ފ. ދަރަނބޫދޫ ކައުންސިލާއި ނިލަންދޫ ކައުންސިލް ގުޅިގެން މިއަހަރުގެ މިނިވަން ދުވަސް ފާހަގަކުރުމާއި ބެހޭގޮތުން މަޝްވަރާ ބައްދަލުވުމެއް ބާއްވައިފިއެވެ.
ނިލަންދޫ ރަށުކައުންސިލް އިދާރާގައި ކުރިއަށް ގެންދިޔަ މި ބައްދަލުވުން ބާއްވާފައިވަނީ ޖުލައިމަހުގެ 24 ވަނަ ދުވަހުގައެވެ. މި ބައްދަލުވުމުގައި ދަރަނބޫދޫ ކައުންސިލްގެ ރައީސް އަބްދުލް ހަމީދު އާދަމާއި ކައުންސިލް މެމްބަރު ޝާއިރާ އިސްމާއީލްގެ އިތުރުން ފ. ނިލަންދޫ ކައުންސިލާއި ނިލަންދޫގެ އެކިއެކި މުވައްސަސާތަކުން ބައިވެރިވެފައިވެއެވެ.
މި ބައްދަލުކުރުމުގައި މަޝްވަރާކޮށް ނިންމިފައިވަނީ ނިލަންދޫ އާއި ދަރަނބޫދޫގެ ރައްޔިތުންގެ މެދުގައި އެކުވެރިކަން އާލާކުރުމުގެ ގޮތުން ދެރަށުގެ ރައްޔިތުންގެ ބައިވެރިވުން އޮންނަ ގޮތަށް ފުޓުބޯޅަ މެޗަކާއި އަންހެނުންނަށް ހޭންޑް ބޯލް މެޗެއް އިންތިޒާމްކުރުމަށެވެ. އަދި ނިލަންދޫ ކައުންސިލާއި އަދި ނިލަންދޫ ޑޭލައިޓް ކުލަބާއި ގުޅިގެން ނިލަންދޫ ފިރިހެނުންގެ ސަގާފީ ހަރަކާތެއް ކުރިއަށް ގެންދިއުމަށްވަނީ ނިންމާފައެވެ. މި ހަރަކާތް ކުރިއަށް ދާނީ ދަރަނބޫދޫގައެވެ.
