ދަރަނބޫދޫ ޒުވާނުންގެ ކުލަބަކީ ދަރަނބޫދޫގެ އެންމެ ގިނަ ދުވަސްވީ ޖަމްޢިއްޔާއެވެ. ދަރަނބޫދޫގެ ދެ ޤަދަރުވެރިން އަދި ކުރީގެ ކަތީބުން ކަމުގައިވާ އަލްމަރުޙޫމް އިބްރާހީމް އިސްމާޢީލާއި، މުޙައްމަދު ޢުމަރުގެ މަސްޢޫލުވެރިކަމުގައި ރަޖިސްޓްރީކުރެވުނު މި ޖަމްޢިއްޔާއަށް މިހާރު ތިރީސް ނުވަ އަހަރުވީއެވެ. ފާއިތުވީ ދިގު މާޒީގައި މި ޖަމްޢިއްޔާވަނީ ދަރަނބޫދޫއަށް އެތައް ޚިދުމަތެއް ފޯރުކޮށްދީފައެވެ. އެތައް ފަހަރަކު އަޑިއަޅާލުމުންވެސް ޒުވާނުންތަކެއް އިސްނަގައި ކުރިއަށް ނިކުމެ މި ޖަމްޢިއްޔާ ކުރިއަށް ގެންދެވޭތޯ މަސައްކަތްތަކެއް ކޮށްފައިވެއެވެ. މި ރިޕޯޓްގެ މައިގަނޑު މަޤްޞަދަކީ މި ޖަމްޢިއްޔާ ހިންގުމަށް ފަހުގެ ތާރީޚުތަކުގައި ޒުވާނުންގެ ޝަޢުޤުވެރިކަން ނުލިބެނީ ކީއްވެކަން ދެނެގަތުމެވެ. މި މަޤްޞަދަށް ވާސިލުވުމަށް އަޅުގަނޑުމެންވާނީ، މި ކުލަބުގެ އެކި ދައުރުގެ ރައީސުންނާއި ނާއިބްރައީސުން އަދި ހިންގާކޮމެޓީގައި ހިމެނުނު އެހެނިހެން މެމްބަރުންނާއި، ރަށުގެ އެހެނިހެން ޖަމްޢިއްޔާތަކާއި ބައެއް ޒުވާނުން ދެކޭގޮތް ހޯދާފައެވެ.

ޑީޒެޑްސީގެ ކުރު ތަޢާރަފް:

ދަރަނބޫދޫ ޒުވާނުންގެ ކުލަބު (ޑީޒެޑްސީ) ރަޖިސްޓްރީ ކުރެވިފައިވަނީ 1984 ވަނަ އަހަރުގެ ފެބްރުއަރީ މަހުގައެވެ. އެއަހަރުން ފެށިގެން މިއަދާއި ހަމައަށް ކުލަބުން ކޮށްފައިވާ ހުރިހާ މަސައްކަތްތަކާއި ކުލަބުގެ ހިންގާ ކޮމެޓީއާއި ގުޅުންހުރި ހުރިހާ ލިޔެކިޔުމެއް އެކުލަބުގައިވެސް ފެންނާކަށް ނެތެވެ. އެހެންނަމަވެސް، ރަސްމީ ފަރާތްތަކުން ލިބިފައިވާ މަޢުލޫމާތުތަކަށް ބަލާއިރު، ރަށުގައި އެންމެ ފުރަތަމަ ކަރަންޓުގެ ޚިދުމަތް ފޯރުކޮށް ދިނުމާއި، އިޖްތިމާޢީ މަރުކަޒު ބިނާކުރުންފަދަ ކަންކަމުގައި އޭރުގެ ޒުވާނުންގެ ކުލަބުން އިސްނަގައި ޙަރަކާތްތެރިވެފައިވެއެވެ. އޭރުގެ ހިންގާ ކޮމެޓީތައް އެކުލަވާލެވިގެން އައިސްފައިވާ ގޮތުގެ މާގިނަ މަޢުލޫމާތުތަކެއް ފެންނާކަށް ނެތެވެ.

ރަނގަޅަށް ހިންގަމުން އައި މިކުލަބު އެންމެ ފުރަތަމަ މަޑުޖެހެން ފެށުނީ ކޮންއިރަކު ކޮން ސަބަބަކާއި ހުރެކަމެއް ސާފެއްނުވެއެވެ. ކުލަބުގެ ހިންގުން އެއްކޮށް މަޑުޖެހި، ކުލަބު މަތީން ޒުވާނުން ހަނދާން ނެތިފައިވަނިކޮށް އެކުލަބު ކޮޅަށް ޖެހުމަށް ޒުވާނުންތަކެއް އިސްވެ 2010 ވަނަ އަހަރު މަސައްކަތްފެށިއެވެ. އޭގެކުރިއަށް އޮތް ހިންގާކޮމެޓީއަށް ކުލަބާއި ގުޅުންހުރި ބައެއް ލިޔެކިޔުންތައް، ކޮންމެވެސް ސަބަބަކާއިހުރެ ފޯރުކޮށް ދެވިފައިނުވެއެވެ. ކުލަބުގެ މިލްކުވެރިކަމުގައި ހުރި އަގުބޮޑު ބައެއް އެސެޓްތައް ކުލަބާއި ޙަވާލުކުރެވުނު ނަމަވެސް، 2010 ވަނަ އަހަރު ކުލަބު ހިންގަން ނިކުތް ޒުވާނުންނަށް ކުލަބު ކޮޅަށް ޖަހަން ޖެހުނީ “ޒީރޯ” ބަޖެޓަކުންނެވެ.

އައު އުންމީދަކާއެކު ޒުވާނުންގެ އައު ޖީލެއް ކުލަބުގެ ކުރީ ސަފަށް ނިކުތުމުން ކުލަބާއިމެދު އުންމީދުތަކެއް އާވެގެން ދިޔައެވެ. 2010 ވަނަ އަހަރު އިންތިޚާބުކުރެވުނު ޑީޒެޑްސީގެ 11 ވަނަ ދައުރުގެ ހިންގާ ކޮމެޓީން ރަށު ފެންވަރުގައި ފާހަގަކޮށްލެވޭ ޙަރަކާތްތަކެއް “ހިންގާލުން” ވެގެން ދިޔައީ ޒުވާނުންގެ ކުލަބަށް ޒުވާނުންގެ ޝަޢުޤު ދަމައިގަތް ކަމަކަށެވެ. އެހެން ނަމަވެސް، އޭގެ ފަހުން ހިންގާ ކޮމެޓީއަށް ކުރިމަތިލާނެ ބަޔަކު ނުވެގެން ކުރީ ދައުރުގެ މީހުން ކޮމެޓީ ހިންގުމާއި، ކޮމެޓީތައް އިސްތިއުފާ ދިނުމުން ބައި އެލެކްޝަން ބާއްވަންޖެހުމާއި، ކޮމެޓީތަކަށް ކުރިމަތިލާނެ ބަޔަކުނުވެ، ތިން ހަތަރު ފަހަރު އިޢުލާނު ކުރަންޖެހުން ފަދަ ކަންކަން ހިނގާފައިވެއެވެ. މިއީ އެކުލަބުގެ މިއަދުގެވެސް ޙާލަތެވެ.

ޝަޢުޤުވެރި ނުވަނީ ކީއްވެ؟

މި ރިޕޯޓަށް މަޢުލޫމާތު ދެއްވި ޑީޒެޑްސީގެ ކުރީގެ ގިނަ ރައީސުން އިއްތިފާޤުވި އެއްކަމަކީ އިޖުތިމާޢީ ކަންކަމުގައި ނުވަތަ ހިލޭ ސާބަހަށް ގިނަ މަސައްކަތްތަކެއް ކުރުމަށް ޒުވާނުންގެ ހިތްވަރެއް މިހާރު ނުހުންނަ ކަމަށެވެ. އޭގެ ސަބަބުތައްވެސް ގިނައެވެ. ރަސްމީ ވަޒީފާތަކަށް ވަގުތު ދެމުން އާއިލާއަށް ވަގުތު ދެމުން އިތުރު ކަންކަމަށް އިސް ނުނެގެނީއެވެ. ދިރިއުޅުމުގެ ޙާލަތަށް އައިސްފައިވާ ބަދަލުތަކާ ގުޅިގެން ވަގުތު ނުދެވެނީއެވެ. މިހެންގޮސް ބައިވަރެވެ. ކުލަބުގެ ރައީސްކަން ކުރިން ކުރެއްވި އަބްދުލް ބާޞިތު އިބްރާހީމްގެ ނަޒަރުގައި ޒުވާނުންގެ ތެރޭގައިވެސް ކުލަބު ހިންގުމަށް ޝައުޤުވެރިވާ މީހުން އެބަތިއްބެވެ. އެހެންނަމަވެސް ނެތީ އެމީހުންނަށް މަގު ދައްކައިދޭނެ ލީޑަރެކެވެ. އެމީހުން މޯޓިވޭޓް ކޮށްގެން އަތުހިފައިގެން ކުރިއަށްދާނެ ހިތްވަރު ހުރި ވެރިން މިހާރު ނުފެންނަކަމަށް ބާޞިތު ފާހަގަކުރެއްވިއެވެ.

އޭގެ ބަދަލުގައި މިހާރު ފެންނަނީ އިސްނަގައިގެން ކަންކަމަށް ނިކުންނަ ޒުވާން ކުދިންނަށް ކުލަބުގެ އާންމު މެމްބަރުންނާއި ރަށުގެ އާންމު ރައްޔިތުންގެ ފަރާތުން ފުރައްސާރަ ކުރާތަންކަމުގައި ބާޞިތު ފާހަގަކުރެއްވިއެވެ. އެއީ އެކުދިންގެ މޯޓިވޭޝަން ކުލަބަށް ގެއްލޭކަމެއްކަން ފާހަގަކުރައްވަމުން ބާޞިތު ވިދާޅުވީ މުޖުތަމަޢުން އެކަން ބަދަލުކުރަންޖެހޭ ކަމަށެވެ.

ޒިންމާތައް އަދާކުރުމަށްވުރެ ބޮޑަށް މަޤާމަށް ބެލުން:

މިއީވެސް ކުލަބުގެ ކުރީގެ ރައީސުން ފާހަގަކުރެއްވި މުހިންމު ކަމެކެވެ. ކުލަބުގެ ހިންގާ ކޮމެޓީގެ މަޤާމުތަކަކީ ވޯޓަކުން އިންތިޚާބު ކުރެވޭ މަޤާމުތަކަކަށް ވެފައި، އެފަދަ މަޤާމަކަށް ކުރިމަތިލައިގެން، ރައްޔިތުންގެ ތެރެއިން ބަޔަކު ބަލައިގަންނަ ކަމުގެ އިޙުސާސް ކުރެވުން ވެފައިވަނީ މަޤާމުތަކުގެ ޒިންމާ އަދާކުރުމަށްވުރެ ބޮޑަށް ލިބޭ ހިތްހަމަޖެހުމަކަށެވެ. ސެކްރެޓަރީ ފަދަ ޒިންމާ ބޮޑެތި މަޤާމުތަކަށް ކުރިމަތިލައްވާއިރު އެ މަޤާމުތަކުގައި ކުރަންޖެހޭ މަސައްކަތްތަކީ ކޮބައިކަންވެސް އެނގިފައި ނުވުމާއި އަދި އެފަދަ މަޤާމުތައް އަދާކުރުމުގެ ހުނަރާއި ޤާބިލްކަން އަމިއްލައަށް ނެތްކަން ގަބޫލުކުރެވޭ ހާލުގައިވެސް މަޤާމުތަކަށް ކުރިމަތިލާކަން ރައީސުންގެ ވާހަކަތަކުން ހާމަވިއެވެ.

ސިޔާސީ ވިސްނުން:

ޒުވާނުންގެ ކުލަބުގެ ބައެއް އާންމު މެމްބަރުންގެ ނަޒަރުގައި އެކުލަބު ވަނީ ވަރަށް ބޮޑަށް ސިޔާސީ ކުލަޖެހިފައެވެ. ކުލަބުގެ ހިންގާ ކޮމެޓީގެ އިންތިޚާބަކީވެސް ސިޔާސީ ޕާޓީއެއްގެ ގޮތްޕެއްގެ އިންތިޚާބެއްހެން ހީވާވަރަށް، ކަންކަން ދާކަމަށް ބައެއް ޒުވާނުން ފާހަގަކުރެއެވެ. އެގޮތުން ކުލަބުގެ ބައެއް އިންތިޚާބުތަކަށް މެމްބަރުން ކުރިމަތިލާފައިވަނީ “ސިޔާސީ ޗެލެންޖެއް” ކުރުމަށްކަމަށް ތުހުމަތުކުރާ ޒުވާނުންވެސް ތިބިއިރު، ބައެއް ރައީސުންގެ ވާހަކަތަކުންވެސް އެކަންވަނީ ފާހަގަކުރެވިފައެވެ.

ކުލަބަށް ފޯކަސް ނެތުން:

ކުލަބުގެ ރައީސްކަން ކުރައްވާފައިވާ އުމައިރު އަޙްމަދުގެ ނަޒަރުގައި މިހާ ގިނަ ދުވަސްވީ، އަދި ޙަރަކާތްތެރި ކުލަބަކަށް ލިބެންޖެހޭ ސަމާލުކަން ކައުންސިލްތަކުން ނުދެއެވެ. އުމައިރުގެ ބެލުމުގެ ދަށުން ކުލަބު ހިންގަމުން ދިޔަ ދުވަސްތަކަކީ އޭރުގެ ކައުންސިލުން ކުލަބަށް ފާހަގަކޮށްލެވޭ އެހީތެރިކަމެއް ލިބިގެންދިޔަ ދުވަސްތަކެއް ނަމަވެސް، މިހާރު އެކަން ނުފެންނަކަމަށް އުމައިރު ދެކެއެވެ. “ކައުންސިލް އެކަންޏެއްނޫން! ސަރުކާރުތަކުންވެސް ކުލަބުތަކަށް މާބޮޑު ފޯކަސްއެއް ދޭތަނެއް ނުފެނޭ” މައްސަލައިގެ ހުރި ކަންބޮޑުވުންތައް ފާހަގަކުރަމުން އުމައިރު ބުނެފައިވެއެވެ.

އުމައިރު ފާހަގަކުރެއްވި އަނެއްކަމަކީ ޒުވާނުންގެ ކުލަބަކީ ރަށުގެ މުޅި ޒުވާނުން ތަމްސީލުކުރެވޭ ހަމައެކަނި ކުލަބަށްވެފައި، ކުލަބު އިނދަޖެހި ނުވަތަ ވިދުން ފަޑުވެގެން ދާއިރުވެސް “ކަމެއްނުކުރެވޭއިރަށް” އަންނަ ފާޑުކިޔުންތަކަކީވެސް ކުލަބަށް ޝަޢުޤުވެރިކަން ގެއްލޭކަމެކެވެ. ޒުވާނުންގެ ކުލަބާއި މެދު ޒުވާނުންގެ އުއްމީދުތަކެއް ހުންނާނެކަމަށާއި، ޒުވާނުން ގޮވައިގެން ކަންކަމުގައި އުޅެވޭނެ ލީޑަރޝިޕެއްގެ ބޭނުން ވަރަށްބޮޑަށް ޖެހިފައިވާކަމަށް އުމައިރު ދެކެއެވެ.

ކޯލާއައުނު ފުޓްސަލް މުބާރާތް!:

ބައެއް ރައީސުން އަދި ޒުވާނުންގެ ކުލަބުގެ ހިންގާ ކޮމެޓީތަކުގައި އެކިއެކި އަހަރު އެކި މަޤާމުތައް އަދާކުރެއްވި މެމްބަރުން ފާހަގަ ކުރެއްވި ގޮތުގައި ޒުވާނުންގެ ކުލަބުގެ “އައިކޮނިކް” ކޯލާއައުނު ފުޓްސަލް މުބާރާތް ވެފައިވަނީ ކުލަބަށް އޮތް އެންމެ ބޮޑު ޗެލެންޖަށެވެ! ޒުވާނުންގެ ކުލަބޭ ބުނުމުން ގިނަ ޒުވާނުންގެ ވިސްނުމަށް އެންމެ ފުރަތަމަވެސް އަންނަނީ އެމުބާރާތް ކަމަށެވެ. ނުވަތަ އެއީ ޒުވާނުންގެ ކުލަބުން އެންމެ އިސްކަން ދޭންޖެހޭ މައްސަލަކަމަށެވެ! އެގޮތަށް ވިސްނެންވީ ސަބަބުތަކެއްވެސް އެބަހުއްޓެވެ! ފަހުގެ ތާރީޚުތަކުގައި ކުލަބު އެކްޓިވްކޮށް ކުރިއަށް ގެންދެވުނީވެސް އެމުބާރާތް މެދުނުކެނޑި ކުރިއަށް ގެންދެވިގެންނެވެ! މީގެ ކުރިން ޒުވާން އަންހެން ކުދިންނަށް އަމާޒުކޮށް ކުރިއަށް ގެންދިޔަ މުބާރާތްތައްވެސް ހުއްޓާލުމަށްފަހު ކޯލާއައުނު ކުރިއަށް ގެންދިޔައެވެ!

ކުލަބުގެ އެންމެ ފަހުގެ ދައުރާއި ކުލަބުގެ 11 ވަނަ ދައުރުގައި ހިންގާ ކޮމެޓީ މެމްބަރެއްގެ ގޮތުގައި މަސައްކަތްކުރެއްވި މުޙައްމަދު ޙުސައިން (އުއްޗު) ގެ ނަޒަރުގައިވެސް ކޯލާއައުނަށް ޑިމާންޑުކޮށް، ކުލަބުގެ ފޯކަސްވެސް އެކަމަށް ބެހެއްޓުމަށް ހިންގާކޮމެޓީންނާއި އާންމު މެމްބަރުންގެ ފުރެޝަރު ވަރަށް ބޮޑަށް ކުރިމަތިވެއެވެ.

އުއްޗު ފާހަގަކުރެއްވި އެންމެ މުހިންމު އެއްކަމަކީ ޒުވާނުން ވަންނާނެ ޒުވާނުންނަށް ޚާއްސަތަނެއް ރަށުގައި ނެތުމެވެ. ޒުވާނުން ކުލަބުގެ އިދާރާއެއް ނެތުމެވެ. ކުލަބަށް ބިމެއްވެސް ނެތި ދުވަސްތަކެއް ހޭދަވެގެން ދިޔައިރު، ބިމެއް ހަމަޖެހުމުންވެސް އެކަމަށް ފޯކަސް ނުލިބުމެވެ. ޒުވާނުން ކުޅިވަރުވެސް ކުޅެންވީ ކަމަށާއި މުބާރާތްތައްވެސް ބާއްވަންޖެހޭކަމަށް އުއްޗު ދެކޭއިރު އެއަށްވުރެ ބޮޑަށް ޒުވާނުން ވިސްނުން ގެންގުޅެންވީ އެބައިމީހުން ވަންނާނެތަނެއް ހޯދުމަށެވެ.

“މިހާރު ވާގޮތަކީ ހިންގާ ކޮމެޓީއަށް މިއަންނަނީ އެކި ވަޒީފާތަކުގަ އެކި އޮފީސްތަކުގަ އުޅޭ ޒުވާނުން. އިދާރީ ކަމެއް ކުރަންޖެހުނަސް މިޖެހެނީ އެކި އޮފީސްތަކުގެ އެހީތެރިކަމަށް އެދެން! ޖަލްސާއެއް ބާއްވަންޏާ މިޖެހެނީ ކޮންމެސް މީހެއްގެ ގެއަކަށް ވަންނަން ނުނީ ކޮންމެސް ދިމާލެއްގަ އޮންނަ ޖޯއްޔަކަށްދާން! މިބައްދަލުވުންތަކުގެ ޔައުމިއްޔާތަކާއި ނިންމުންތައް ލިޔެ ރައްކާކުރާނީ ކިހިނެތް! މިކަންކަމަށްވުރެ ބޮޑަށް ޒުވާނުންގެ ފޯކަސް މިއިންނަނީ ކުޅިވަރަށް! ކޯލާއައުނަށް!” ޒުވާނުން ކުލަބު ހިންގާނެ އިމާރާތަކަށް ޒުވާނުންގެ ފޯކަސް ނުހުންނަކަން ފާހަގަކުރަމުން އުއްޗު ކިޔައިދިނެވެ.

ޒުވާނުންގެ ދޭދޭގުޅުން ހީނަރުވުން:

ދޭދޭ ފަރުދުންގެ މެދުގައި އޮންނަންޖެހޭ ގުޅުންތައް ހީނަރުވެފައިވުމަކީވެސް ޒުވާނުންގެ ކުލަބު ހިންގުމަށް ކުރިމަތިވާ ހުރަހެއްކަމަށް ރިޕޯޓަށް ވާހަކަދެއްކި ބައެއް ފަރާތްތަކުން ފާހަގަކުރިއެވެ. ބައެއް ޒުވާނުންގެ ދުވަސް ނިމިގެންދާއިރު އަމިއްލަ އާއިލާއާއި ވާހަކަ ދައްކާލާނެ ވަގުތެއް ނުހޯދޭކަމަށާއި، ވަރަށް ކުދި ކުދި ރަނގަޅު އާދަތައް އަދާކުރުމަކީ ޒުވާނުންނަށް ލަދުވެތި ކަމެއްކަމަށް ފާހަގަކުރިއެވެ. މިސާލެއްގެ ގޮތުން މެމްބަރަކު ފާހަގަކުރެއްވީ ސިޔާސީ ޖަގަހަތަކުގައި ތައްޔާރުކުރާ ކެއުމެވެ. ބޮޑެތި ކެއުންތައް ކެއްކުމަށް މަސް ހޯދުން ފިޔަވައި އިތުރުކަމެއް ފިރިހެނުން ނުކުރާއިރު ކައްކާއެއްޗެހި ގޭގެއިން ޖަގަހަތަކަށް އުފުލައި ކެއުން ތައްޔާރުކުރަނީވެސް އަންހެނުންކަމެވެ. އަދި އަންހެނުން ކަނީވެސް ފިރިހެނުން ކައިފައި ބާކީ އޮންނަ އެއްޗެއްކަމަށާ، ކައިފައި ތަށި ދޮންނާނެ ހިތްވަރުވެސް ޒުވާން ފިރިހިން ކުދިންގެ ނުހުންނަކަމަށް ރިޕޯޓަށް ވާހަގަ ދެއްކި ކުލަބުގެ ހިންގާ ކޮމެޓީގައި މެމްބަރުކަން ކުރެއްވި ޒުވާން މެމްބަރަކު ފާހަގަކުރިއެވެ. މިއީ ޒަމާނުއްސުރެ އާދަވަމުން އަދި އާދަކުރުވަމުން އައިސްފައިވާ ގޮތްނަމަވެސް މިކަންކަން ބަދަލުވާންޖެހޭ ކަމަށް އެމެމްބަރު ދެކެއެވެ. މިފަދައިން ގުޅުންތައް ހީނަރުވުމަކީ ކަންކަމަށް އިސްނަގައި އުޅުމަށް ހުރަސްއެޅޭ ކަންކަންކަމަށާއި، އިސްނެގުމާއި އިސްވެ ނޫޅޭނަމަ، ޒުވާނުންގެ ކުލަބަށް ކުރިމަތި ލުމުގެ ވިސްނުން ގެންގުޅުމަކީ ދެރަކަމެއްކަމަށް އެ މެމްބަރު ފާހަގަކުރެއްވިއެވެ.

އަސާސީ ޤަވާއިދުގެ ގޮންޖެހުން:

ޒުވާނުންގެ ކުލަބަށް މީގެ 39 ވަރަކަށް އަހަރުކުރިން ހަދައި އަމަލުކުރަމުން އަންނަ އެކުލަބުގެ ޤަވާއިދަށް ވަރަށް ގިނަ ބަދަލުތައް ގެންނަންޖެހިފައިވާ ގިނަ ރައީސުން ދެކެއެވެ. ޚާއްސަކޮށް ކުލަބުގެ ނިމިދިޔަ ދައުރުގެ ރައީސްކަން ކުރެއްވި މުއައްދު މުޙައްމަދު އެގޮތަށް ދެކިލައްވައެވެ. ކުލަބުގެ މި ދިގު ތާރީޚުގައި އަސާސީ ޤަވާއިދަށް ބަދަލު ގެނެވިފައިހުރީ ވަރަށް މަދު ފަހަރެއްގައި ވަރަށް ކުޑަ މިންވަރަކަށެވެ. ރިޕޯޓަށް ވާހަކަ ދައްކަމުން މުއައްދު ހާމަކުރެއްވި ގޮތުގައި އަސާސީ ޤަވާއިދުގައި އޮންނަގޮތަށް އަހަރަކު 1 ފަހަރު ކޮމެޓީގެ ދައުރު ބަދަލުވުމަކީ ބޮޑު ޗެލެންޖެއްކަމަށެވެ. އެގޮތުން މިދައުރުގައި ބޮޑެތި ކަންތައް ތަކެއް ނުކުރެވި ނިމިގެން ދިޔަ ނަމަވެސް، ކަންކަން ކުރާ ކޮމެޓީތަކަށް އެހާ އަވަސްއަވަހަށް ދައުރު ބަދަލުވާނަމަ އުދަގޫވާނެއެވެ. މިދައުރުވެސް ނިމިގެން ދިޔައީ ޒުވާނުންގެ ކުލަބުގެ ބޭންކް އެކައުންޓް “އެކްޓިވޭޓް” ނުކުރެވިކަމަށާއި، ކުލަބުގެ އެކައުންޓް އެކްޓިވޭޓް ކުރުމަށް ކުރަންޖެހުނު މަސައްކަތްތަކަށް އެކި ސަބަބުތަކާއި ހުރެ ގިނަ ދުވަސްތަކެއް ހޭދަކުރަންޖެހުނުކަމަށް މުއައްދު ހާމަކުރިއެވެ.

ޑީޒެޑްސީއަކީ އާންމު މެމްބަރުންގެ ގޮތުގައި ވަރަށް ގިނަ މެމްބަރުން ރަޖިސްޓާރ ކޮށްފައިވާ ޖަމްޢިއްޔާއެކެވެ. އެކުލަބު ދަރަނބޫދޫ އަށް ނިސްބަތްވި ނަމަވެސް، ދަރަނބޫދޫއާއި އެއްވެސް ގުޅުމެއްނެތް ބައިވަރު މީހުން ރަޖިސްޓްރީގައި އެބަތިއްބެވެ. އޭގެތެރޭގައި ދުރު އަތޮޅު އަތޮޅުތަކުގެ މީހުންނާއި ބިދޭސީންވެސް ހިމެނެއެވެ. ގިނަ މެމްބަރުންނާއި ގުޅޭނެ އަދާހަމަ ފޯނު ނަމްބަރުތަކެއް ކުލަބަކު ނެތެވެ. އެހެން ނަމަވެސް އެކުލަބުގެ ޤަވާއިދަށް އެއްވެސް ބަދަލެއް ގެނެވެން އޮތީ ރަޖިސްޓްރީގައިވާ މެމްބަރުގެ ދެބައިކުޅަ އެއްބައި ހާޒިރުވާ ޖަލްސާއެއްގައި، ހާޒިރުވި މެމްބަރުންގެ ދެބައިކުޅަ އެއްބައި އަޣްލަބިއްޔަތު ލިބިގެންނެވެ.

ކުލަބުގެ ހިންގާ ކޮމެޓީތަކުގައި ހިމެނުނު އެކިއެކި ބޭފުޅުންގެ ނަޒަރުގައި ބޭނުމެއް ނެތް ގޮތުގައި، ގުޅުމެއްވެސް ނެތް ބަޔަކު ޖަމްޢިއްޔާއަށް ވައްދާފައިވުމަކީ ހިންގާފައިވާ “ގޯސް” އަމަލެއްކަމަށެވެ. އެކަމުގެ އުނދަގޫ މިހާރު އެންމެ ބޮޑުވެފައި މިވަނީ ހިންގާ ކޮމެޓީތަކަށެވެ. އެހެންނަމަވެސް އެކަންކަންވެސް ހިނގާފައިއެވަނީ ޤަވާއިދު އެގޮތައް ހުއްދަކުރާތީއެވެ. ޤަވާއިދު އޮތްގޮތުން ބަދަލު ކުރުމަކީވެސް ދެން ފަސޭހަކަމަކަށް ނުވާނެއެވެ.

ކުލަބުގެ އާންމު އެހެން މެމްބަރުންގެ ނަޒަރުގައި މިނޫނަސް ބައިވަރު އެހެން ސަބަބުތައް ހުރުމަކީ އެކަށީގެންވާ ކަމެކެވެ. އެންމެނަށްވެސް ޔަޤީންކުރެވޭ އެއްކަމަކީ ރަށަށް މުހިންމު ޚިދުމަތްތަކެއް ކޮށްދިން ދިގު ތާރީޚެއް އޮތް ކުލަބެއްގެ ހިންގާ ކޮމެޓީއެއް، އެކުލަވާލަން މިފަހަކުން އައި ކޮންމެ ދައުރަކުވެސް ތަކުރާރުކޮށް އިޢުލާނުތަކެއް ކުރަންޖެހުމަކީ، އެކުލަބަށް ޒުވާނުންގެ ޝައުޤުވެރިކަން ނެތްކަމުގެ ހެއްކެތްކަމެވެ. އެކުލަބާއި މެދު، އުއްމީދުތަކެއް އަދި ގިނަ ތަސައްވުރުތަކެއް ދައްކައިދޭނެ ޒުވާން ލީޑަރުން މިއަދު މަދުކަމެވެ.