮމެޓީގެ ޕާފޯމަންސަށް ބަލާއިރު ގަބޫލުކުރެވޭ އެއްކަމަކީ ކޮމެޓީގެ މަޤްޞަދުގެ ބޭނުމަށް ބަލާއިރު، މުޖުތަމަޢުގައި އަންހެނުން ބާރުވެރިކުރުމަށް ކޮމެޓީން އިސްނަގައި ކަންތައްތަކެއް ރާވައި ހިންގަންޖެހޭކަމެވެ. ޚާއްސަކޮށް އެހެން ދައުރުތަކުގެ ކޮމެޓީތަކަށް ސީދާ އެހެން ރަށްރަށުގެ ކޮމެޓީތަކާއި ބައްދަލުވެ ތަޖުރިބާ ހޯދުމަށް ލިބިފައިނުވާ ފުރުޞަތު މިދައުރުގެ ކޮމެޓީގެ މެމްބަރުންނަށް ލިބިދީފައިވެއެވެ. މިފަދަ ތަޖުރިބާ ދަތުރު ތަކުގެ މައިގަނޑު ބޭނުމަކަށްވާނީ ދެފަރާތުން މަޢުލޫމާތާއި ތަޖުރިބާ ހިއްސާކުރުން ކަމުގައިވާތީ، އެފަދަ ތަޖުރިބާގެ އަލީގައި ކުރެވޭނެ އައުކަންކަން ހޯދިފައި ހުންނަންވާނެކަމަށް ބެލެވެއެވެ. ޚާއްސަގޮތެއްގައި އަންހެނުންގެ ކޮމެޓީއަކީވެސް ސިޔާސީގޮތުން ވާދަކޮށް އިންތިޚާބުކުރެވޭ ކޮމެޓީތަކަށް ވީހިނދު، މެމްބަރުންގެ ތަޖުރިބާގެ އަލީގައި ޒުވާން ކަނބަލުންނަށް ސިޔާސީގޮތުން އޮތް ފުރުސަތުތަކަށް ހޭލުންތެރިކަން އިތުރުކުރަން ޖެހެއެވެ. އަންހެނުންގެ ޙައްޤުތައް ހިމާޔަތްކޮށް ރައްކާތެރިކުރުމަށް ސެމިނާތަކާއި ބައްދަލުވުންތަކުގެ ފުރުސަތު ކަނބަލުންނަށް ހޯދައިދީ، އެކަންކަމަށް އަހުލުވެރިކުރުމަށް ޕްރޮގްރާމްތައް އަމިއްލަ އިސްނެގުމާއެކު އިންތިޒާމްކުރުމާއި އަންހެނުންނާއި ގުޅޭ ޚާއްސަ ރެކޯޑްތައް ތައްޔާރުކޮށް އުފައްދައި އާކައިވްކޮށް ރަނގަޅު އިންތިޒާމެއްގެ ދަށުން ރައްކާތެރިކުރުމަކީ އަރަމުން އަންނަ ޖީލަށް އެކަމުން ފައިދާކުރާނެ ކަންކަމެވެ. އަދި ކޮމެޓީގެ އެންމެ ބޮޑު ރައުސުލްމާލު ގޮތުގައި ގިނަދުވަސްތަކެއް ވަންދެން ދެމިހުރި ކޮމެޓީގެ އިމާރާތް ވީރާނަވާން ދޫކޮށްނުލައި ބެލެހެއްޓުމުގެ އިތުރުން ސީދާކޮމެޓީއަށް އާމްދަނީ ލިބޭނެ އިތުރު އައު ވަސީލަތްތަކެއް ހޯދުމަކީވެސް ތަރައްޤީގެ ވިސްނުމަކުން ވިސްނާނަމަ، ނުހަނު ބޭނުންތެރިކަމެއްކަން ފާހަގަކުރަންޖެހެއެވެ.

ޙިއްސާ ކުރައްވާ:

3 ކޮމެންޓްތައް

  1. ސިޔާސީ ގޮތުން އިންތިޚާބުވާ މަގާމަކަށް އައިސްތިބެ ސިޔާސީގޮތުން އަންހެނުން ބާރުވެރި ކުރުވަން ބޭނުންނުވާނީ އަދި ކުރިމަތިލާން އުޅޭތީކަމަށް ބެލެވޭ! ތިއައި ވަރަށް ޒިންމާދާރުކަންކުޑަ ގޮތެއް

  2. އަންހެނުންގެ ހައްގުތައް މިހާ ފުޅާ ޒަމާނެއްގަ އެ ހައްގު ހޯދައިދޭން މަސައްކަތެއް ނުކުރަންޏާ އަންހެނުންގެ ކޮމެޓީއެއްގެ ބޭނުމަކީކޮބާ!

ގުޅުންހުރި