ފ. އަތޮޅުގެ ރައްޔިތުންނާއި ގުޅުންހުރި ސިޔާސީ އެކިއެކި މަޤާމްތަކަށް ކުރިމަތިލައްވާ ފަރާތްތަކުގެ ވަނަވަރު ނުވަތަ ޕްރޮފައިލް ގެނެސްދިނުމަށް ދަނިއުސް މީޑިއާއިން ފަށާފައިވާ “ސިޔާސީވެށި” ޕްރޮގްރާމްގެ ތެރެއިން މިފަހަރު މި ގެނެސްދެނީ ފ.އަތޮޅު ކައުންސިލްގެ ހުސްވެފައިވާ ރައީސްކަމުގެ މަޤާމަށް ކުރިމަތި ލައްވާފައިވާ ޙައްވާ ޢަބްދުލް ޢަޒީޒާއިބެހޭ މަޢުލޫމާތުގެ ރިޕޯޓެވެ. ފ. އަތޮޅު ކައުންސިލްގެ ކޯޕަރޭޓް އެފެއާޒް ސެކްޝަނުގައި މަސައްކަތް ކުރައްވަމުން ގެންދަވާ ޙައްވަ، އިންތިޚާބުގައި ވާދަކުރައްވަން ނިންމެވުމާއި ގުޅިގެން މިވަގުތު އިންނެވީ ސަސްޕެންޝަނުގައެވެ. މި ޕްރޮގްރާމަށް މަޢުލޫމާތު ހޯދުމަށް ދަނިއުސް މީޑިއާއިން ނިލަންދޫއަށް ދަތުރުކޮށް ނަގާފައިވާ ޙައްވަގެ ވީޑިއޯ އިންޓަވިއު ދަނިއުސްގެ މީސްމީޑިއާ މަންސަތަކުގައި ގެނެސް ދެވޭނެއެވެ.
ސަރުކާރު ޚިދުމަތުގެ ތަޖުރިބާ:
ދެހާސް ވަނަ އަހަރު އޯލެވެލްއަށްފަހު، މާގިނަ ދުވަސްތަކެއް ނުވެ ޙައްވަ، ވަޒީފާއަށްވަނީ ކުރީގެ އަތޮޅު އޮފީހަށެވެ. އެއީ މިހާރުގެ ނަމުންނަމަ، އަތޮޅު ކައުންސިލް އިދާރާއެވެ. އޭރުން ފެށިގެން މި އިންތިޚާބަށް ވާދަކުރުމަށް ފޯމު ހުށަހެޅުމާއި ހަމައަށް ހުންނެވީވެސް އެކައުންސިލްގެ ވަޒީފާގައެވެ. 23 އަހަރު އެއް އިދާރާއެއްގެ ވަޒީފާގައި ދެމިހުރުމަކީ، ދާއިރާއަށް ޙައްވަގެ އޮތް ލޯބި ދޭހަކޮށްދޭ ކަމެކެވެ.
ޙައްވަ މަޢުލޫމާތު ދެއްވި ގޮތުގައި އެންމެ ފުރަތަމަ ދުވަހުން ފެށިގެން މިއަދާއި ހަމައަށްވެސް އަތޮޅު ކައުންސިލްގެ އިދާރީ އެންމެ އިސް މަސައްކަތްތަކުގައި އޭނާގެ ބައިވެރިވުން ވަރަށް ބޮޑެވެ. އަދި އެ އިދާރާގައި ކުރައްވަމުން ގެންދެވި މަސައްކަތްތަކަކީވެސް އާންމުންނާއި އެންމެ ގާތުން ކުރެއްވޭ މަސައްކަތްތައްކަމުން މިހާރުވެސް އަތޮޅުގެ ރައްޔިތުންނަށް ބަލައިގަނެވޭނެފަދަ ރަނގަޅު ޚިދުމަތްތަކެއްވެސް ފޯރުކޮށް ދެވިފައިވާކަމަށް ޙައްވަ ޤަބޫލު ކުރައްވައެވެ.
ސިޔާސީ ތަޖުރިބާ:
ޙައްވަގެ ސިޔާސީ ދަތުރު އޭނާ ފެއްޓެވީ ކުރީގެ ރައީސް މައުމޫން ޢަބްދުލް ޤައްޔޫމް އެންމެ ފުރަތަމަ އުފެއްދެވި ޑީއާރުޕީ ގައެވެ. އެގޮތުން 2014 ވަނަ އަހަރުން ފެށިގެން އެޕާޓީގެ ނިލަންދޫ ކޮމެޓީގެ އިންމެ އިސް މަސައްކަތްތަކުގައި އޭނާވަނީ ޙަރަކާތްތެރިވެފައެވެ. އޭގެ ފަހުން ރައީސް މައުމޫން ޕީޕީއެމް ނަމުގައި އައު ޕާޓީއެއް އުފެއްދެވި ހިސާބުން ފެށިގެން 2018 ވަނަ އަހަރާއި ހަމައަށް ރިޔާސީ އިންތިޚާބުތަކާއި މަޖްލިސް އިންތިޚާބުތަކުގައި ގިނަ މަސައްކަތްތަކެއް ކުރެވިފައިވާނެކަމަށް ހާމަކުރެއްވިއެވެ. އެހެންނަމަވެސް 2018 ވަނަ އަހަރުން ފެށިގެން ކުރިއަށް އޮތް އަތޮޅު ކައުންސިލްގެ އިންތިޚާބަށް ވާދަކުރައްވަން ނިންމެވުމާއި ހަމައަށް އޭނާވަނީ ސިޔާސީ މަސައްކަތްތަކުން ދިގު “ބްރޭކެއް” ނަންގަވާފައެވެ. ޙައްވަ މިހާރު ކެމްޕެއިން ކުރައްވަމުން ގެންދަވާ އަތޮޅު ކައުންސިލްގެ ބައި-އިލެކްޝަން އިންތިޚާބަކީ، އޭނާ ޙަޔާތުގައިވެސް ވާދަކުރައްވާ ފުރަތަމަ ސިޔާސީ އިންތިޚާބެވެ.
އިޖްތިމާޢީ ޚިދުމަތުގެ ތަޖުރިބާ:
ޙައްވައަކީ އިޖްތިމާޢީ ޚިދުމަތުގެ ދާއިރާއިން ފާހަގަކޮށްލެވޭ ޚިދުމަތްތަކެއް ފޯރުކޮށް ދެއްވާފައިވާ ފަރާތެކެވެ. އެގޮތުން އޭނާގެ އިޖްތިމާޢީ ޚިދުމަތްތައް އެންމެ ބޮޑަށް ފާހަގަކުރެވެނީ، ނިލަންދޫ އަންހެނުންގެ ތަރައްޤީއަށް މަސައްކަތްކުރާ ކޮމެޓީގައި ހޭދަކުރެއްވި ދުވަސްތަކުގައެވެ. ޙައްވަ ވަނީ އެ ކޮމެޓީގައި 2 އަހަރު ރައީސާކަން ކުރައްވާފައެވެ. ޙައްވަގެ ބަހުންނަމަ، އެކޮމެޓީގެ ރައީސާކަމުގައި ހުންނެވި ފަހު ދައުރަކީ މިހާތަނަށް ނިލަންދޫ އަންހެނުންގެ ތަރައްޤީއަށް މަސައްކަތްކުރާ ކޮމެޓީއަކުން އެންމެ ކާމިޔާބު މަސައްކަތްތަކެއް ކޮށްފައިވާ ދައުރެވެ.
ޙައްވަގެ ރައީސާކަމުގެ ދަށުން އެކޮމެޓީން ކޮށްފައިވާ މުހިންމު މަސައްކަތްތަކުގެ ތެރޭގައި އަންހެނުން ބާރުވެރިކުރުވައި، މީހުން ބިނާކުރުމަށް މުހިންމު މަސައްކަތްތަކެއް ކުރައްވާފައިވެއެވެ. އެގޮތުން އެވިޑް ކޮލެޖާއި ގުޅިގެން މެނޭޖްމަންޓް ދާއިރާގެ ޑިޕްލޮމާ ކޯހެއް ނިލަންދޫގައި ކުރިއަށް ގެންގޮސްފައިވެއެވެ. އަންހެނުންނަށް ގޭގައި ތިބެގެން އާމްދަނީ ހޯދޭނެގޮތް ފަހިކޮށް ދިނުމަށް އެކަނބަލުންނަށް ފަހާ ކޯހަކާއި، ކޭކު އަޅަން ދަސްކޮށްދޭ ކޯހެއްގެ އިތުރުން އަތްތެރި މަސައްކަތްތެރިކަމުގެ ކޯހެއްވެސް ކުރިއަށް ގެންގޮސް އެދާއިރާތަކުން ގިނަ ބަޔަކު ބިނާކުރެވިފައިވާނެކަމަށް ޙައްވަ މަޢުލޫމާތު ދެއްވިއެވެ. އޭގެ އިތުރުން އަންހެނުންނަށް ޚާއްސަކޮށްގެން ހޭލުންތެރިކަން އިތުރުކުރުމުގެ ޕްރޮގްރާމްތަކެއްވެސް ބޭއްވިފައިވެއެވެ.
އަތޮޅުގެ ކުރިމަގާމެދު ގެންގުޅުއްވާ ތަސައްވަރު:
ޙައްވަ ޤަބޫލުކުރައްވާ ގޮތުގައި ފ.އަތޮޅަކީ ތަރައްޤީއަށް ލޯބިކުރާ އަދި ތަޢުލީމާއި ދީންވެރި މުޖުތަމަޢެއް އޮންނަ އަތޮޅެކެވެ. މިއަތޮޅަކީ ތަޢުލީމާ ތަމައްދުންގެ ރޮނގުން އެހެން އަތޮޅުތަކަށް ދޫނުކުރާ، އަދި ދީނާއި ތަޢުލީމަށް މިހާރަށްވުރެ ބޮޑަށް ލޯބިކުރާ އަތޮޅަކަށް ހެދުމަކީ އޭނާގެ ތަސައްވުރެވެ.
އަތޮޅުގެ އާބާދި މަދުވެފައި، ޤުދުރަތީ ވަސީލަތްތައް މަދުނަމަވެސް، އަތޮޅުގެ ފަޅުރަށެއް އިޤްތިސާދީ މަސައްކަތްތަކަށް އިންވެސްޓް ކުރުމަށް ސަރުކާރާއި ގުޅިގެން މަސައްކަތް ކުރައްވާނެކަމަށާއި، މިކަމުން މިއަތޮޅަށް ދާއިމީކޮށް އާމްދަނީ ލިބުމަށް ފުރުސަތު ލިބިގެންދާނެ ތަސައްވުރެއް އޭނާ ގެންގުޅުއްވައެވެ. މީގެ އިތުރުން މާލޭގައި ހުންނަ ފ.އަތޮޅު ފިހާރައިން ލިބޭ އާމްދަނީ އަތޮޅުގެ ރަށްރަށް އިންވެސްޓް ކުރައްވާނެކަމަށާއި، މިގޮތުން ކުރެވޭ އިންވެސްޓަކީވެސް އެރަށްރަށަށް ދާއިމީކޮށް އާމްދަނީ ލިބޭނެ ފަދަ ކަމަކަށް ކުރެވޭ އިންވެސްޓްމަންޓަކަށް ހެއްދެވުމުގެ ތަސައްވުރެއް ގެންގުޅުއްވާކަމަށް ހާމަކުރިއެވެ.
ދައުރުގެ ބާކީއޮތް މުއްދަތުގައި އެންމެ އިސްކަމެއް ދެއްވާނީ ކޮންކަމަކަށް؟
މިއީ ބައި-އިލެކްޝަނެއްކަމުން އިންތިޚާބުވާ ފަރާތަކަށް ދައުރުގައި ބާކީ ލިބެނީ ދެއަހަރާއި ދުވަސްކޮޅެކެވެ. އެހެންކަމުން އިންތިޚާބު ވެއްޖެނަމަ، މި މުއްދަތުގައި އެންމެ އިސްކަމެއް ދެއްވާނީ ލާމަރުކަޒީ ޤާނޫނުގެ ދަށުން އަތޮޅު ކައުންސިލުން ފޯރުކޮށްދޭންޖެހޭ ޚިދުމަތްތައް ދިނުމަށްކަމަށް ޙައްވަ މަޢުލޫމާތު ދެއްވިއެވެ. އެގޮތުން މިހާރުވެސް އެކައުންސިލުން އިސްކަމެއް ދެއްވައިގެން ކުރިއަށް ގެންދާ ރަށްރަށުގެ ކައުންސިލްތައް މޮނިޓަރކުރުމާއި، އަތޮޅު ކައުންސިލްގެ 5 އަހަރުގެ ތަރައްޤީ ޕްލޭންގައި ފާހަގަކޮށްފައިވާ ކަންކަން ކޮށްނިންމުމަށް އިސްކަމެއް ދެއްވާނެކަމަށް ހާމަކުރިއެވެ.
މީގެ އިތުރުން ފާއިތުވީ އަހަރުތަކުގައި އަތޮޅުގެ ބައެއް ރަށްރަށުގެ ކައުންސިލްތަކުގެ ޕާފޯމެންސް އިންޑެކްސް ދަށްވަމުންދާކަން ފާހަގަކުރެވޭ ކަމަށާއި، ރަށްރަށުގެ ކައުންސިލްތަކުގެ ޕާފޯމެންސް ކުރިއެރުވުމަށް މަސައްކަތްތަކެއް ކުރައްވާނެކަންވެސް ފާހަގަކުރެއްވިއެވެ. އަދި އިންތިޚާބު ވެއްޖެނަމަ، އަތޮޅު ކައުންސިލުން އަތޮޅު ފެންވަރުގައި ރަށްރަށް ތަމްސީލުކޮށް ވާދަވެރިކަން އިތުރުކުރުމަށް ފައްޓަވާފައިވާ ކުޅިވަރު ޙަރަކާތްތައްވެސް މެދުކެނޑުމެއްނެތި ކުރިއަށް ގެންދަވާނެ ކަމުގެ ޔަޤީންކަން ޙައްވަ ދެއްވިއެވެ.
އަތޮޅުގެ ރައްޔިތުންނަށް ދޭން ބޭނުންވާ މެސެޖް:
މެދު ނުކެނޑި 23 އަހަރު އަތޮޅުގެ ރައްޔިތުންނާއި ގާތުން އިދާރީ ގިނަ މަސައްކަތްތަކެއް ކުރެއްވިފައިވާކަމަށާއި، ފ.އަތޮޅު ކައުންސިލްގެ ރައީސްކަމަށް އިންތިޚާބު ކޮށްދެއްވައިފިނަމަ، ސަރުކާރާއި ގުޅިގެން އަތޮޅުގެ ކުރިއެރުމަށް ގިނަ މަސައްކަތްތަކެއް ކޮށްދެއްވާނެކަމުގެ ޔަގީންކަން ރައްޔިތުންނަށް ދެއްވާކަމަށް ޙައްވަ ހާމަކުރެއްވިއެވެ.