ދަރަނބޫދޫ ޒުވާނުންގެ އުއްމީދާއި ގުޅިފައިވާ “ދަރަނބޫދޫ ޒުވާނުންގެ ކުލަބް”ގެ 17 ވަނަ ދައުރުގެ ހިންގާ ކޮމެޓީ އިއުލާނުކޮށް ޝަކުވާއެއް އޮތްނަމަ، އެކަން ހުށަހެޅުމުގެ ފުރުސަތު އެކުލަބުން ހުޅުވާލައިފިއެވެ.

ދަރަނބޫދޫ ޒުވާނުން ކުލަބުގެ މިފަހުގެ ތާރީޚްތަކުގައި ބޭއްވުނު އިންތިޚާބުތަކޭ އެއްފަދައިން 17 ވަނަ ދައުރުގައިވެސް އިންތިޚާބު ކުރިއަށް ގޮސްފައިވަނީ އެއްވެސް ވާދަވެރިކަމެއްނެތިއެވެ. އެގޮތުން ހިންގާ ކޮމެޓީއަށް ބޭނުންވާ އަދަދަށްވުރެ އިތުރަށް މެމްބަރުން ކުރިމަތިލާފައި ނުވާތީ، އިންތިޚާބަކާއި ނުލައި ހިންގާކޮމެޓީ މިވަނީ އެކުލަވާލެވިފައެވެ.

އެހެން ނަމަވެސް، އުފަލާއެކު ފާހަގަކޮށްލަންޖެހޭ ކަމަކީ، މިފަހަރުވެސް ހިންގާ ކޮމެޓީއަށް ކުރިމަތިލައްވާފައިވަނީ ވަރަށް ޒުވާން ފަރާތްތަކެއްކަމުގައިވުމެވެ. އެގޮތުން ތަފާތު ދާއިރާތަކުގައި މަސައްކަތްކުރައްވާ ޒުވާނުން މިފަހަރުގެ ހިންގާކޮމެޓީންވެސް ފާހަގަކުރެވިފައިވެއެވެ

17 ވަނަ ދައުރުގެ ހިންގާ ކޮމެޓީގައި ހިމެނި ވަޑައިގަންނަވާ ގިނަ މެމްބަރުންނަކީ މި ކުލަބުގެ އިދާރީ ހިންގުމުގައި މުޅިން އައު މޫނުތަކެއް ނަމަވެސް، ޑީޒެޑްސީގެ ކުލަ ރަށުގައި ވަޅުޖެހިފައިވަނިކޮށް 2010 ވަނަ އަހަރު ކުލަބު ކޮޅަށް ޖެހުމުގައި މުހިންމު ދައުރެއް އަދާކުރެއްވި ޖަމްއިއްޔާ ހިންގުމުގެ ތަޖުރިބާހުރި 2 ފަރާތެއް ފާހަގަކުރަންޖެހެއެވެ. އެއީ އައު ދައުރުގެ ނައިބް ރައީސް މަޤާމަށް ހޮވިފައިވާ އާދަމް އަހުމަދާއި މެމްބަރަކަށް ހޮވިފައިވާ މުޙައްމަދު ހުސައިނެވެ.

ދަރަނބޫދޫގެ ފަހުގެ ޒުވާން ޖީލުތަކަށް އުއްމީދު ގެނުވި “ކޯލާއައުނު ފުޓްސަލް ކަޕާއި ހަރިޔަން ނެޓްބޯލް ޓޯނަމެންޓް” ގެ އިތުރުން އުސްފަސް ކާނިވާ އާއި ބޮޑުމަސް ބޭނުން ފަދަ ކާމިޔާބު ފޯރިގަދަ އިވެންޓްތައް ފެނިގެން ގޮސްފައިވަނީ މި ދެންނެވުނު ދެ ބޭފުޅުންވެސް ހިމެނޭހެން އޭރުގެ ހިންގާ ކޮމެޓީގެ މެމްބަރުން ކުރެއްވި މިންނެތް މަސައްކަތުންކަން ފާހަގަކުރަންޖެހެއެވެ. އެހެންކަމުން އެ ބޭފުޅުންގެ ތަޖުރިބާގެ އަލީގައި އައު ހިންގާ ކޮމެޓީންވެސް ކާމިޔާބު ހަރަކާތްތަކެއް ކުރިއަށް ގެންދާނެކަމަށް ޒުވާނުން އުއްމީދުކުރެއެވެ.