ދަރަނބޫދޫއަކީ ޒަމާނުއްސުރެ އެކި ފެންވަރުގައި ޢީދު ފާހަގަކުރަމުން އަންނަ ރަށެކެވެ. އެހެން ނަމަވެސް މިއަހަރުގެ އަޟްޙާ ޢީދު ދަރަނބޫދޫ ރައްޔިތުންނާއި ބައްދަލުކުރަނީ ވަރަށް ތަފާތު އިޙްސާސްތަކަކާއެކުއެވެ. އެއީ ރަށު ފެންވަރުގައި ކުލަގަދަކޮށް ޢީދެއް އަނެއްކާވެސް ފާހަގަކުރަން އުޅޭ ކަމުގެ އިޙްސާސްތަކެކެވެ. ވަކި އުމުރެއް ވަކި ޖިންސެއް ތަފާތުވުމެއްނެތި، އެންމެންގެ ބައިވެރިވުމާއެކު ގިނަ ޙަރަކާތްތަކެއް ރަށުފެންވަރުގައި ކުރިއަށް ގެންދިއުމަށް ޒުވާނުންތަކެއްގެ އަމިއްލަ އިސްނެގުމާއެކު ފަށައިގަނެފައިވަނީ މީގެ މަހެއްހާ ދުވަސްކުރިންނެވެ. މިކަމުގައި ރަށުކައުންސިލާއި އެހެނިހެން މުވައްސަސާތަކުގެ އެއްބާރުލުން ފުރިހަމައަށް ލިބެމުންދެއެވެ. މި މަސައްކަތަށް އިތުރު ފުރިހަމަކަމެއް އަދި އުއްމީދެއް ގެނެސްދެނީ ސްކޫލް ދަރިވަރުންނާއި ދާދި ފަހުން ރަށު ސްކޫލުން އޯލެވެލް އިމްތިހާނު ނިންމާލި ދަރިވަރުންގެ ވަރަށްބޮޑު ބައިވެރިވުމެއް ލިބެމުން ދިއުމެވެ.

މިރިޕޯޓްގައި ބަލާލެވިފައިވާނީ ޖުމްލަކޮށް އަޟްޙާ ޢީދުގެ ތައްޔާރީތަކާއި ޢީދު ތާވަލުގައިވާ ޙަރަކާތްތަކުގެ މައްޗަށެވެ. މި މަޢުލޫމާތުތައް އެއްކުރުމުގައި މި ޙަރަކާތްތައް ރޭވުމުގައި އިސްދައުރެއް އަދާކުރެއްވި ފަރާތްތަކުން ދެއްވި އެއްބާރުލުމަށް ނުހަނު ޝުކުރުވެރިވަމެވެ.

ތައްޔާރީތަކުގެ ފެށުން:

ޢީދުގެ ތައްޔާރީތަކަށް ބޭއްވުނު ސިލްސިލާ ބައްދަލުވުންތަކަށްފަހު، ޢީދެއް އަންނަކަމުގެ އިޙްސާސްތައް ގެނުވައިދީ މަސައްކަތްތައް ކުރިއަށްދާ ގޮތުގެ އަދާހަމަތައް ގެނައުމަށް ފެށުނު މަސައްކަތްތަކުގެ ކުރީކޮޅުގައި މީޑިއާ ޓީމެއް އެކުލަވާލުމުގެ މަސައްކަތް ފަށައިގަނެވުނެވެ. މިކަންވެސް ކުރެވިގެންދިޔައީ ޙަރަކާތްތައް ރާވައި ހިންގުމުގައި އިސްކޮށް އުޅުއްވި ޒުވާނުންގެ ބެލުމުގެ ދަށުންނެވެ. މީޑިއާ ޓީމުގެ މަސައްކަތްތަކުގައި ބައިވެރިވަނީ ރަށުން ފާހަގަކޮށްލެވޭ ގްރެފިކް ޑިޒައިނަރުންނާއި، ފޮޓޯ އަދި ވީޑިއޯ ގްރާފަރުންނެވެ.

މިޓީމުގެ އެންމެ ފުރަތަމަ މަސައްކަތަކަށްވީ، ޢީދަށް ޚާއްސަ ލޯގޯއެއް ފަރުމާކުރުމާއި، ޓީޝާޓު ފަރުމާކުރުމާއި ޢީދަށް ޚާއްސަ ހޭޝްޓެގެއް ތައްޔާރުކުރުމުގެ އިތުރުން ޙަރަކާތްތައް ޕްރޮމޯޓްކުރުމަށް މީސްމީޑއާ ހޭންޑަލްއެއް ހަދައި އިޝްތިހާރުކުރުމެވެ. މަސައްކަތްތަކާއި ޙަވާލުވެ ގާތްގަނޑަކަށް ތިން ދުވަސްތެރޭގައި ލޯގޯ، ހޭޝްޓެގް އަދި ފޭސްބުކު ޕޭޖެއް ފައިނަލްކޮށް ވުޖޫދުކޮށްފައިވެއެވެ.

މިޓީމުން ކުރެއްވި މަސައްކަތްތަކުގެ ތެރެއިން “އެންމެންރަށަށް” ހޭޝްޓެގަކީ މުޅި ޢީދުގެ ބޭނުން އަންގައިދިން ސްލޮގަންއެކެވެ. ބޭނުމަކީ ރަށުން ބޭރުގައި ދިރިއުޅުއްވާ އެންމެހައި ފަރާތްތައް ޢީދުގެ އުފާ ލިބިގަނެ އިޙްސާސް ކޮށްލުމަށް ރަށަށް އައުމަށް ދައުވަތު އެރުވުމެވެ.

އައްޑުވަސް

ޒަމާނުއްސުރެ ޢީދު ފާހާގަކުރުމުގައި އައްޑުވަހުގެ ނަމުން ޚާއްސަކޮށްފައިވާ މިދުވަހަކީ ޙައްޖު ދުވަހުގެ ކުރީ ދުވަހެވެ. މިދުވަހުގައި ކުރިއަށް ގެންދެވޭ ޙަރަކާތަކީ ބީރުއެރުމެވެ. ބައެއް އެހެން ރަށްރަށުގައި މިއީ މާލި އެރުމެވެ. ދަރަނބޫދޫގެ ތާރީޚުން މިދުވަހުގެ މި ޙަރަކާތަށް ބުނެދޭނަމަކީ “އައްޑު އަސުރަށް ބީރު” އެރުމެވެ. އެނަން އައިސްފައިވަނީ ޙައްޖުމަހުގެ އަށްވަނަ ދުވަހު ހަވީރުގައި ބީރު އެރުމަށެވެ. ޢީދު ތާވަލުގައިވާ ގޮތަށް މިއަދު ހަވީރު ހުޅަނގުކޮޅުން ތަފާތު ވައްތަރުގެ ބީރުތައް ރަށުތެރެއަށް އަރައިގެން ދިޔައެވެ. އެއާއެކު ރަށުގެ ކުދިބޮޑު އެންމެން މަގުތަކަށް ނިކުމެ މި ބީރުތަކާއެކު މަޖާކުރަމުން ދިޔައެވެ. މިއީ އާދައިގެ މަތީން ކުޑަކުދިން ވަރަށް ގަޔާވި ޙަރަކާތެކެވެ. ޢީދުގެ މީޑިއާ ޓީމުން މި ޙަރަކާތާއި ގުޅޭގޮތުން ބުނެފައިވަނީ މިފަހަރުވެސް ދަރަނބޫދޫގެ އާދަކާދައާއި އެއްގޮތަށް ބީރު އަރާނެކަމަށާއި، ބިރުގަންނަނަމަ ދުރުގައި ބަލާލަން ތިބުމަށެވެ. ބިރު ނުގަންނަނަމަ، ބީރުތަކާއެކު މަޖާކޮށްލުމަށް #އެންމެންރަށަށް އައުމަށެވެ.

ޙައްޖު ދުވަސް

މިދުވަހުގެ ޙަރަކާތްތައް ރޭވިފައިވަނީ ރޭގަނޑަށެވެ. އެގޮތުން ރާއްޖޭގެ ގިނަ ރަށްރަށުގައި ޢީދާއި ގުޅުވައިގެން ކުރިއަށް ގެންދާ ޢީދު ހުޅު ރޯކުރުން ބަނދަރު ސަރަޙައްދުގައި އޮންނާނެއެވެ. ހުޅުގަނޑު ބޮޑުވެފައި އަލިކަން ގަދަވެފައި އަޑުފަށްގަނޑު ބާރުވާނެއެވެ. މިއާއެކު ބަނދަރު ސަރަޙައްދުގައި ދެން ކުރިއަށްދާ ދެ ޙަރަކާތްވެސް ވަރަށް ޚާއްސައެވެ.

ބަޔަކަށް ޢީދުގެ އުފާ ގެނުވައި ދިނުމަށް ބަޔަކު މީހުން ކޮށްފައިވާ ވަރަށް ބުރަ އަދި ވަރަށް ޚާއްސަކަން ފެންނަ މަސައްކަތެއް ގޮތުގައި ޢީދުމުބާރަކް ދިއްލުން އޮންނާނެވެ. ކަރަންޓް ބޭނުންކޮށްގެން ދިއްލާ މި އައިކަން ފެންނަން ހުންނާނީ ބަނދަރުގެ ޓީޖެޓީއާއި ދިމާލުން މޫދު ތެރޭގައެވެ. ތަފާތު ކުލަކުލައިގެ ބޮކިތަކުން ފުރިހަމަކަން ގެނުވައިދޭނެ މި ދިއްލުމުގެ ފަހަތުގައި ދަރަނބޫދޫ ޒުވާނުންގެ މަސައްކަތު ހުނަރާއި ފެންވަރު ދައްކުވާލައިދޭނެއެވެ.

އޭގެ ފަހުން ދެން އޮންނާނީ ލެންދާން ޝޯއެކެވެ. މިއީ ރަށްރަށުގައި ކުރަމުން އައިސްފައިވާ ކަމެއްކަން ޔަޤީނެއްނޫނެވެ. ގައިމުވެސް ދަރަނބޫދޫގައި މިއީ އަލަށްކުރާ ކަމެކެވެ. ބަނދަރުމައްޗަށް އެއްވާ ކުޑަކުދިންނާއެކު މަޖާކޮށްލުމަށް ދިއްލުމަކާއެކު ލެންދާންތަކެއް ވައިގެ ތެރެއަށް ދޫކޮށްލެވިގެންދާނެއެވެ.

ޢީދު ދުވަސް

މިދުވަސް ފެށިގެން ދަނީ ޢީދު ނަމާދުންނެވެ. ބޮޑު ޖަމާޢަތުގައި ޢީދުނަމާދުކުރުން އޮންނާނީ ބަނދަރު ސަރަޙައްދުގައިވާ ހޮޅުއަށި ކައިރީ ގައެވެ. ޢީދު ނަމާދަށްފަހު ޢީދު ސަލާމްކުރުމާއި ރައްޔިތުންގެ ޢީދު ސައި އޮންނާނެއެވެ. އެއަށްފަހު ދެން އޮންނާނީ ބަންގާޅު ދަތުރެވެ. މިއީ ކުޑަކުދިންގެ މެދުގައި މަޤުބޫލު ޙަރަކާތެކެވެ. ކުދިން، ބެލެނިވެރިންގެ އެހީތެރިކަމާއެކު އެކި ސައިޒުގެ އުޅަނދު (ދޯނި ބޯޓު ފަދަ) ތައްޔާރުކުރުމަށްފަހު އެ އުޅަނދުތަކުގައި ކާބޯތަކެތި ހިފައިގެން ރަށުގެ ބައެއް ތަންތަނަށް ދަތުރުކުރާނެއެވެ. މިދަތުރުގެ ތެރެއިން އެއްކުއްޖަކު އަނެއް ކުއްޖަކާއި ގުޅުންތައް ބަދަހިކޮށް ހަދިޔާ ބަދަލު ކުރެވިގެންދާނެއެވެ. އެނގިފައިވާގޮތުން މިއީ ރާއްޖޭގައި ވަރަށް މަދު ރަށެއްގައި ކުރަމުންދާކަމެކެވެ.

އޭގެ ފަހުން އެދުވަހު ދެން އޮންނާނީ މަގުމަތީ ކުޅިވަރުތަކެވެ. މިއީ ހުރިހާ އުމުރަކަށްވެސް ބައިވެރިވެވޭ އެންމެން މަޖާކޮށްލުމަށް ބޭއްވޭ ކުޅިވަރު ތަކެކެވެ. ދެން އޮންނާނީ ފެންކުޅިއެވެ. އެމީހެއްގެ ސަލާމަތް ހޯދާނީ އެމީހެކެވެ.

ޢީދު ދުވަހުގެ އިތުރު ޙަރަކާތްތައް ދެން އޮންނާނީ އެދުވަހުގެ ހަވީރުގައެވެ. އެގޮތުން ދިވެހި ސަޤާފަތުގައި ހިމެނޭ ދަފިނެގުމާއި، މާލި ނެށުން އަދި ކޯޑިއެރުވުން އޮންނާނެވެ. މި މަސައްކަތްތަކުގެ ފަރިތަކުރުން ތަކުގައި ބަޔަކު އުޅޭތާވެސް ދުވަސްތަކެއް ވެއްޖެއެވެ. ތަކެތި ތައްޔާރުކުރުމުގެ މަސައްކަތްވެސް ދަނީ އެހާ ފޯރިގަދަކޮށެވެ. ކޯޑިއެރުވުން މިއަދުގެ ޒުވާން ޖީލުގެ ކުދިންނަށް ދަރަނބޫދޫއިން ފެނިފައިނުވެއެވެ. އެހެންކަމުން މިދުވަހުގެ ހަވީރުގައި މިއޮންނަ ސަޤާފީ ޙަރަކާތްތައް ވަރަށް ޚާއްސަވާނެއެވެ.

ވަޅު ޢީދު ދުވަސް

ޢީދު ދުވަހެކޭ އެއްގޮތަށް މިދުވަހުވެސް ހެނދުނުގަޑީ މަގުމަތީގެ ކުޅިވަރުތައް އޮންނާނެއެވެ. ދުވަހުގެ ހަވީރު އާއިލީ ހަވީރެއް ބޭއްވުމަށް ނިންމާފައިވާއިރު ރޭގަނޑުވަނީ ސްޓޭޖް ޝޯ އަކަށް ތައްޔާރުކޮށްފައެވެ. މި ޝޯގައި ބޮޑުބެރާއި ކަރޯކޭވެސް ކުރިއަށް ދާއިރު ފާހަގަކޮށްލަންޖެހޭކަމަކީ މިފަދަ ސްޓޭޖް ޝޯއެއްވެސް މި ބޭއްވެނީ ވަރަށް ދުވަސް ފަހުންކަމެވެ.

ބާރަ ދުވަސް

މިއީ ޙައްޖުމަހުގެ ބާރަ ވަނަ ދުވަހެވެ. މިދުވަހުވެސް ހެނދުނު މަގުމަތީ ކުޅިވަރުތަކަށް ޚާއްސަކޮށްފައިވާއިރު ހަވީރުވަނީ އުމުރުން 45 އަހަރުން މަތީގެ މީހުންނަށް ވޮލީ މެޗެއް އިންތިޒާމްކޮށްފައެވެ. މިއީ ކުދިބޮޑު އެންމެން ފޯރިއަރުވާނެ މެޗަކަށް ވެގެންދާނެކަމަށް ބެލެވެއެވެ. އެދުވަހުގެ ރޭގަނޑު އޮތީ ކަށިވީރު އެވެ. މިއީ ދަރަނބޫދޫގެ އެންމެ ވަރުގަދަ މީހާ ހޮވުމަށް ބާއްވާ ޚާއްސަ އިވެންޓެކެވެ. މަޢުލޫމާތު ލިބިފައިވާ ގޮތުގައި މި އިވެންޓްގައި ޒުވާން އަންހެންކުދިންވެސް ބައިވެރިވުމަށްވަނީ ނަންނޯޓު ކޮށްފައެވެ.

ބީރުކަނޑާ ދުވަސް

މިދުވަހުގެ ހަރަކާތްތައް ފެށެނީ ހަވީރުގައެވެ. އެގޮތުން ސަޤާފީ ކުޅިވަރެއްގެ ގޮތުގައި ޢީދުތަކުގައި ކުރިއަށް ގެންދާ ބޮޑުމަސް ދުއްވުމުގެ އިވެންޓް ހަވީރުގައި އޮތްއިރު، މި ބޮޑުމަސް ބޭނުމަށް ޚާއްސަ އިވެންޓެއް އެރޭ އޮންނާނެއެވެ. މިއީވެސް ފޯރިގަދަ އިވެންޓަކަށް ވެގެންދާނެކަމަށް ބެލެވެއެވެ. މިއިވެންޓްގެ އެންމެ ޚާއްސަ ކަމަކީ މިކަން ކުރުމަށް ކޮށްފައިވާ ގިނަގުނަ މަސައްކަތްތަކެވެ. މަސްބޭނުމަށް ޚާއްސަ ދޯންޏެއް ތައްޔާރުކޮށްފައިވާއިރު މި މަސައްކަތުގައި ރަށުގެ އުމުރުން ދުވަސްވީ އަދި ވަޑާމުގެ މަސައްކަތްތަކުގެ ތަޖުރިބާކާރުންގެ އެހީތެރިކަން ޒުވާނުންވަނީ ހޯދާފައެވެ.

ނިންމާ ދުވަސް

މިއީ ޢީދުގެ ޙަރަކާތްތައް ރަސްމީކޮށް ނިންމާލާ ޢީދުގެ ފަހު ދުވަހެވެ. މިދުވަހުގެ ހަރަކާތްތައްވެސް ހަވީރު ފަށާއިރު އެވަގުތުގައި އޮންނާނީ ކުޑަކުދިންނަށް ޚާއްސަ ހަވީރެކެވެ. ޢީދުގެ ޙަރަކާތްތައް ނިމިގެންދާނީ އެރޭ އޮންނަ ވަދާޢީ ސްޓޭޖް ޝޯއަށްފަހުގައެވެ.

ކުރުގޮތަކަށް ދަރަނބޫދޫ އީދުމަޖާ ބުނެދޭނަމަ، ބުނެވެން އޮތީ އަދުގެ ޖީލަށް ތަފާތު ޢީދެއް ގެނެސް ދިނުމަށް ދަރަނބޫދޫ ޒުވާނުން އިސްނަގައި ކޮށްފައިވާ މަސައްކަތް ވަރަށްވެސް ފުރިހަމަކަމެވެ. ކާމިޔާބު މަޖާ އަދި ފޯރިގަދަ ޢީދަކަށް ހެދުމަށް ގިނަ ބަޔަކު ޝާމިލްވާހެން ގިނަ މަސައްކަތްތަކެއް ކޮށްފައިވާކަމެވެ. އެކަމަށްޓަކައި ގިނަ ބަޔަކު ވަރަށް ގިނަ ވަގުތާއި ހަކަތަ ހޭދަކޮށްފައިވާކަމެކެވެ. މިއީ ފަހުގެ ތާރީޚެއްގައި ގިނަބަޔެއްގެ ބައިވެރިވުމާއެކު މިހާބޮޑު ޙަރަކާތެއް ރަށުފެންވަރުގައި ކުރިއަށް ގެންދެވޭ ފަހަރަކަށްވާނެކަމެވެ. މިޢީދަކީ ފާހަގަކޮށްލެވޭ ޢީދެއްކަމުގައި ހެދުމަށް ދަރަނބޫދޫގެ ޒުވާނުންނާއި ކައުންސިލުން އަދި މުވައްސަސާތަކާއި ރައްޔިތުން ކުރެއްވި މަސައްކަތްތަކަށް ޝުކުރު ހައްޤެވެ. ޢީދަށް ޚާއްސަކޮށްގެން ތައްޔާރުކުރި “އެންމެންރަށަށް” ހޭޝްޓެގްގެ މުހިންމުކަން ތައްޔާރީތަކުން ކިތައްމެހާވެސް ފުރިހަމަކޮށް ބުނެދީފިއެވެ.