އާޓްގެ ދާއިރާއިން ފާހަގަކޮށްލެވޭ ހުނަރުވެރި ޒުވާނުން ރާއްޖޭގައި ނިސްބަތުން އަންނަނީ ކުރިއަރަމުންނެވެ. ދިވެހި ޒުވާން ބައެއް ކުރެހުންތެރިންގެ މަސައްކަތްތަކަކީ މުޅި ދުނިޔޭގެ ސަމާލުކަންވެސް ހޯދާފައިވާ މަސައްކަތްތަކެކެވެ. މީގެ އަހަރުތަކެއް ކުރިއަށް ޖެހިލާއިރު މިއީ ރާއްޖޭގައި މާކުރިއަރައިގެން ހިނގައިދާނެކަމަށް ގިނަ މީހުން ހީކުރި ދާއިރާއެއް ނޫނެވެ. ޚާއްސަކޮށް، މިދާއިރާއިން ކުރިއަށް ދިއުމަށް ހުވަފެން ދެކެމުންއައި ގިނަ ޒުވާނުންނަށް އޭރު، ކުރިއަށް ދިއުމަށް ފަހި ފުރުސަތުތަކެއް ނެތެވެ. މި ރިޕޯޓްގައި މި ބަލާލަނީ އާޓްގެ ދާއިރާއިން ކުރިއަރަމުން އަންނަ ދަރަނބޫދޫގެ ޒުވާނެއް ކަމުގައިވާ ރުވައިދާ އިބްރާހީމް (ރުވޭ) ގެ މަސައްކަތަށެވެ. ރުވޭ ވަނީ ދާދި ފަހުން ނިމުނު ދިވެހި ފަންނުވެރިންގެ މަސައްކަތް ދައްކުވައިދޭ ރާއްޖޭގެ އެންމެ ބޮޑު މައުރަޒުގައި އޭނާގެ ކުރެހުމުގެ ހުނަރު ދައްކުވައި ދީފައެވެ.
ރުވޭގެ ކުރެހުމުގެ މަސައްކަތަށް ދަނިއުސްގެ ސަމާލުކަން އަންނަންފެށީ، ކޮވިޑް ދުވަސްވަރު ކަރަންޓީނުގައި ހުރެ ކުރަހައި ސްޓޯރީއަށް ދޫކޮށްލި ފޮޓޯއަކާއި ހިސާބުންނެވެ. ކެންވާސްއެއްގައި ކުރެހި އެކްރެލިކް އާޓަކުން “ކޮއިފިޝް” މަންޒަރެއް ސްޓޯރީއަށް ދޫކޮށްލުމަށްފަހު، ކަލިގްރަފީ ޑިޒައިންތަކެއް އަމިއްލައަށް ކުރަހައި ރަށުތެރެއަށް އޭނާގެ އާޓްގެ ހުނަރު ދައްކާލިއެވެ. އެހެންނަމަވެސް، ދަނިއުސް ޓީމަށް ރުވޭގެ އިންޓަވިއުއެއް ނެގުމުގެ މަސައްކަތް މިކުރެވުނީ އަމިއްލައަށް ހުނަރު ތަރައްޤީކޮށް ރާއްޖޭގެ އެންމެ ބޮޑު ކުރެހުމުގެ މަޢުރަޒަށްވެސް ރުވޭގެ ހުނަރު ދިޔަ ފަހުންނެވެ.
ދަނިއުސްއަށް ދިން އިންޓަވިއުގައި ރުވޭ ފާހަގަކުރި ގޮތުގައި ކުރަހަން ފެށުނީ ސީދާ ކޮންއިރަކުކަމެއް ބުނާކަށް ނޭގެއެވެ. އެކަމަކު ހަނދާން ހުންނައިރުއްސުރެ ކުރެހުމަށް ޝަޢުޤުވެރިކަން ހުންނަކަމަށާއި ކުޑައިރު ކުލާހުގައި އިންނައިރުވެސް ވަރަށް ކުރެހިކަން ފާހަގަކުރިއެވެ. ކުރެހުމަށް ބޮޑަށް ޝަޢުޤު އުފެދެންފެށީ ސްކޫލް ދައުރު ނިންމުމަށްފަހު ހުސްވަގުތުތައް މާގިނައިން ލިބެންފެށި ހިސާބުންނެވެ. އޭރު ކުރެހުމުގެ ދާއިރާގެ މާގިނަ ކަންތައްތަކެއް ނޭނގޭތީ މިއީ ރާއްޖޭގައި ބަލައިގަންނަ ދާއިރާއެއް ނޫންކަމަށް އޭރު ވިސްނިފައި އޮތްކަން ރުވޭގެ ވާހަކަތަކުން އެނގުނެވެ.
“ދެން އޭރު ސްކޫލު ނިންމާފައި ގދ. ތިނަދޫއަށް ގޮސް އުޅެނިކޮށް އެރަށުގައި އޮތް އެގްޒިބިޝަނެއް ބަލާލަން ދިޔައިން. އެތަނުން ފެނުން ކުރެހުންތަކުން ވަރަށް އިންސްޕަޔާވި.”
ރުވޭ ފާހަގަކުރި ގޮތުގައި ކުރެހުމަށް އެހާ ޝަޢުޤު ހުއްޓައި އެފަދަ މަޢުރަޒެއް ބަލާލެވުމަކީ ދާއިރާއިން ކުރިއަށް ދިއުމަށް ހުޅުވުނު ދޮރެއްކަމަށް އޭރުވެސް ޤަބޫލުކުރެވުނު ކަމަށާއި، އަމިއްލަ ކުރެހުންތަކެއް ދައްކުވައިދޭ އަމިއްލަ އެގްޒިބިޝަނެއް ބޭއްވެންދެން މަސައްކަތް ހުއްޓާނުލުމަށް ނިންމިކަމަށެވެ.
“ކުރެހުންތައް އާންމުންނަށް ފެންނަން ފަށާފައި ހުންނާނީ ޕޭޖް (ރުވޭސް އާޓް) ހަދާފަ އެންމެ ފުރަތަމަ ލީ ފޮޓޯއިން. އެފޮޓޯ ކަމުގޮސްގެން ވަރަށް ގިނަ މީހުން ވާހަކަދެއްކި. އެފަހުން ގިނަބަޔަކަށް ކުރަހާކަން އެނގިފައި ހުންނާނީ ކެލިގްރަފީ އާޓާއި އެހެން ފޮޓޯތައްވެސް އަޅަން ފެށިހިސާބުން” ކަމަށް ރުވޭ ފާހަގަކުރިއެވެ. އެއީ ކަރަންޓީނުގައި ރަށުގައި ހުރި ދުވަސްތަކެއް ކަމަށާއި ކޮމިޝަނަށް މަސައްކަތް ކުރަންފެށުނު ހިސާބަކީ އެއީކަމަށް ރުވޭ ބުންޏެވެ.
ކުރެހުމަކީވެސް ޚާއްސަ ފަންނަކަށް ވާއިރު، އެކަމުގައި ސަމާލުކަން ދޭންޖެހޭ މުހިންމު ކަންތައްތަކެއް ހުންނާނެކަން ޔަޤީނެވެ. ޚާއްސަކޮށް ކުރެހުމެއް ފުރިހަމަކުރުމަށްޓަކައި ސަމާލުކަން ދޭންޖެހޭ ކަންތައްތަކެއް ހުންނައިރު، ރުވޭ އެންމެ އިސްކަމެއް ދެނީ އެކުރެހުމެއްގައި އިޙުސާސްތަކާއި އަސްލާއި އެއްގޮތްކަން ހާމަކޮށްދިނުމަށެވެ. މީގެ އިތުރުން އޯޑަރަކަށް ކުރަހާނަމަ، އެންމެ އިސްކަމެއް ދެނީ ކަސްޓަމަރު ބޭނުންވާ ގޮތަށް އެންމެ ފުރިހަމައަށް ކުރުމަށެވެ. ކަސްޓަމަރުން ހިތްހަމަޖެހޭ ވަރަށް ކުރެހުމަށެވެ. އަބަދުވެސް ކުރެހުންތައް އެންމެ ފުރިހަމައަށް ނިންމަން މަސައްކަތްކުރާކަމަށާއި، ކުރެހުމާއި މެދު އަމިއްލައަށް ހިތްހަމަޖެހުން އިހުސާސްވީމަ ނޫނީ އެ މަސައްކަތަކެއް ނިންމާކަށް ރުވޭ ބޭނުމެއް ނުވެއެވެ.
ޚާއްސަކޮށް ޕޯޓްރެއިޓް ކުރެހުންތަކަށް ލޯބިކުރާ ރުވޭގެ ނަޒަރުގައި ލޭންޑްސްކޭޕް ކުރެހުންތައް މިހާރު ފޫއްސެވެ. ރުވޭގެ ވާހަކަތަކުން އެނގުނު ގޮތުގައި ލޭންޑްސްކޭޕް ކުރެހުމެއް ކުރަހާލުމަކީ މާ ފަސޭހަކަމެކެވެ.
ފަންނެއް ގޮތުގައި ކުރިއަރައި ދިއުމަށް ކުރެހުމުގެ ޓެކްނިކްސް ދަސްކުރުމަށް ޔޫޓިއުބާއި ގޫގުލް އިން ވަރަށް ގިނަ މަޢުލޫމާތު ރުވޭ ވަނީ ހޯދާފައެވެ. މިއީ މި ފަންނާއި އެހެން ފަންނުތަކުގައިވެސް ކުރިއަރައި ދިއުމަށް އެންމެ ގިނަ މީހުން ބޭނުންކުރާ އެއްވަސީލަތެވެ. މީގެ އިތުރުން އަމިއްލަ މަސައްކަތުންވެސް ވަރަށް ގިނަ ކަންކަން ދަސްކޮށްފައިވާނެކަމަށާއި، އިތުރު ހުނަރު ދަސްކުރުމަށް ކަމުގެ ތަޖުރިބާކާރުންގެ ކައިރިން ކުލާސްތަކެއް ނަގަން ފަށާފައިވާނީ މިއަހަރުގައި ކަމަށް ރުވޭ މަޢުލޫމާތު ދިނެވެ. ކުލާސްތަކުންވެސް ބޮޑަށް އެނގުނީ ކުރިންވެސް އެނގިފައިހުރި ކަންކަން ކަމަށްވިޔަސް ފަސޭހަތަކެއް ވެފައިވާކަން ފާހަގަކޮށްފައިވެއެވެ.
ކުރެހުމުގެ ދާއިރާގައި އުޅޭ ހުރިހާ އާޓިސްޓުން ކަހަލަ ގޮތަކަށް ފޮލޯ ކުރާކަމަށާއި، އެހުރިހާ ފަރާތްތަކަކީވެސް ހުނަރުވެރި ފަންނުވެރި އަދި ވަރަށް ބޮޑަށް އިންޕަޔާރ ވާ ބައެއްކަމުގައި ރުވޭ ބުނިއެވެ. އެހެންކަމުން ވަކި އާޓިސްޓެއް ބުނަން ވަރަށް އުނދަގޫކަމަށް ބުނެފައިވެއެވެ.
އެންމެ ކުރީއްސުރެވެސް ކުރެހުމުގެ ދާއިރާއިން ކުރިއަށް ދިއުމަށް ބޮޑު ޝައުޤެއް އޮތް ރުވޭއަށް މިދާއިރާގައި ކުރިއަށް ދިއުމަށް ލިބޭ އެންމެ ބޮޑު ހިތްވަރަކީ އަދި ސަޕޯޓަކީވެސް ރުވޭ މަސައްކަތްކުރަމުން އަންނަ “ފެސްޓިވޯ އާޓްސް އެންޑް ޑިސައިންގ” އެވެ. ޚާއްސަކޮށް އާޓް ވޯކްގެ ދާއިރާއަށް ނެރެދިން އެތަނުގެ ވެރިޔާ އާމިރު ސާރ ގެ ނަން ރުވޭ ފާހަގަކުރެއެވެ. މީގެ އިތުރުން އާއިލާގެ މެމްބަރުންނާއި ގާތް ރަހުމަތްތެރިންގެ ފަރާތުންވެސް ހިތްވަރު ލިބޭކަން ރުވޭވަނީ ފާހަގަކޮށްފައެވެ.
މިދާއިރާއިން ކުރިއަށް ދިއުމަކަށް ރުވޭއަކަށް މިހާރު މާބޮޑު ގޮންޖެހުމެއް ކުރިމަތިއެއް ނުވެއެވެ. ބައެއް ފަހަރު އަމިއްލަ ދިރިއުޅުމުގައި ކުރިމަތިވާ ބައެއް ކަންކަމުގެ ސަބަބުން ކުރެހުމުގެ މަސައްކަތާއި ކުޑަކޮށް ދުރުވެވޭ ފަހަރު އަންނަކަމަށާއި، އެފަދަ ދަނޑިވަޅުތަކުގައި ހިތްވަރު ކޮށްލާފައި އަނެއްކާވެސް މަސައްކަތުގެ ތެރެއަށް އެނބުރި އަންނަނީކަމަށް ރުވޭ މަޢުލޫމާތު ދިނެވެ.
ކުރެހުމަކީ އެކަމަށް ވަގުތުތަކެއް ހޭދަވާ އެކަމުގެ ތެރެއަށް ވަރަށްބޮޑަށް ވަދެވިގެން ކުރެވޭނެ މަސައްކަތަކެވެ. އާންމު ސައިޒެއްގެ ކެންވާސްއެއްގައި ކުރަހާލަން ދެތިން ދުވަސް ހޭދަވާކަމަށާއި، ކުރެހުން ނޫނަސް ކުރަންޖެހޭ އެހެން މުހިންމު ކަންކަންވެސް ހުންނާތީ ހިތްހަމަޖެހޭ މިންވަރަށް ކުރެހުމެއް ނިންމާލުމަށް އެވްރެޖްކޮށް ހަފްތާއެއްވެސް ހޭދަވާކަމަށް ބުނެފައިވެއެވެ. މިހާތަނަށް ކުރެހި ފޮޓޯތަކުގެ ތެރެއިން އެންމެ ގިނަ ވަގުތު އޭނާ ހޭދަކޮށްފައިވަނީ “އަންވެއިލިންގ ވިޝަންސް 2023” ގައި ބެހެއްޓި ފޮޓޯއަށެވެ. ފ. ދަރަނބޫދޫ “ބިންގާ” ގޯތީގެ މަގުމަތީ ފާރު ކައިރީ ދަރަނބޫދޫގެ އަންހެން ކުއްޖަކު ހުއްޓިލައިގެން ހުންނަ މި ހިތްގައިމު ފޮޓޯ ކުރަހާލުމަށް 3 ހަފްތާ ވަންދެން ކޮންމެ ދުވަހަކު 9-15 ގަޑިއިރު މަސައްކަތް ކޮށްފައިވެއެވެ. އެހެން ނަމަވެސް އެ އިވެންޓަށް ފޮޓޯ ބައިވެރިކުރުމަށް ވަގުތު ހަމަވިއިރު މަސައްކަތް އެންމެ ބޭނުންވި ވަރަށް ނިންމާނުލެވުނަސް، ވަރަށް ގިނަ މީހުން އެކުރެހުމަށް ވަނީ ތަޢުރީފް ކޮށްފައެވެ.
ރާއްޖޭގައި މިހާރުވެސް ކުރެހުމުގެ ދާއިރާއިން ކުރިއަށް ދާން ބޭނުންވެފައި، އެކަމަކު ކުރިއަށް ދެވޭނެގޮތެއް ނޭގިފައި ވަރަށް ގިނަ ޒުވާން ކުދިން ތިބޭނެކަން ރުވޭ އަދިވެސް ގަބޫލުކުރެއެވެ. އެއީ ރުވޭވެސް އިރެއްގައި އެކުދިން ފަދައިން މިއީ ކުރެވިދާނެކަމެއްތޯ އަމިއްލަ ނަފްސާއި ސުވާލުކޮށް އުއްމީދެއް ނުލިބި ހުންނަންޖެހިފައިވުމުންނެވެ. އެފަދަ ކުދިންނަށް ރުވޭ ދޭން ބޭނުންވި މެސެޖަކީ އުއްމީދު ކަނޑާނުލައި ހިތްވަރުކޮށްގެން ކުރިއަށް ދިއުމަށް މަސައްކަތްކުރުމެވެ. އަދި ރާއްޖޭގައި ބާއްވާ އެކިއެކި އެގްޒިބިޝަންތަކަށް ކުރެހުންތައް ހުށަހެޅުމަށް މަސައްކަތްކުރުމުން މިދާއިރާއިން ކުރިއަށް ދެވޭނެކަމުގެ އިހްސާސްތައް މާބޮޑަށްވެސް ކުރެވޭނެކަމަށް ބުނެފައިވެއެވެ. އެހެން ފަންނުތައް ފަދައިން ކުރެހުމުގެ ފަންނުގައިވެސް ނެގަޓިވް ފީޑްބެކްވެސް ލިބޭނެކަމަށާއި އެއީ ކުރިއަށް ދިއުމަށް އަދި ކަންކަން ރަނގަޅު ކޮށްލުމަށް ލިބޭ ޕޮސިޓިވް ފުރުސަތެއް ގޮތުގައި ދެކުމަށްވެސް ނަސޭހަތްތެރިވިއެވެ.
ރުވޭ އަންނަނީ މިދާއިރާއިން ކުރިއަށް ދިއުމަށް ބޭނުންވެފައި ތިބި ފަރާތްތަކަށް ދަސްކޮށް ދިނުމުގެ މަސައްކަތްވެސް ކުރަމުންނެވެ. މަސައްކަތްކުރާ ފެސްޓިވޯ އާޓްސް އެންޑް ޑިޒައިންއާއެކު ކުޑަކުދިންނަށް ވަރަށް އަވަހަށް ކުލާސްތަކެއް ނަގަން ތައްޔާރުވެފައިވާ ކަމަށާއި، އަމިއްލަ ރަށުގައި ކުރެހުމާއި ގުޅޭ ވޯކްޝޮޕް ތަކެއް ކުރިއަށް ގެންދިއުމަށްވެސް މަސައްކަތް ކުރަމުން އަންނަކަމަށް ރުވޭ ހާމަކުރިއެވެ. މިއީ މިދާއިރާއިން ކުރިއަށް ދިއުމަށް ޝަޢުޤުހުރި ފަރާތްތަކަށް ލިބޭނެ ރަނގަޅު ފުރުސަތަކަށް ވެގެންދާނެއެވެ.
ތަފާތު އެކި ދާއިރާތަކުން ފަންނުވެރިން އުފެދިފައިވާ ދަރަނބޫދޫގައި ކުރެހުމުގެ ދާއިރާއިން ފާހަގަ ކޮށްލެވެނީ ވަރަށްވެސް މަދު ބައެކެވެ. އޭގެ ތެރެއިންވެސް ރުވޭ އަކީ އެ ފަންނުގައި އެންމެ ފާހަގަކޮށްލެވޭ އެންމެ ހުނަރުވެރި ފަރާތްތަކަމާއިމެދު ދެބަސްވާނެ މީހަކު ނުހުންނާނެކަން ޔަގީނެވެ. “ދަނިއުސް” ޓީމުން އެދެނީ ކުރެހުމުގެ ފަންނުގައި ރުވޭއަށް އިތުރު ކާމިޔާބީތަކެއް ލިބި، މިދާއިރާއިން ދެކެން ބޭނުންވާ ހުވަފެންތައް ހަގީގަތަކަށް ވެގެން ދިއުމެވެ.
