ނިމިގެން އެދިޔަ 1445 ވަނަ އަހަރުގެ އަޟްޙާ ޢީދަކީ ދަރަނބޫދޫގައި ކުލަގަދަ ގޮތަކަށް ފަހުގެ ތާރީޚެއްގައި ބޭއްވުނު އެންމެ ތަފާތު އެންމެ ފޯރިގަދަ ޢީދެވެ. ދަރަނބޫދޫގެ ޒުވާނުންގެ އިސްނެގުމާއެކު ދަރަނބޫދޫ ކައުންސިލްގެ ޒިންމާގެ ދަށުން ޖުމްލަކޮށް މުޅި ރައްޔިތުންގެ ބައިވެރިވުން ލިބިގެންދިޔަ ޢީދެކެވެ. ފޯރިގަދަ ޢީދެއް ދަރަނބޫދޫ ރައްޔިތުންނާ ބައްދަލުވާ ކަމުގެ އިހްސާސް ކުރެވޭކަން ހާމަކޮށް ޢީދުގެ ތައްޔާރީތަކާއި ބެހޭ ރިޕޯޓެއް މީގެކުރިން އަޅުގަނޑުމެން ގެނެސްދީފައިވާތީ، އެވާހަކަ އިތުރަށް ދެއްކުމުގެ ބޭނުމެއް ނެތެވެ. މި ރިޕޯޓް ޚާއްސަކުރެވިފައިމިވަނީ ފޯރިގަދަ މިޢީދު އަހަރުމެންނާއި ހަމައަށް ގެނެސް ދިނުމުގައި މަސައްކަތްކުރެއްވި އެންމެހާ ފަރާތްތަކަށް ޝުކުރު އަދާކުރުމުގެ ނިޔަތުގައެވެ.

އަމިއްލައަށް އިސްނެގި ޒުވާނުން

ފޯރިގަދަ ތަފާތު ޢީދެއް ގެނައުމަށް ފުރަތަމަ އިސްނެގީ ޒުވާނުންނެވެ. ކޮފީއަކުން އުފެއްދި ޚިޔާލުތަކެއް ހިފައިގެން އިތުރު ޒުވާނުންނާއެކު ރަށުކައުންސިލަރުންނާއެކު ކައުންސިލް އިދާރާގައި ކުރެވުނު މަޝްވަރާތަކުން ޢީދުގެ ޙަރަކާތްތައް ކުރިއަށް ގެންދެވިދާނެ ގޮތްތަކެއް ހޯދައި، ރަށުކައުންސިލް ޒިންމާދާރު މުވައްސަސާގޮތުގައި ކަނޑައަޅައި މަސައްކަތް ފުޅާކުރެވުނީ ޒުވާނުންގެ ބައިވެރިވުން އޮވެގެންނެވެ. މިކަމަށް އިސްނެގި ޒުވާނުންވަނީ ފުރަތަމަ ދުވަހުން ފެށިގެން ފަހު ދުވަހާއި ހަމައަށް ޢީދުގެ މުޅި މަސައްކަތް ގެންދަންވާނެ ގޮތުގެ ތާވަލްތަކެއް ހަދައި، މަސައްކަތްދާގޮތް ގާތުން ބެލުމުގެ އިތުރުން ކޮންމެ މަސައްކަތެއްގައި ޢަމަލީގޮތުންވެސް ބައިވެރިވެ ނަމޫނާ ދައްކާފައެވެ. މިކަންކަމުގައި އިސްވެ އުޅުނު ކޮންމެ ޒުވާނެއްގެ ނަން ވަކިވަކިން ފާހަގަ ނުކުރިއެއްކަމަކު، އެ އެންމެހާ ފަރާތްތަކަށް ހާސްފަށުން ޝުކުރު ދަންނަވަމެވެ.

ރަށު ކައުންސިލާއި މުވައްސަސާތައް:

ޒުވާނުންގެ އިސްނެގުމާއެކު ޢީދު މަސައްކަތްތައް ރަށުކައުންސިލްއާ ޙަވާލުކޮށްގެން ކުރިއަށް ގެންދިއުމަށް ހުށަހެޅުމުން ކައުންސިލުން އެކަން ބަލައިގަނެ، އިތުރު މުވައްސަސާތަކާއި ކަންކަން ޙަވާލުކުރެވިގެން ޢީދުގެ ހަރަކާތްތައް ކުރިއަށް ގެންދެވުނެވެ. ޢީދުގެ ޙަރަކާތްތަކަށް ރަށު ކައުންސިލުންވެސް ބޮޑު ޚަރަދުތަކެއް ކޮށްފައިވެއެވެ. ޚާއްސަކޮށް ރަށު ކައުންސިލަރުންނާއި އެއިދާރާގެ އެހެނިހެން މުވައްޒަފުންގެ ބައިވެރިވުންވެސް މުޅި ޢީދުގައި ފެނިގެން ދިޔައެވެ. މީގެ އިތުރުން ރަށުކައުންސިލުން ރަށުގެ މުވައްސަސާތަކާއި ބައްދަލުކޮށް، އެ މުވައްސަސާތަކުގެ އެއްބާރުލުން ޢީދު ފާހަގަކުރުމަށްވަނީ ހޯދާފައެވެ. ޢީދުގެ ބައެއް ޙަރަކާތްތައް ރަށު ސްކޫލާއި، ޕޮލިސް ޕޯސްޓް އަދި ފެނަކަ އޮފީހާއި ޙަވާލުކުރެވިގެން ކުރިއަށް ގެންދެވުނުއިރު، ޖުމްލަކޮށް ހުރިހާ ޙަރަކާތްތައް ކުރިއަށް ގެންދިއުމަށް ވާންޖެހުނު ތައްޔާރީތަކުގައި މުވައްސަސާތަކުން ވަރަށް ރަނގަޅަށް ބައިވެރިވެފައިވާކަން ފާހަގަކުރެވުނެވެ. ރަށު ފެންވަރުގައި ފާހަގަކުރެވޭ ކަންކަމުގައި އަބަދުވެސް މުވައްސަސާތަކުގެ މުވައްޒަފުން ދައްކާ އެއްބައިވަންތަކަން ފާހަގަކޮށް ހުރިހާ މުވައްސަސާތަކަށްވެސް ޝުކުރު ދަންނަވަމެވެ.

ކަނބަލުންގެ ބައިވެރިވުން

ރަށު ފެންވަރުގައި ފާހަގަކުރެވޭ ކޮންމެ ކަމެއްގައިވެސް އެންމެ ފުރިހަމައަށް ބައިވެރިވަމުން އަންނަ ދަރަނބޫދޫ ކަނބަލުންގެ ބައިވެރިވުން މި ޢީދުގެ ޙަރަކާތްތަކުގައިވެސް ފެނިގެންދިޔައީ ފުރިހަމަކޮށެވެ. ޢީދާއި ގުޅުވައިގެން ރަށު ރައްޔިތުންނަށް ދެވުނު ޢީދު ސައިގެ އިތުރުން ޢީދުގެ އެކިއެކި ޙަރަކާތްތަކުގައި ޢަމަލީގޮތުން ބައިވެރިވެ، ހުށަހެޅުންތަކެއް ދައްކުވައިދިން އެންމެ ތަފާތު އެއްބަޔަކަށް މިކަނބަލުން ވެގެންދާނެއެވެ. އެކިއެކި އިވެންޓްތައް ހުށަހަޅައި ދިނުމުގަޔާއި،ރައްޔިތުންގެ ބާބެކިއުއާއި، ބޮޑުމަސް ބޭނުމަށް ދޯނި ބޭލުމުގެ ޙަރަކާތާއި ދަފިނެގުމާއި، ސްޓޭޖް ޝޯތަކުގެ އިތުރުން ކަށިވީރު އިވެންޓްތަކުގައިވެސް ކަނބަލުންވަނީ ޢީދެއްގެ ފުރިހަމަކަން ގެނުވައި ދިނުމަށް މަސައްކަތްތަކެއް ކޮށްދީފައެވެ. ޝުކުރިއްޔާ ކަނބަލުން!

އައު ޖެނެރޭޝަންގެ ހިތްވަރަށް ސާބަސް!

މިޢީދުގައި އެންމެ ބޮޑު ތަފާތެއް ދައްކުވައިދިން އެއްބަޔަކަށް ރަށުގެ އައު ޖީލުގެ ކުދިން ވެގެންދާނެއެވެ. އާންމު ގޮތެއްގައި މިފަދަ ޢީދުތައް ފާހަގަކުރެވެނީ އަރަމުން އަންނަ ޒުވާންކުދިންނަށް އިހުގައި ކަންކަން ކޮށްފައިވާގޮތްތައް ދެއްކުމުގެ ބޭނުމުގައި ނަމަވެސް، މިފަހަރު ފެނުން މަންޒަރު ވަރަށް ތަފާތެވެ. ޢީދު ކޮމެޓީގެ މަސައްކަތްތައް ޒުވާނުންނާއި ޒިންމާދާރު މުވައްސަސާތަކުން ކޮށްފައިވަނީ އައު ޖީލުގެ ބައިވެރިވުން ހޯދައިގެންނެވެ. އެގޮތުން އެންމެ ފަހުން އޯލެވެލް ނިންމާފައިވާ ކުދިންނާއި ސްކޫލް ކުދިންގެ ބައިވެރިވުންވެސް ކޮންމެ ހަރަކާތަކަށް ލިބުނެވެ. ބީރު ހެދުމާއި، އޮޑިތައްޔާރުކުރުމާއި، ޝޯތަކާއި، ބޮޑުމަސް އިވެންޓާއި، ޢީދު ހުޅުރޯކުރުމާއި ޢީދުގެ ދިއްލުންތައްފަދަ ބޮޑެތި ކޮންމެ ޙަރަކާތެއްގައިވެސް އަރަމުން އަންނަ ޖެނެރޭޝަންގެ ކުދިން ދެއްކީ ނަމޫނާއެވެ. އެކުދިންގެ މަސައްކަތާއިނުލައި މިޢީދު މިހާ ފުރިހަމަނުވާނެކަމީ ޝައްކެއް އޮތްކަމެއްނޫނެވެ!

ޝުކުރިއްޔާ މުޅިރައްޔިތުން

ޢީދު ޢީދެއްގެ ގޮތުގައި ފާހަގަކުރުމަށް ފުޓްސަލްއާއި ވޮލީ އަދި ނެޓްބޯޅަ ފަދަ މެޗްތައް ދޫކޮށް ރަށުގެ ތާރީޚާއި ގުޅުންހުރި ގިނަ އިވެންޓްތަކެއް ކުރިއަށް ގެންދެވުނީ މުޅިރައްޔިތުންގެ ފުރިހަމަ އެއްބާރުލުން އެކަމުގައި އޮވެގެންނެވެ. މިކަމުގައި ރަށުގައި މިވަގުތު ތިއްބެވި ޢުމުރުން އެންމެ ދުވަސްވީ ބޭފުޅުންނާއި އެކިއެކި މަސައްކަތްތަކުގެ ތަޖުރިބާކާރުންގެ ބައިވެރިވުންވެސް ލިބިގެން ގޮސްފައިވާކަން ފާހަގަކުރަންޖެހެއެވެ. މިއީ ހަމައެކަނި ކުޑަކުދިން މަޖާކޮށް ފޯރި ނެގި ޢީދެއް ނޫނެވެ. އެކުދިންނާއެކު ރަށުގެ އެންމެވެސް ފޯރިނަގާ މަޖާކުރި ޢީދެކެވެ. ރަށުގެ ތާރީޚާއި ގުޅުންހުރި ކުޅިވަރުތަކާއި އާދަކާދަތައް ދިރުވައި އާލާކޮށްދިން ތަފާތު ޢީދެކެވެ. މިފަދަ ޢީދެއް ރަށު ފެންވަރުގައި ގެނެސް ދިނުމަށް އަމިއްލަ ވަގުތާއި ހަކަތަ ހޭދަކޮށް، މާލީގޮތުންނާއި އެހެނިހެން ގޮތްގޮތުންވެސް އެހީތެރިކަން ފޯރުކޮށްދެއްވި ކޮންމެ ފަރުދެއް، މުވައްސަސާއެއް އަދި ޖަމްޢިއްޔާއެއް ވިޔަފާރިއެއްވެސް ބާކީނުކޮށް ޖުމްލަކޮށް ހުރިހާ ރައްޔިތުންނަށް އަޅުގަނޑުމެން ޝުކުރު އަދާކުރަމެވެ. ޝުކުރިއްޔާ ރައްޔިތުން!