ޚައިރު ފައުންޑޭޝަނުން އިސްނަގައި ދަރަނބޫދޫ ސްކޫލުގެ ތިމާވެށި ކުލަބާއި ގުޅިގެން ފެއްޓެވި ދަނޑުވެރި ދަރިވަރު ޕްރޮގްރާމްގެ ފުރަތަމަ ބެޗު ކާމިޔާބުކަމާއެކު ހައްދައި ވިއްކަން ފެށި ޚަބަރާއެކު އާންމު ގިނަބައެއްގެ ތައުރީފް އެ ޕްރޮގްރާމަށް ލިބިއްޖެއެވެ. އެ ޕްރޮގްރާމްގެ ފުރަތަމަ ބެޗުގައި ހައްދައި ވިއްކާފައިވަނީ ލެޓިއުސް ފަތެވެ.
ގާތްގަނޑަކަށް ދޮޅު މަހެއްހާ ދުވަހު ދަރަނބޫދޫ ސްކޫލް ދަރިވަރުންގެ މަސައްކަތުން 180 ލެޓިއުސް ގަސް ކާމިޔާބުކަމާއެކު ހައްދައި ވިއްކަން ފެށި ޚަބަރު ދަރަނބޫދޫގެ މީސްމީޑިއާ މަންސަ ތަކުގައި އާންމުކޮށްފައިވަނީ މިމަހުގެ 9 ވަނަ ދުވަހުގައެވެ.
ދަރަނބޫދޫ ސްކޫލުގެ ދަރިވަރުން ވާޓިކަލް ފާމިން ތަޢާރަފްކޮށް ލެޓިއުސް ހައްދަމުންދާ ކަމުގެ ޚަބަރެއް ދިވެހިރާއްޖޭގެ ދަނޑުވެރިކަމާއި ދިރޭތަކެއްޗާއިބެހޭ ވުޒާރާއިންވެސް ވަނީ މީސްމީޑިއާގައި ދައުރު ކޮށްފައެވެ. އަދި އެ ވުޒާރާގެ ވަޒީރު، ޑރ. މަރިޔަމް މާރިޔާވެސް ލިންކާއެކު ފޭސްބުކްގައި ޙިއްސާކޮށް ވިދާޅުވެފައިވަނީ “ވަރަށް އުފާވޭ ” އެވެ.

މި ޕްރޮގްރާމަށް ތަޢުރީފް ކުރައްވާ ހިތްވަރު ދެއްވާފައިވާ ފަރާތްތަކުގެ ތެރޭގައި ލ. އަތޮޅު ކައުންސިލްގެ ކުރީގެ ނައިބްރައީސް، މޫސާ ފައިސަލްވެސް ހިމެނެއެވެ. ވާޓިކަލް ފާމިންގ ސްކޫލު ދަރިވަރުން ތަޢާރަފް ކުރުމާއި ގުޅިގެން މޫސަ ވިދާޅުވީ ސްކޫލުތަކުން ހަމައެކަނި “ޓޮޕްޓެން” އަށް ދަރިވަރުން މަރުފަލި ނުޖައްސައި މިފަދަ ކަންކަން ދަރިވަރުންނަށް ދަސްކޮށް ދިނުން މުހިންމު ކަމަށެވެ.
މިފަދަ ކަންކަމަށް ދަރިވަރުން އަހުލުވެރިކުރުވާ ހޭލައްވާނަމަ، ރަނގަޅު މުޑުވަށް މުޖުތަމަޢަށް ލިބޭނެ! ހަމައެކަނި ޓޮޕްޓެން އަށް ކުދިން މަރުފަލި ނުޖައްސުވާ! ދުނިޔޭގައި ހަތަރު މޮށްގަނޑު ޖައްސާލެވޭފަދަ އިންސާނީ ޖީލެއް ބިނާކުރާށެވެ. ލ.އަތޮޅު ކައުންސިލްގެ ކުރީގެ ނައިބްރައީސް މޫސާ ފައިސަލް.
ދަރަނބޫދޫ ސްކޫލުން ވާޓިކަލް ފާރމިންގ ސިސްޓަމްގައި ލެޓިއުސް ހައްދައި ވިއްކަން ފަށާފައިވަނީ ޚައިރު ފައުންޑޭޝަނުން އިސްނަގައި ދަރަނބޫދޫ ސްކޫލުގެ ތިމާވެށި ކުލަބާއި ގުޅިގެން ފައްޓާފައިވާ “ދަނޑުވެރި ދަރިވަރު” ޕްރޮގްރާމްގެ ދަށުންނެވެ.
ސްކޫލް ދަރިވަރުންނަށް ދަނޑުވެރިކަމުގެ މަޢުލޫމާތާއި ހުނަރާއި ވައްޓަފާޅި ދަސްކޮށްދީ، ތިމާވެއްޓާއި ރައްޓެހި ޒަމާނީ ދަނޑުވެރިކަމަށް އަހުލުވެރިކޮށްދީ، ފައިދާހުރި މޭވާއާއި ތަރުކާރީގެ މުހިންމުކަމާއި މެދު މުޖުތަމަޢު ހޭލުންތެރިކޮށް، ދަނޑުވެރިކަމުން މާލީ ފުދުންތެރިކަން ހޮދިދާނެ ގޮތްތައް ތަޖުރިބާ ކުރުމުގެ ފުރުސަތު ހޯދައި ދިނުމުގެ މަޤްސަދުގައި ފަށާފައިވާ މި ޕްރޮގްރާމުގައި ދަރިވަރުންނަށް ތަމްރީން ދެއްވަނީ ޕްލާންޓް އަ ޓްރީ ޖަމްޢިއްޔާގެ ފަރާތުންނެވެ.