ފުޓްސަލްގައި ކާމިޔާބު ނަތީޖާތަކަކާއި މުބާރާތްތަކެއް ހިންގަމުން އައި ދަރަނބޫދޫގައި ފުޓްސަލްގެ ފޯރި ފަނޑުވަމުން ދަނިކޮށް އެފޯރި ކޮންމެވެސް ސިފައެއްގައި ދިރުވަން މަސައްކަތް ކޮށްފައިވަނީ “ޖަޒީރާ ލީގު”ންނެވެ. ދަރަނބޫދޫގައި އެންމެ ފޯރިގަދަކޮށް ބާއްވަމުން އައި ދަރަނބޫދޫ ޒުވާނުން ކުލަބުގެ “ކޯލާއައުނު ފުޓްސަލް ކަޕް” ކޮވިޑާއި ގުޅިގެން މެދުކަނޑާލުމަށްފަހު، ކުރިއަށް ގެންދެވިފައި ނުވެއެވެ. މި ރިޕޯޓްގެ ބޭނުމަކީ ޖަޒީރާ ފުޓްސަލް ލީގުގެ މުހިންމު ކަންކަމުގެ މައްޗަށް ކުރުގޮތަކަށް ބަލާލުމެވެ. މި ރިޕޯޓަށް މަޢުލޫމާތު އެއްކުރެވިފައިވާނީ ސޯސިއަލް މީޑިއާގައި ލިބެންހުރި މަޢުލޫމާތާއި، ލީގުގެ މެޗުތަކުގައި ފަނޑިޔާރުން ތައްޔާރުކޮށްފައިވާ ކަރުދާސްތަކަށް ބަލައިގެންނެވެ.

ޖަޒީރާ ލީގު މިއީ ކޮންބައެއް؟

ޖަޒީރާ ފުޓްސަލް ލީގަކީ ފުޓްސަލް އަށް ލޯބިކުރާ ދެތިން ޒުވާނަކު އިސްނަގައި އިންތިޒާމް ކުރަމުން އަންނަ މުބާރާތެކެވެ. އެންމެ ފުރަތަމަ މި މުބާރާތް ބޭއްވިފައިވަނީ 2022 ވަނަ އަހަރުގެ ޖަނަވަރީމަހުގައެވެ. އަދި ހަމަ އެއަހަރުގެ ޖުލައި މަހުގައި ޖަޒީރާ ލީގުގެ ދެވަނަ މުބާރާތް “މިލްޝާ މޯލްޑިވްސް ޖަޒީރާ ލީގު” ނަމުގައި ބާއްވާފައިވެއެވެ. މިއީ ފުޓްސަލް މުބާރާތެއްގެ ދެ މުބާރާތް ހިނގަމުން ދިޔަ އަހަރެއްގައި ބޭއްވުނު ފުރަތަމަ ފަހަރެވެ. ޖަޒީރާ ލީގުގެ ތިންވަނަ މުބާރާތް މިއަހަރުގެ ޖުލައި މަހު ނިމިފައިވާއިރު އެ މުބާރާތް ބާއްވާފައިވަނީ “ފުއްޓަރު ސްޕޯޓްސް ޖަޒީރާ ލީގު 2023” ނަމުގައެވެ.

ފުއްޓަރު ސްޕޯޓްސް ކުލަބަކީކޮބާ؟

ފުއްޓަރު ސްޕޯޓްސް ކުލަބަކީ ޤާނޫނު ނަމްބަރު 2015/30 ގެ ދަށުން ކުޅިވަރު ޖަމިއްޔާއެއްގެ ގޮތުގައި 2023 މެއި 21 ވަނަ ދުވަހު މިނިސްޓްރީ އޮފް ޔޫތު އެންޑް ސްޕޯޓްސް ކޮމިއުނިޓީ އެމްޕަވަރމަންޓް ގައި ރަޖިސްޓާރ ކުރެވިފައިވާ ކުލަބެކެވެ. މިކުލަބުގެ އެޑްރެސް އަކަށް ހަމަޖައްސާފައިވަނީ ފ. ދަރަނބޫދޫ ފެބްރިކްވިލާއެވެ. މުއައްސިސުންގެ ގޮތުގައި ޖަޒީރާ ލީގު އިންތިޒާމްކުރަމުން އައި ދެ ޒުވާނަކުވަނީ ކަނޑައަޅާފައެވެ. އެހެންކަމުން މިއީ ރަށުގައި އަލަށް ރެޖިސްޓަރ ކުރެވިފައިވާ ކުޅިވަރަށް ޚާއްސަ ކުލަބެކެވެ.

ޖަޒީރާ ލީގުގެ ޓީމުތައް:

މިއީ ހަމައެކަނި ދަރަނބޫދޫގެ ޒުވާނުންނަށް ހުޅުވާލެވިގެން ކުރިއަށް ގެންދާ ލީގެއްކަމުން ބައިވެރިވުމުގެ ފުރުސަތު ލިބެނީ ދަރަނބޫދޫއަށެވެ. ލީގުގެ ތިން ސީޒަނެއް ނިމިފައިވާއިރު ޖުމުލަ ބައިވެރިވެފައިވަނީ 6 ޓީމެކެވެ. ލީގުގެ ތިން މުބާރާތުގައި ބައިވެރިވެފައިވަނީ އޭކްސް ސްޕޯޓްސް ކުލަބާއި، ބީސީ ސްޕޯޓްސް ކުލަބުގެ އިތުރުން ގަޓްސިޓީއެވެ. 2022 ވަނަ އަހަރުގެ ދެ މުބާރާތުގައި ސުޕަގަޓް އިން ބައިވެރިވެފައިވާއިރު 2023 ވަނައަހަރު އެޓީމު ބައިވެރިނުވެއެވެ. އެޑް ޖަމްޢިއްޔާއިން ދެ ސީޒަންގައި ބައިވެރި ވެފައިވާއިރު ވެސްޓް ސިޓީ ވަނީ މިއަހަރު މި މުބާރާތުގައި އަލަށް ބައިވެރިވެފައެވެ.

ޖަޒީރާ ލީގުގެ ޗެމްޕިއަނުން:

ޖަޒީރާ ލީގުގެ ޗެމްޕިއަންކަން އެއްވެސް ޓީމަކަށް އެއްފަހަރަށްވުރެ އިތުރަށް ހޯދިފައިނުވެއެވެ. ލީގުގެ ފުރަތަމަ ޗެމްޕިއަންއަކީ ގަޓްސިޓީއެވެ. ދެވަނަ މުބާރާތުގެ ޗެމްޕިއަންކަން އެޑް ޖަމްޢިއްޔާއިން ހޯދާފައިވާއިރު އެންމެ ފަހުގެ ޗެމްޕިއަނަކީ ބީސީ ސްޕޯޓްސް ކުލަބެވެ. މި ލީގުގެ ތިން ފައިނަލްގައިވެސް ބީސީ ސްޕޯޓްސްކުލަބު ވާދަކޮށްފައިވާއިރު، ގަޓްސިޓީ ވަނީ ދެފައިނަލްގައި ވާދަކޮށްފައެވެ.

މުބާރާތުގެ ގޯލުތައް:

މި ލީގުގެ ތިން ފައިނަލްގައި ކުޅެފައިވައިވާއިރު މުބާރާތުގެ ތާރީޚުގައި ޖުމުލަ 202 ގޯލުވަނީ ޖަހާފައެވެ. މީގެތެރެއިން 4 ގޯލަކީ ބައިކޮޅަށް ވަދެފައިވާ ގޯލުގެ އަދަދެވެ.  ވަކިވަކި ކުޅުންތެރިންނަށް ބަލާއިރު ލީގުގެ ތިން ސީޒަނުގައި ޖުމުލަ 41 ކުޅުންތެރިއަކުވަނީ ގޯލުޖަހާފައެވެ.

މުބާރާތުގެ ޚާއްސަ ކުޅުންތެރިޔާ:

މި މުބާރާތުގެ ޗެމްޕިއަންކަން 1 ފަހަރަށްވުރެ ގިނަ ފަހަރު ހޯދާފައިވަނީ އެންމެ ކުޅުންތެރިއެކެވެ. އެއީ މިއަހަރުގެ މުބާރާތުގައި ބީސީ ސްޕޯޓްސް ކުލަބަށް ކުޅެދިން ރަޔާންއެވެ. ރަޔާންވަނީ މިމުބާރާތުގައި 3 ޓީމަކަށް ކުޅެ 3 ފަހަރު ޗެމްޕިއަންކަން ހޯދާފައެވެ. އެގޮތުން ފުރަތަމަ މުބާރާތުގައި ގަޓްސިޓީ، ދެވަނަ މުބާރާތުގައި އެޑް ޖަމްޢިއްޔާ އަދި ތިންވަނަ މުބާރާތުގައި ބީސީ ސްޕޯޓްސް ކުލަބަށް ޗެމްޕިއަންކަން ހޯދައި ދިނުމުގައި ރަޔާންވަނީ ވަރަށް މުހިންމު ދައުރެއް އަދާކޮށްފައެވެ.

މިމުބާރާތުގައި ރަޔާން ޚާއްސަވާ އަނެއް ސަބަބަކީ އޭނާ ޖަހައިދީފައިވާ ގޯލުގެ ޢަދަދެވެ. އުމުރުން އެންމެ 15 އަހަރުގައި ޖަޒީރާ ލީގުގައި ޖުމުލަ 20 ގޯލު ޖަހާފައިވާ ރަޔާނަކީ މިމުބާރާތުގެ “އޯލްޓައިމް ޓޮޕް ސްކޯރާރ”އެވެ. ޖުމްލަ ގޯލުގައި ރަޔާންއާއި އެންމެ ގާތުން ވާދަކުރާ އާދަމް އަޙުމަދާއި ދެމެދު 7 ގޯލްގެ ތަފާތު އެބައޮތެވެ.  ރަޔާންވަނީ ގަޓްސިޓީއަށް 7 ގޯލް އަދި އެޑްޖަމިއްޔާއަށް 3 ގޯލް ޖަހައި ދީފައެވެ. އަދި މިއަހަރުގެ މުބާރާތުގައި ބީސީ ސްޕޯޓްސް ކުލަބަށް 10 ގޯލް ޖަހާދީފައިވާ ރަޔާނަކީ މިއަހަރުގެ އެންމެ ގިނަ ގޯލުޖެހި ކުޅުންތެރިޔާވެސް މެއެވެ.