އިޒްރާއީލާއި އެމެރިކާ އިސްވެ އީރާނަށް ދީފައިވާ ހަމަލާއާއި ގުޅިގެން މެދުއިރުމަތީ ސަރަޙައްދުގައި ހިނގަމުންދާ ކަންކަމުގެ ސަބަބުން މިވަގުތަށް ދިވެހިރާއްޖެއަށް މާބޮޑު އަސަރެއް ނުކުރާނެކަމަށް ރައީސުލް ޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.

ރައީސް އޮފީހުގައި މިއަދު ނޫސްވެރިންނާ ބައްދަލުކުރައްވާ ރައީސް ވިދާޅުވީ، ރައީސްގެ އިރުޝާދުގެ ދަށުން ޚާއްސަ ޓީމެއް އެކުލަވާލެވި ވަރަށް ރަނގަޅަށް ކަންކަން ބަލަމުންދާ ކަމަށެވެ. އެގޮތުން މި ސަރަޙައްދަކީ ގިނަ އަދަދަކަށް ދިވެހިން ތަޢުލީމް ހާސިލްކުރުމަށާއި އެހެނިހެން ބޭނުންތަކަށްވެސް ގޮސްއުޅޭ ސަރަޙައްދަކަށްވާތީ ދިވެހިންގެ ކަންކަން ވަރަށް ގާތުން ބައްލަވަމުން ގެންދަވާކަން ރައީސް ފާހަގަކުރެއްވިއެވެ.

ރައީސް އިތުރަށް ވިދާޅުވީ މެދުއިރުމަތީ ހަމަނުޖެހުމާއި ގުޅިގެންވިޔަސް އެއްވެސް ވަރަކަށް ތެޔޮ ރާއްޖެއަށް ނުލިބޭނެ ކަހަލަ ގޮތަކަށް އަދި ނެތްކަމަށާއި ރާއްޖެ ތެލަށް ނުޖެހޭނެ ވަރަށް ރިޒާވް ކުރެވިފައި މިހާރުވެސް އެބަހުރިކަމަށެވެ. އަދި މިހާލަތާއި ގުޅިގެން ކާބޯތަކެތި ފޯރުކޮށް ދިނުމުގައިވެސް އެއްވެސް ވަރެއްގެ ކަންބޮޑުވުމެއް ނެތްކަން ރައީސް ފާހަގަކުރެއްވިއެވެ.

މީގެ އިތުރުން ރާއްޖެއަކީ ޓޫރިޒަމްއަށް ބަރޯސާވެފައިވާ ޤައުމަކަށްވާތީ، ހަނގުރާމައިގެ ސަބަބުން ރާއްޖެއިން ނުފުރިފައި އަދި ރާއްޖެއަށް ނާދެވިފައި ވަރަށް ގިނަ ފަރާތްތަކެއް ތިބިކަން ރައީސް ފާހަގަކުރެއްވިއެވެ. ހަމަނުޖެހުން ހިނގަމުން އަންނަ މެދު އިރުމައްޗަކީ ރާއްޖެއަށް ޓޫރިސްޓުން ވަރަށް ގިނައިން އަންނަ ރޫޓެއްކަމަށާއި ނަމަވެސް އެ ސަރަހައްދުގެ ގިނަ ޤައުމުތަކުގެ ވައިގެ ސަރަޙައްދުވަނީ ބަންދުކުރެވިފައެވެ. މިވަގުތު ރާއްޖެ ނާދެވިފައިތިބި ފަރާތްތަކަށް މެދުއިރުމަތި ނޫން ރޫޓަކުން ގެނައުމުގެ މަސައްކަތްވެސް އެއާލައިންތަކާއި އޭޖެންސީތަކާއި ވާހަކަ ދައްކައިގެން ކުރަމުން އަންނަކަން ރައީސް ފާހަގަކުރެއްވިއެވެ.

ރައީސްގެ ބައްދަލުވުމަށްފަހު ވަނީ ނޫސްވެރިންގެ ސުވާލުތަކަށް 1 ގަޑިއިރުގެ ވަގުތެއް ދެއްވާފައެވެ.