ދަރަނބޫދޫ ޒުވާނުންގެ ކުލަބުގެ 17 ވަނަ ދައުރުގެ ހިންގާ ކޮމެޓީގެ ރައީސަށް ލިބިގެންވާ ބާރުގެ ދަށުން ހިންގާ ކޮމެޓީގެ 10 ވަނަ މެމްބަރުގެ ގޮތުގައި ޝަހީދާ ޢަލީ ހަމަޖައްސަވައި އެކުލަބުގެ އިދާރީ ހިންގާ ކޮމެޓީ އެކުލަވާލައި އާންމުކޮށްފިއެވެ.
އެގޮތުން އެކުލަބުގެ އިންތިޚާބީ ކޮމެޓީގެ ރައީސަކަށް ހޮވިފައިވަނީ މުޢައްދު މުޙައްމަދެވެ. ނައިބްރައީސަކަށް ހޮވިފައިވަނީ އާދަމް އަޙުމަދެވެ. ހިންގާ ކޮމެޓީގެ އިތުރު މެމްބަރުންގެ ގޮތުގައި މުޙައްމަދު ހުސައިން، ލުޤުމާނު ޢަލީ، އަޒުޚާން ޚަލީލް، މުޙައްމަދު ޖައިލަމް، އަޙުމަދު ޝާފިޢުގެ އިތުރުން އިބްރާހީމް ޢަބްދުއް ޝަކޫރާއި ސަމާ ޢަލީވަނީ އިންތިޚާބު ކުރެވިފައެވެ.
ކުލަބުގެ ހިންގާ ކޮމެޓީގެ ބައްދަލުވުމަކުން، ކުލަބުގެ 17 ވަނަ ދައުރުގެ ޚަޒާންދާރަކަށް ހަމަޖައްސަވާފައިވަނީ ލުޤުމާނު ޢަލީއެވެ. އަދި ކުޅިވަރު ސެކްރެޓަރީއަކަށް އަޒުޚާން ޚަލީލް ހަމަޖައްސަވާފައިވާއިރު، ރައީސަށް ލިބިގެންވާ ބާރުގެ ދަށުން ހިންގާ ކޮމެޓީއަށް އައްޔަނުކުރެއްވި ޝަހީދާ ޢަލީ ވަނީ ސެކްރެޓަރީއަކަށް ހަމަޖައްސަވާފައެވެ.
ދަރަނބޫދޫ ޒުވާނުންގެ ކުލަބަކީ 1984 ވަނަ އަހަރު ޖަމްޢިއްޔާއެއްގެ ގޮތުގައި ރަޖިސްޓަރީކޮށް ހިންގަމުން އަންނަ ޖަމްޢިއްޔާއެކެވެ. އަދި މިއީ ދަރަނބޫދޫގައި އެންމެ ފުރަތަމަ ރަޖިސްޓްރީ ކުރެވިފައިވާ ދަރަނބޫދޫގެ އެންމެ ދުވަސްވީ ޖަމްޢިއްޔާއެވެ.
