ދަރަނބޫދޫ ކައުންސިލުން އިންތިޒާމްކޮށްގެން ބާއްވާ އެކައުންސިލްގެ ފުރަތަމަ ޤުރުއާން މުބާރާތް މިއަދު ފެށުމަށް ވަނީ ހަމަޖެހިފައެވެ. ދަރަނބޫދޫ ސްކޫލްގެ ހޯލްގައި ކުރިއަށް ގެންދާ މިމުބާރާތް ފެށުމަށް ހަމަޖެހިފައިވަނީ މިއަދު ހެނދުނު 9:00 ގައެވެ.
ދަރަނބޫދޫ ކައުންސިލުގެ މި މުބާރާތް މިއަހަރު ބާއްވަނީ “އެމްޕީ ސައުދާ ދަރަނބޫދޫ ކައުންސިލްގެ 1 ވަނަ ޤުރުއާން މުބާރާތް 1446” ގެ ނަމުގައެވެ. ނިލަންދޫ ދާއިރާގެ މަޖިލިސް މެމްބަރު ފާތިމަތު ސައުދާވަނީ މިމުބާރާތަށް ޚަރަދުކޮށް މުބާރާތުގެ ޓައިޓްލް ސްޕޮންސަރ ކޮށްދެއްވާފައެވެ.
ދަރަނބޫދޫގެ ރައްޔިތުންނާއި ކުދިންގެ ހިތްތަކުގައި ޤުރުއާނަށް ލޯބިޖައްސައި އަތޮޅާއި ޤައުމީ ފެންވަރުގައި ނަން ވިދާލެވޭ ފަދަ ޤާބިލް ކުދިންތަކެއް އުފެއްދުމުގެ މަޤްސަދުގައި ކައުންސިލުން ފެއްޓެވި މި މުބާރާތުގައި ބައިވެރިވުމުގެ ފުރުސަތު ހުރިހާ އުމުރު ފުރާއަކަށް އާންމުކޮށް ހުޅުވާލެވުނެވެ. މިއީ ބަލައިގެން ކިޔެވުމާއި ނުބަލައި ކިޔެވުން ހިމެނޭހެން ދެ ގޮތްޕަކަށް ބަހާލައިގެން ކުރިއަށް ގެންދެވޭ މުބާރާތެކެވެ.
މި މުބާރާތުގައި ޖުމުލަ 77 ބައިވެރިން ކިޔެވުމަށް ހަމަޖެހިފައިވާކަމަށް ދަރަނބޫދޫ ކައުންސިލުން މަޢުލޫމާތު ދެއްވާފައި ވެއެވެ.
މި މުބާރާތް ކުރިއަށް ދާނީ މިއަދުން ފެށިގެން މިމަހުގެ 23 ވަނަ ދުވަހުގެ ނިޔަލަށެވެ.